ತಮಗೆ ಮನೆಯಿಂದ ತರಲಾದ ಆಹಾರ ಸೇವಿಸಲು ಅನುಮತಿ ನೀಡಬೇಕೆಂದು ಶಶಿಕಲಾ ಇಟ್ಟಿದ್ದ ಬೇಡಿಕೆಯನ್ನು ಕೋರ್ಟ್ ನಿನ್ನೆ ನಿರಾಕರಿಸಿತ್ತು. ನಿನ್ನೆ ಅವರಿಗೆ ಜೈಲಿನಲ್ಲಿ ತಯಾರಾದ ಊಟವನ್ನೇ ನೀಡಲಾಯ್ತು. ಮೊದಲು ಊಟ ಮಾಡಲು ನಿರಾಕರಿಸಿದ ಅವರು ಇಳವರಸಿ ಒತ್ತಾಯದ ಮೇರೆಗೆ 8 ಗಂಟೆ ಸುಮಾರಿಗೆ ಊಟ ಮಾಡಿದರು ಎನ್ನಲಾಗುತ್ತಿದೆ. ಆದರೆ ಕೆಲ ಮೂಲಗಳ ಪ್ರಕಾರ ಅವರು ನಿನ್ನೆ ಊಟವನ್ನು ಸೇವಿಸಿಲ್ಲ.
ಸಾಮಾನ್ಯ ಕೈದಿಗಳಿಗೆ ನೀಡಲಾಗುವ ಊಟವನ್ನೇ ಶಶಿಕಲಾ, ಇಳವರಸಿ ಮತ್ತು ಸುಧಾಕರನ್ ಅವರಿಗೆ ನೀಡಲಾಗಿತ್ತು. ಶಶಿಕಲಾ ಮತ್ತು ಇಳವರಸಿ ಒಂದೇ ಜೈಲಿನಲ್ಲಿದ್ದು ಇಬ್ಬರಿಗೂ ಜೈಲಿನ ಸಮವಸ್ತ್ರವನ್ನು ನೀಡಲಾಯಿತು. ಇಳವರಸಿ ಸಮವಸ್ತ್ರವನ್ನು ಧರಿಸಿದರೆ ಶಶಿಕಲಾ ಗುರುವಾರ ( ಇಂದು) ಧರಿಸುವುದಾಗಿ ಹೇಳಿ ತಾವುಟ್ಟುಕೊಂಡು ಬಂದ ಸೀರೆಯಲ್ಲಿಯೇ ರಾತ್ರಿ ಕಳೆದಿದ್ದಾರೆ.