ತನ್ನದೇ ವಾಂಟೆಡ್ ಕಾಲಂ ಫೇಸ್ ಬುಕ್ ಪೋಸ್ಟ್ ಗೆ ಕಾಮೆಂಟ್ ಮಾಡಿದ ಅತ್ಯಾಚಾರಿ ಆರೋಪಿ!
ಶನಿವಾರ, 8 ಜುಲೈ 2017 (10:35 IST)
ವಾಷಿಂಗ್ಟನ್: ಅತ್ಯಾಚಾರ ಆರೋಪಿ ಈಗ ತಲೆ ಮರೆಸಿಕೊಂಡಿದ್ದಾನೆ. ಪತ್ತೆ ಮಾಡಿ ಪೊಲೀಸರಿಗೆ ತಿಳಿಸಿ ಎಂದು ಫೇಸ್ ಬುಕ್ ನಲ್ಲಿ ವಾಂಟೆಡ್ ಪೋಸ್ಟ್ ಕೆಳಗೆ ಸಾಮಾನ್ಯವಾಗಿ ಸಾಮಾನ್ಯ ಜನರು ಕಾಮೆಂಟ್ ಮಾಡುತ್ತಾರೆ. ಆದರೆ ಅಮೆರಿಕಾದಲ್ಲಿ ಅಪರಾಧಿಯೇ ಕಾಮೆಂಟ್ ಮಾಡಿ ಸುದ್ದಿಯಾಗಿದ್ದಾನೆ!
ಅತ್ಯಾಚಾರ ಮತ್ತು ಅಪಹರಣ ಪ್ರಕರಣದಲ್ಲಿ ಡೆರೆಕ್ ಎನ್ನುವ 28 ವರ್ಷದ ಯುವಕ ಪೊಲೀಸರ ವಾಂಟೆಡ್ ಪಟ್ಟಿಯಲ್ಲಿದ್ದ. ಈತನ ಬಗ್ಗೆ ಸುಳಿವು ನೀಡುವಂತೆ ಪೊಲೀಸರು ಫೇಸ್ ಬುಕ್ ನಲ್ಲಿ ವಿವರಣೆ ಪ್ರಕಟಿಸಿದ್ದರು. ಇದರ ಕೆಳಗೆ ವ್ಯಕ್ತಿಯೊಬ್ಬರು ಈತನನ್ನು ಗೊತ್ತು. ಈತ ಒಳ್ಳೆಯ ವ್ಯಕ್ತಿ ಎಂದು ಕಾಮೆಂಟ್ ಮಾಡಿದ್ದರು.
ಈ ಕಾಮೆಂಟ್ ನೋಡಿ ಅಪರಾಧಿ ಆತನಿಗೆ ಧನ್ಯವಾದ ತಿಳಿಸಿದ್ದಲ್ಲದೆ, ತಾನು ನಿರಪರಾಧಿ. ಸದ್ಯದಲ್ಲೇ ಸತ್ಯ ಹೊರಬೀಳಲಿದೆ ಎಂದು ಪ್ರತಿಕ್ರಿಯಿಸಿದ್ದಾನೆ. ಇದನ್ನು ಕಂಡ ಪೊಲೀಸರೂ ಕಾಮೆಂಟ್ ಮಾಡಿದ್ದು, ನೀನು ಸದ್ಯದಲ್ಲೇ ನಮ್ಮ ಬಲೆಗೆ ಬೀಳಲೇಬೇಕು ಎಂದಿದ್ದಾರೆ!
