ಕೆಜಿಎಫ್ ಅಕ್ರಮ ಪ್ರಸಾರ: ಸ್ಥಳೀಯ ಚಾನೆಲ್ ವಿರುದ್ಧ ಕಾನೂನು ಸಮರಕ್ಕೆ ಮುಂದಾದ ಚಿತ್ರತಂಡ

ಬೆಂಗಳೂರು: ಕೆಜಿಎಫ್ ಸಿನಿಮಾವನ್ನು ಅನುಮತಿಯಿಲ್ಲದೇ ಪ್ರಸಾರ ಮಾಡಿದ ಸ್ಥಳೀಯ ಕೇಬಲ್ ಟಿವಿ ಚಾನೆಲ್ ವಿರುದ್ಧ ಚಿತ್ರತಂಡ ಕಾನೂನು ಸಮರಕ್ಕೆ ಮುಂದಾಗಿದೆ.

ಕೆಜಿಎಫ್ ಸಿನಿಮಾವನ್ನು ತೆಲುಗಿನಲ್ಲಿ ಪ್ರಸಾರ ಮಾಡಲು ಇನ್ನೂ ನಿರ್ಮಾಪಕರು ಮಾತುಕತೆ ನಡೆಸುತ್ತಿದ್ದಾರಷ್ಟೇ. ಈ ನಡುವೆ ತೆಲುಗು ಸ್ಥಳೀಯ ಚಾನೆಲ್ ಒಂದು ಚಿತ್ರತಂಡದ ಅನುಮತಿಯಿಲ್ಲದೇ ತೆಲುಗು ವರ್ಷನ್ ಸಿನಿಮಾವನ್ನು ಪ್ರಸಾರ ಮಾಡಿತ್ತು.

ಈ ಬಗ್ಗೆ ತಮ್ಮ ಟ್ವಿಟರ್ ಖಾತೆಯಲ್ಲಿ ಬರೆದುಕೊಂಡಿರುವ ನಿರ್ಮಾಪಕ ಕಾರ್ತಿಕ್ ಗೌಡ ಟಿವಿ ವಾಹಿನಿ ವಿರುದ್ಧ ಕಾನೂನು ಕ್ರಮ ಕೈಗೊಳ್ಳುವುದಾಗಿ ಹೇಳಿದ್ದಾರೆ.