ಪ್ರೇಕ್ಷಕರ ವಲಯದಲ್ಲಿ ಕೌತುಕದ ಕುಲುಮೆಯೊಂದನ್ನು ಸದಾ ಹದಮುದವಾಗಿ ನಿಗಿನಿಗಿಸುವಂತೆ ಮಾಡುತ್ತಾ ಬಂದಿದ್ದ ಚಿತ್ರ ನನ್ನ ಪ್ರಕಾರ. ಪೋಸ್ಟರ್ಗಳು, ಹಾಡು ಮುಂತಾದವುಗಳಲ್ಲಿನ ಹೊಸ ಪ್ರಯತ್ನಗಳ ಮೂಲಕವೇ ಹೊಸಾ ಹೊಳಹೊಂದನ್ನು ಪ್ರೇಕ್ಷಕರಿಗೆ ತಲುಪಿಸುವಲ್ಲಿಯೂ ಹೊಸಬರ ತಂಡ ಯಶ ಕಂಡಿತ್ತು. ಇನ್ನೇನು ಈ ಚಿತ್ರ ಇದೇ ಇಪ್ಪತ್ಮೂರರಂದು ತೆರೆಗಾಣುತ್ತಿದೆ. ಈ ಹೊತ್ತಿನಲ್ಲಿಯೇ ಚಾಲೆಂಜಿಂಗ್ ಸ್ಟಾರ್ ದರ್ಶನ್ ಟ್ರೇಲರ್ ಲಾಂಚ್ ಮಾಡಿದ್ದಾರೆ. ಈ ಮೂಲಕ ಪ್ರೇಕ್ಷಕರೆದೆಯಲ್ಲಿ ಕೌತುಕದ ಕುಲುಮೆ ಧಗಧಗಿಸಲಾರಂಭಿಸಿದೆ.
ಸುಂದರವಾದ ಸಮಾರಂಭದಲ್ಲಿ ಅಷ್ಟೇ ಸುಂದರವಾದ ಟ್ರೇಲರ್ ಅನ್ನು ಲಾಂಚ್ ಮಾಡಿದ್ದಾರೆ. ಸ್ವತಃ ಅವರೇ ಅದನ್ನು ಮೆಚ್ಚಿಕೊಂಡು, ಈ ಹೊಸಬರ ತಂಡಕ್ಕೆ ಅದ್ಭುತವಾದ ಗೆಲುವು ಸಿಗಲೆಂದು ಹಾರೈಸಿದ್ದಾರೆ. ಇದರಿಂದ ನನ್ನಪ್ರಕಾರ ಚಿತ್ರದ ಗೆಲುವು ಮತ್ತಷ್ಟು ನಿಚ್ಚಳವಾದಂತಾಗಿದೆ.
ಕುತೂಹಲಕರವಾದ ಕ್ರೈಂ ಸಸ್ಪೆನ್ಸ್ ಥ್ರಿಲ್ಲರ್ ಕಥಾನಕದ ಚಹರೆಯನ್ನು ತುಂಬಿಕೊಂಡಿರೋ ಈ ಟ್ರೇಲರ್ ವೇಗವಾಗಿ ಹೆಚ್ಚೆಚ್ಚು ವೀಕ್ಷಣೆ ಪಡೆದುಕೊಂಡು ಟ್ರೆಂಡಿಂಗ್ನತ್ತ ದಾಪುಗಾಲಿಡುತ್ತಿದೆ. ಇದನ್ನು ನೋಡಿದ ಎಲ್ಲರೂ ಈ ಹೊಸಬರ ತಂಡವನ್ನು ಮೆಚ್ಚಿ ಕೊಂಡಾಡುತ್ತಿದ್ದಾರೆ. ಇದರಲ್ಲಿ ಕಿಶೋರ್, ಪ್ರಿಯಾಮಣಿ, ಮಯೂರಿ ಪಾತ್ರಗಳ ಝಲಕ್ಕುಗಳೂ ಅನಾವರಣಗೊಂಡಿವೆ.
