ಸ್ನಾನ ಮಾಡುವುದನ್ನು ಕದ್ದು ನೋಡಿದ ಬಾಲಕ: ಯುವತಿ ಆತ್ಮಹತ್ಯೆಗೆ ಯತ್ನ

ಸ್ನಾನ ಮಾಡುತ್ತಿರುವಾಗ 18 ವರ್ಷದ ಹದಿಹರೆಯದ ಯುವಕನೊಬ್ಬ ಕದ್ದು ನೋಡಿದ್ದರಿಂದ ಜಿಗುಪ್ಸೆಗೊಂಡ ಯುವತಿಯೊಬ್ಬಳು ತನ್ನನ್ನು ತಾನು ದಹಿಸಿಕೊಂಡು ಆತ್ಮಹತ್ಯೆಗೆ ಪ್ರಯತ್ನಿಸಿದ ಘಟನೆ ಭಿಲ್ವಾರಾ ಜಿಲ್ಲೆಯ ಡೆಲಾನಾ ಗ್ರಾಮದಲ್ಲಿ ನಡೆದಿದೆ ಎಂದು ಪೊಲೀಸ್ ಮೂಲಗಳು ತಿಳಿಸಿವೆ.

ಯುವತಿಗೆ ಶೇ.70 ರಷ್ಟು ಸುಟ್ಟಗಾಯಗಳಾಗಿದ್ದು ಆಸ್ಪತ್ರೆಗೆ ದಾಖಲಿಸಲಾಗಿದೆ. ಆರೋಪಿ ಬಾಲಕ ಮತ್ತು ಆತನ ತಂದೆ ಹಾಗೂ ಸಂಬಂಧಿಯೊಬ್ಬನನ್ನು ಪೊಲೀಸರು ವಶಕ್ಕೆ ತೆಗೆದುಕೊಂಡಿದ್ದಾರೆ.

ಪೊಲೀಸ್ ಮೂಲಗಳ ಪ್ರಕಾರ, ಗುರುವಾರದಂದು ಸಂಜೆ ಯುವತಿ ತನ್ನ ಮನೆಯ ಶೆಡ್‌ನಲ್ಲಿ ಸ್ನಾನ ಮಾಡುತ್ತಿರುವಾಗ ಹದಿಹರೆಯದ ಯುವಕ ಕದ್ದು ನೋಡುತ್ತಿದ್ದಾನೆ ಎನ್ನುವುದು ಗಮನಕ್ಕೆ ಬಂದಿದೆ. ಆಕೆ ಜೋರಾಗಿ ಕೂಗಿದಾಗ ಮನೆಯೊಳಗಿದ್ದ ಚಿಕ್ಕಪ್ಪ ಹೊರಬಂದು ಆರೋಪಿಯನ್ನು ಹಿಡಿಯುವಲ್ಲಿ ಯಶಸ್ವಿಯಾಗಿದ್ದಾನೆ ಎಂದು ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ ಪ್ರದೀಪ್ ಮೋಹನ್ ಶರ್ಮಾ ತಿಳಿಸಿದ್ದಾರೆ.  

ಆರಂಭದಲ್ಲಿ ಯುವತಿ ಕುಟುಂಬದವರು ಆರೋಪಿಗೆ ಬುದ್ದಿಹೇಳುವಂತೆ ಆತನ ಕುಟುಂಬದವರಿಗೆ ಸಲಹೆ ನೀಡಿದ್ದಾರೆ. ಆದರೆ, ತಮ್ಮ ಪುತ್ರನ ವಿರುದ್ಧ ಸುಳ್ಳು ಆರೋಪ ಮಾಡುತ್ತಿದ್ದಾರೆ ಎನ್ನುವ ಕೋಪದಿಂದ ಆರೋಪಿಯ ತಂದೆ ಮತ್ತು ಅವರ ಮತ್ತೊಬ್ಬ ಸಂಬಂಧಿ ಸೇರಿ ಯುವತಿಯ ಮನೆಯೊಳಗೆ ನುಗ್ಗಿ ಹಲ್ಲೆ ನಡೆಸಿದ್ದಾರೆ. 

ಇಷ್ಟೆಲ್ಲಾ ಘಟನೆ ನಡೆಯಲು ನಾನೇ ಕಾರಣ ಎಂದು ಭಾವಿಸಿದ ಯುವತಿ ಮನೆಯೊಳಗೆ ತೆರಳಿ ಸೀಮೆಎಣ್ಣೆ ಸುರಿದುಕೊಂಡು ಬೆಂಕಿ ಹಚ್ಚಿಕೊಂಡಿದ್ದಾಳೆ. ಹದಿಹರೆಯದ ಯುವಕನ ವರ್ತನೆಯೇ ನನ್ನ ಆತ್ಮಹತ್ಯೆ ಪ್ರಯತ್ನಕ್ಕೆ ನಾಂದಿಯಾಗಿದೆ ಎಂದು ಯುವತಿ ಪೊಲೀಸರಿಗೆ ನೀಡಿದ ದೂರಿನಲ್ಲಿ ತಿಳಿಸಿದ್ದಾಳೆ.

ಪೊಲೀಸರು ಕಿಶನ್‌ಲಾಲ್ ಮತ್ತು ಭವನ್ ದಾಸ್ ಎನ್ನುವ ಆರೋಪಿಗಳನ್ನು ಬಂಧಿಸಿದ್ದು, ಆರೋಪಿ ಯುವಕ ಮಾತ್ರ ಪರಾರಿಯಾಗಿದ್ದಾನೆ. ಆತನ ಬಂಧನಕ್ಕೆ ಜಾಲ ಬೀಸಲಾಗಿದೆ ಎಂದು ಹಿರಿಯ ಪೊಲೀಸ್ ಅಧಿಕಾರಿಗಳು ತಿಳಿಸಿದ್ದಾರೆ.

ತಾಜಾ ಸುದ್ದಿಗಳಿಗಾಗಿ ವೆಬ್ ದುನಿಯಾ ಮೊಬೈಲ್ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ.