ಇಲ್ಲಿ ನಡೆದ ಚೆನ್ನೈ ಓಪನ್ ಟೆನಿಸ್ ಟೂರ್ನಮೆಂಟ್‌ನ ಡಬಲ್ಸ್ ಕಿರೀಟವನ್ನು ಬಗಲಿಗೇರಿಸಿದ ನಂತರ ಪ್ರತಿಕ್ರಿಯೆ ನೀಡಿರುವ ಲಿಯಾಂಡರ್ ಪೇಸ್, ಚೆನ್ನೈ ನಮ್ಮ ಫೆವರೀಟ್ ತಾಣ ಎಂದಿದ್ದಾರೆ.
ಅಭಿಮಾನಿಗಳ ಬೆಂಬಲವಂತೂ ಅದ್ಭುತವಾಗಿತ್ತು. ಇದು ನಮ್ಮ ಗೆಲುವಿಗೆ ನೆರವಾಗಿತ್ತು. ನಾವಿಲ್ಲಿ ಅನೇಕ ಪ್ರಶಸ್ತಿಗಳನ್ನು ಗೆದ್ದುಕೊಂಡಿದ್ದೇವೆ ಎಂದು ಐದನೇ ಬಾರಿಗೆ ಇಲ್ಲಿ ಜಯಗಳಿಸಿದ ಪೇಸ್ ನುಡಿದರು.
ಮತ್ತೆ ಜತೆಯಾಗಿ ಆಡಲು ನಿರ್ಧರಿಸಿದ್ದ ಪೇಸ್-ಭೂಪತಿ ಜೋಡಿ ಫೈನಲ್‌ಲ್ಲಿ ಹಾಲೆಂಡ್-ಅಮೆರಿಕಾ ಜೋಡಿ ರಾಬಿನ್ ಹಸ್ಸೆ ಮತ್ತು ಡೇವಿಡ್ ಮಾರ್ಟಿನ್‌ರನ್ನು 6-2, 6-7 (3), 10-7ರ ಕಠಿಣ ಅಂತರದಲ್ಲಿ ಮಣಿಸುವ ಮೂಲಕ ಪ್ರಶಸ್ತಿ ಗೆದ್ದುಕೊಂಡಿದ್ದರು.
ಇದು ತಂಡದ ಸಾಧನೆ. ಒಂದು ಹಂತದಲ್ಲಿ ಎದುರಾಳಿಗಳು ಚೆನ್ನಾಗಿ ಆಡುತ್ತಿದ್ದರು. ಆದರೆ ನಾವು ಒಬ್ಬರನೊಬ್ಬರು ನೆರವಾಗುವ ಮೂಲಕ ತಿರುಗೇಟು ನೀಡುವಲ್ಲಿ ಯಶಸ್ವಿಯಾದೆವು ಎಂದರು.
ಮೊದಲ ಸೆಟ್ ಸುಲಭವಾಗಿ ವಶಪಡಿಸಿಕೊಂಡಿದ್ದರೂ ಭಾರತೀಯ ಎಕ್ಸ್‌ಪ್ರೆಸ್‌ಗೆ ದ್ವಿತೀಯ ಸುತ್ತಿನಲ್ಲಿ ರಾಬಿನ್-ಹಸ್ಸೆ ಜೋಡಿ ತಿರುಗೇಟು ನೀಡಿದ್ದರು. ಇದರಿಂದಾಗಿ ಪಂದ್ಯ ನಿರ್ಣಾಯಕ ಟ್ರೈ-ಬ್ರೇಕರ್ ತನಕ ಸಾಗುವಂತಾಗಿತ್ತು.
ಟ್ರೈಬ್ರೇಕರ್‌ನಲ್ಲಿ ನಮ್ಮ ಟೆನಿಸ್‌ನ ಗುಣಮಟ್ಟ ನಿಜಕ್ಕೂ ಹೆಚ್ಚಿತ್ತು. ಕೆಲವೊಂದು ಬಾರಿ ಪರಿಸ್ಥಿತಿ ಕಳೆದುಕೊಂಡಿದ್ದರೂ ತಿರುಗಿ ಬೀಳುವಲ್ಲಿ ಯಶಸ್ವಿಯಾದೆವು ಎಂದವರು ಸೇರಿಸಿದರು.
ಮುಂಬರುವ ಆಸ್ಟ್ರೇಲಿಯನ್ ಓಪನ್‌ನಲ್ಲೂ ಲೀ-ಹೇಶ್ ಜೋಡಿ ಜತೆಯಾಗಿ ಆಡಲಿದ್ದಾರೆ. ಈ ಪ್ರತಿಷ್ಠಿತ ಟೂರ್ನಮೆಂಟ್ ಜನವರಿ 17ರಿಂದ ಆರಂಭವಾಗಲಿದೆ.
ಮತ್ತೊಂದೆಡೆ ಮುಂಬರುವ ಗ್ರಾಂಡ್ ಸ್ಲಾಮ್ ಟೂರ್ನಿನಲ್ಲಿ ಉತ್ತಮ ಪ್ರದರ್ಶನ ಪ್ರದರ್ಶನ ನೀಡುವ ವಿಶ್ವಾಸವನ್ನು ಮಹೇಶ್ ಭೂಪತಿ ವ್ಯಕ್ತಪಡಿಸಿದ್ದಾರೆ. ನಾವು ಆಡಿದ ಎಲ್ಲ ನಾಲ್ಕು ಪಂದ್ಯಗಳಳನ್ನು ಕಷ್ಟಪಟ್ಟು ಗೆದ್ದಿದ್ದೇವೆ. ನಮ್ಮಿಂದ ಉತ್ತಮ ಆಟ ಹೊರಬಂದಿಲ್ಲ. ಅನೇಕ ತಪ್ಪುಗಳನ್ನು ಎಸಗಿದ್ದೇವೆ. ನಾವೀಗಲೂ ಪರಿಪೂರ್ಣರಾಗಿಲ್ಲ. ಹೀಗಾಗಿ ನಾನು ಮುಂಬೈಗೆ ಹೋಗುತ್ತಿಲ್ಲ. ಕಠಿಣ ಅಭ್ಯಾಸದತ್ತ ಗಮನ ಹರಿಸುತ್ತೇನೆ ಎಂದವರು ಹೇಳಿದರು.
