ವೀಕ್ಷಕರ ವಿರುದ್ಧ ಉರಿದು ಬಿದ್ದ ಜೊತೆ ಜೊತೆಯಲಿ ಧಾರವಾಹಿ ನಟಿ ಮೀರಾ ಹೆಗ್ಡೆ

ಬೆಂಗಳೂರು: ಧಾರವಾಹಿಯ ಖಳನಟ-ನಟಿಯರೆಂದರೆ ಪ್ರೇಕ್ಷಕರು ಅವರನ್ನು ನಿಜವಾಗಿಯೂ ಕೆಟ್ಟವರೇನೋ ಎಂಬಂತೆ ನೋಡುತ್ತಾರೆ. ಜೀ ಕನ್ನಡದಲ್ಲಿ ಪ್ರಸಾರವಾಗುವ ಸೆನ್ಸೇಷನಲ್ ಧಾರವಾಹಿ ಜೊತೆ ಜೊತೆಯಲಿ ವಿಲನ್ ಪಾತ್ರಧಾರಿ ಮೀರಾ ಹೆಗ್ಡೆ ಅಲಿಯಾಸ್ ನಟಿ ಮಾನಸಾ ಮನೋಹರ್ ಸ್ಥಿತಿಯೂ ಇದಕ್ಕಿಂತ ಭಿನ್ನವಲ್ಲ.

ಕಳೆದ ಮೂರು ನಾಲ್ಕು ಸಂಚಿಕೆಗಳಲ್ಲಿ ಪಾತ್ರದ ಮೂಲಕ ಪ್ರೇಕ್ಷಕರ ಕೆಂಗಣ್ಣಿಗೆ ಗುರಿಯಾದ ಮೀರಾ ಹೆಗ್ಡೆ ಸಾಮಾಜಿಕ ಜಾಲತಾಣದಲ್ಲಿ ಹಿಗ್ಗಾ ಮುಗ್ಗಾ ಟೀಕೆಗೊಳಗಾಗಿದ್ದರು. ಆಕೆಯ ಪಾತ್ರದ ಬಗ್ಗೆ ಕೆಟ್ಟದಾಗಿ ಕಾಮೆಂಟ್ ಮಾಡಿದ್ದು ನಟಿಗೆ ಬೇಸರವುಂಟು ಮಾಡಿದೆ.

ಇದೇ ಕಾರಣಕ್ಕೆ ತಮ್ಮ ಸಾಮಾಜಿಕ ಜಾಲತಾಣದಲ್ಲಿ ‘ನನ್ನ ಬಗ್ಗೆ ನೆಗೆಟಿವ್ ಕಾಮೆಂಟ್ ಮಾಡಿದವರ ಬಗ್ಗೆ ನಾನು ಹೆಚ್ಚು ಯೋಚಿಸಲ್ಲ. ಯಾಕೆಂದರೆ ಅವರಿಗೆ ಬೇರೆ ಕೆಲಸವಿಲ್ಲ’ ಎಂದು ಖಾರವಾಗಿ ಬರೆದಿದ್ದರು. ಇದರಿಂದ ಕಿಡಿ ಕಿಡಿಯಾದ ಅಭಿಮಾನಿಗಳು ಇಷ್ಟು ದಿನ ನಿಮ್ಮನ್ನು ಬೆಂಬಲಿಸಿದ್ದಕ್ಕೂ ಸಾರ್ಥಕವಾಯಿತು. ನಮಗೂ ಮಾಡಲು ಕೆಲಸವಿದೆ. ನಾವು ನಿಮ್ಮ ಪಾತ್ರವನ್ನು ಟೀಕಿಸಿದ್ದೆವೇ ಹೊರತು, ವೈಯಕ್ತಿಕವಾಗಿ ನಿಮ್ಮನ್ನು ಟೀಕಿಸಿರಲಿಲ್ಲ. ನೀವು ಅಭಿಮಾನಿಗಳಿಗೆ ಅವಮಾನ ಮಾಡಿದಿರಿ. ಇನ್ನು ಮುಂದೆ ಜೊತೆ ಜೊತೆಯಲಿ ಧಾರವಾಹಿ ನೋಡಲ್ಲ ಎಂದು ಹಲವರು ಕಾಮೆಂಟ್ ಮಾಡಿದ್ದಾರೆ.

ಈ ಕೆಸರೆರಚಾಟ ತೀವ್ರವಾಗುತ್ತಿದ್ದಂತೇ ಎಚ್ಚೆತ್ತುಕೊಂಡ ನಟಿ ಮಾನಸ ತಮ್ಮ ಇನ್ ಸ್ಟಾಗ್ರಾಂನಲ್ಲಿ ಬರೆದುಕೊಂಡಿದ್ದ ವಿವಾದಾತ್ಮಕ ಕಾಮೆಂಟ್ ಡಿಲೀಟ್ ಮಾಡಿದ್ದಾರೆ.