ವರುಣಾ ಕ್ಷೇತ್ರದಲ್ಲಿ 500 ಕೋಟಿ ರೂ.ಗಳ ಯೋಜನೆಗೆ ಚಾಲನೆ ನೀಡಿದ ಬಳಿಕ ಮಾತನಾಡಿದ್ದ ಸಿಎಂ ಸಿದ್ದರಾಮಯ್ಯ, ನಾನು ಸ್ವಂತ ಲಾಭಕ್ಕೆ ಒಂದೇ ಒಂದು ಪೈಸೆ ದುಡ್ಡು ಮಾಡಿಲ್ಲ. ಈಗಲೂ ಬಾಡಿಗೆ ಮನೆಯಲ್ಲಿ ವಾಸ ಮಾಡುತ್ತಿದ್ದೇನೆ ಎಂದಿದ್ದರು. ಸಿಎಂ ಹೇಳಿಕೆಗೆ ಈಗ ವಿಶ್ವನಾಥ್ ವ್ಯಂಗ್ಯ ಮಾಡಿದ್ದಾರೆ.
ನನಗೆ ಮನೆಯಿಲ್ಲ, ಮರಿಸ್ವಾಮಿ ಮನೆಯಲ್ಲಿದ್ದೇನೆ ಎನ್ನುವುದೆಲ್ಲಾ ಸಿದ್ದರಾಮಯ್ಯ ನಾಟಕ. ಸಿದ್ದರಾಮಯ್ಯ ಎಂಥಾ ಭ್ರಷ್ಟ ಎನ್ನುವುದನ್ನು ಈಗ ಜನ ಅರ್ಥ ಮಾಡಿಕೊಂಡಿದ್ದಾರೆ. ಅವರು ನಾನು ಒಳ್ಳೆಯವನು ಎಂದು ಡಂಗೂರ ಹೊಡಿಸುತ್ತಿದ್ದಾರೆ. ವರುಣಾದಲ್ಲಿ 500 ಕೋಟಿ ರೂ. ಯೋಜನೆ ಎಲ್ಲಾ ನೆಪ ಅಷ್ಟೇ. ನಾನು ಸಾಚಾ ಎಂದು ತೋರಿಸಿಕೊಳ್ಳಲು ಮಾಡಿದ ಕಾರ್ಯಕ್ರಮ ಎಂದು ವಿಶ್ವನಾಥ್ ಹೇಳಿದ್ದಾರೆ.
ಸಿಎಂ ಸಿದ್ದರಾಮಯ್ಯ ಮಗ, ಸೊಸೆ ಹೆಸರಿನಲ್ಲಿ ಪಬ್ ಮಾಡಿದ್ದಾರೆ. ಇದಕ್ಕೆಲ್ಲಾ ಸಚಿವ ಭೈರತಿ ಸುರೇಶ್ ಮಾಸ್ಟರ್ ಮೈಂಡ್. ಅವರ ಕ್ಷೇತ್ರದಲ್ಲೇ ಪಬ್ ಇದೆ ಎಂದು ವಿಶ್ವನಾಥ್ ಗಂಭೀರ ಆರೋಪ ಮಾಡಿದ್ದಾರೆ. ನಾನೂ ಅವರ ಪಾರ್ಟಿಗಳಲ್ಲಿ ಗುರುತಿಸಿಕೊಂಡಿದ್ದೇನೆ. ಆದರೆ ಎಂದೂ ನನ್ನ ಅಜೆಂಡಾ ಬಿಟ್ಟಿಲ್ಲ ಎಂದು ವಿಶ್ವನಾಥ್ ಹೇಳಿದ್ದಾರೆ.
