ಬೆಂಗಳೂರು: ಕಾಂಗ್ರೆಸ್ ಪಂಚ ಗ್ಯಾರಂಟಿ ಯೋಜನೆಗಳ ಪೈಕಿ ಗೃಹಲಕ್ಷ್ಮಿ ಯೋಜನೆ ಕೂಡಾ ಒಂದು. ಆ ಯೋಜನೆಯ ಯಶಸ್ವೀ ಕತೆಗಳ ಬಗ್ಗೆ ರೀಲ್ಸ್ ಮಾಡಿ ಸೋಷಿಯಲ್ ಮೀಡಿಯಾದಲ್ಲಿ ಪ್ರಕಟಿಸಿದರೆ ಬಂಪರ್ ಗಿಫ್ಟ್ ಒಂದು ನಿಮಗೆ ಸಿಗಲಿದೆ.
ಇದನ್ನು ಸ್ವತಃ ಸಚಿವೆ ಲಕ್ಷ್ಮೀ ಹೆಬ್ಬಾಳ್ಕರ್ ಘೋಷಿಸಿದ್ದಾರೆ. ಗೃಹಲಕ್ಷ್ಮಿ ಯೋಜನೆಗೆ ಇತ್ತೀಚೆಗೆ ಒಂದು ವರ್ಷ ತುಂಬಿದೆ. ಇದರ ಸಲುವಾಗಿ ಫಲಾನುಭವಿಗಲಿಗೆ ಸಚಿವೆ ಲಕ್ಷ್ಮೀ ಹೆಬ್ಬಾಳ್ಕರ್ ಬಹುಮಾನ ನೀಡುವ ಆಫರ್ ಕೊಟ್ಟಿದ್ದಾರೆ. ರೀಲ್ಸ್ ಮಾಡುವವರಿಗೆ 1 ಲಕ್ಷ ರೂ. ಬಹುಮಾನ ಘೋಷಣೆ ಮಾಡಿದ್ದಾರೆ.
ಗೃಹಲಕ್ಷ್ಮಿ ಯೋಜನೆಯಿಂದ ಸಿಕ್ಕ ಹಣವನ್ನು ಕೂಡಿಟ್ಟು ಇತ್ತೀಚೆಗೆ ಒಬ್ಬರು ಫ್ಯಾನ್ಸಿ ಸ್ಟೋರ್ ಮಾಡಿದ್ದು ಮತ್ತೊಬ್ಬರು ಫ್ರಿಡ್ಜ್ ಖರೀದಿಸಿದ್ದು ಇತ್ಯಾದಿ ಘಟನೆಗಳ ಬಗ್ಗೆ ವರದಿಯಾಗಿದೆ. ಇದು ಸರ್ಕಾರದವರೆಗೂ ತಲುಪಿದೆ. ಸ್ವತಃ ಸಿಎಂ ಸಿದ್ದರಾಮಯ್ಯ ಕೂಡಾ ನೇರವಾಗಿ ಇಂತಹವರನ್ನು ಅಭಿನಂದಿಸಿದ್ದು ಇದೆ.
ಇದೀಗ ಅಂತಹ ಯಶೋಗಾಥೆಗಳ ಬಗ್ಗೆ ರೀಲ್ಸ್ ಮಾಡಿ ಸೋಷಿಯಲ್ ಮೀಡಿಯಾದಲ್ಲಿ ಪೋಸ್ಟ್ ಮಾಡಿ. ಈ ರೀತಿ ಪೋಸ್ಟ್ ಮಾಡಿ ಹೆಚ್ಚು ವ್ಯೂ ಪಡೆದ ರೀಲ್ಸ್ ಗಳಿಗೆ 1 ಲಕ್ಷ ರೂ.ಗಳ ಬಹುಮಾನ ನೀಡುವುದಾಗಿ ಸಚಿವೆ ಲಕ್ಷ್ಮಿ ಹೆಬ್ಬಾಳ್ಕರ್ ಘೋಷಿಸಿದ್ದಾರೆ. ಮನೆ ಯಜಮಾನಿಗೆ ಈ ಬಹುಮಾನ ಹಣ ಸಿಗಲಿದೆ.
