ಅಹಮ್ಮದಾಬಾದ್: ಐಪಿಎಲ್ 2024 ರಲ್ಲಿ ಪ್ಲೇ ಆಫ್ ರೇಸ್ ನಲ್ಲಿ ಉಳಿಯಲು ಗುಜರಾತ್ ಟೈಟನ್ಸ್ ಗೆ ಇಂದು ಕೋಲ್ಕೊತ್ತಾ ನೈಟ್ ರೈಡರ್ಸ್ ವಿರುದ್ಧದ ಪಂದ್ಯ ಕೊನೆಯ ಅವಕಾಶವಾಗಿದೆ.
ಗುಜರಾತ್ ಟೈಟನ್ಸ್ ಆರಂಭ ಉತ್ತಮವಾಗಿದ್ದರೂ ನಡುವೆ ಸತತವಾಗಿ ಪಂದ್ಯಗಳನ್ನು ಸೋತು ಬೇಗನೇ ಈ ಐಪಿಎಲ್ ನಿಂದ ಹೊರಬೀಳುವ ಅಪಾಯದಲ್ಲಿತ್ತು. ಆದರೆ ಕಳೆದ ಪಂದ್ಯದಲ್ಲಿ ಸೂಕ್ತ ಸಮಯದಲ್ಲೇ ಚೆನ್ನೈ ಸೂಪರ್ ಕಿಂಗ್ಸ್ ನ್ನು ಮಣಿಸಿದ ಗುಜರಾತ್ ಪ್ಲೇ ಆಫ್ ಕನಸು ಜೀವಂತವಾಗಿಟ್ಟಿದೆ.
ಕಳೆದ ಪಂದ್ಯದಲ್ಲಿ ಗುಜರಾತ್ ಬ್ಯಾಟಿಗರು ಆಡಿದ ಪರಿ ತಂಡದ ಆತ್ಮವಿಶ್ವಾಸ ಹೆಚ್ಚಿಸಿರುತ್ತದೆ. ಒಟ್ಟು 12 ಪಂದ್ಯಗಳನ್ನಾಡಿರುವ ಗುಜರಾತ್ ಈಗ 5 ಗೆಲುವುಗಳೊಂದಿಗೆ 10 ಅಂಕ ಸಂಪಾದಿಸಿದೆ. ಪ್ಲೇ ಆಫ್ ಗೇರುವ ಹಾದಿ ಕಷ್ಟವೇ ಆಗಿದ್ದರೂ ಬೇಗನೇ ಸೋಲಲ್ಲ ಎಂದು ಈಗಾಗಲೇ ತಂಡ ತೋರಿಸಿಕೊಟ್ಟಿದೆ.
ಇತ್ತ ಕೆಕೆಆರ್ ಗೆ ಈ ಪಂದ್ಯ ಔಪಚಾರಿಕವಾಗಿದೆ. ಈಗಾಗಲೇ ಪ್ಲೇ ಆಫ್ ಗೆ ಒಂದು ಕಾಲಿಟ್ಟಿರುವ ಕೋಲ್ಕೊತ್ತಾ ತಂಡಕ್ಕೆ ಉಳಿದ ಎಲ್ಲಾ ಲೀಗ್ ಪಂದ್ಯಗಳನ್ನು ಸೋತರೂ ಚಿಂತೆಯಿಲ್ಲ. ಸದ್ಯಕ್ಕೆ ಕೆಕೆಆರ್ ಅತ್ಯುತ್ತಮ ಫಾರ್ಮ್ ನಲ್ಲಿದ್ದು, ಈ ಬಾರಿ ಕಪ್ ಗೆಲ್ಲುವ ಫೇವರಿಟ್ ತಂಡಗಳಲ್ಲಿ ಒಂದಾಗಿದೆ. ಈ ಪಂದ್ಯ ಸಂಜೆ 7.30 ಕ್ಕೆ ಆರಂಭವಾಗುವುದು.
