ಅಹಮ್ಮದಾಬಾದ್: ಐಪಿಎಲ್ 2024 ರಲ್ಲಿ ಇಂದು ಎಲ್ಲರೂ ಕುತೂಹಲದಿಂದ ವೀಕ್ಷಿಸುತ್ತಿರುವ ಗುಜರಾತ್ ಟೈಟನ್ಸ್ ಮತ್ತು ಮುಂಬೈ ಇಂಡಿಯನ್ಸ್ ನಡುವಿನ ಪಂದ್ಯ ನಡೆಯಲಿದೆ.
ಗುಜರಾತ್ ಟೈಟನ್ಸ್ ಕಳೆದ ಎರಡು ಆವೃತ್ತಿಗಳಲ್ಲಿ ಹಾರ್ದಿಕ್ ಪಾಂಡ್ಯ ನೇತೃತ್ವದಲ್ಲಿ ಕಣಕ್ಕಿಳಿದು ಎರಡೂ ಬಾರಿಯೂ ಫೈನಲ್ ಪ್ರವೇಶಿಸಿತ್ತು. ಆದರೆ ಈಗ ಹಾರ್ದಿಕ್ ಗುಜರಾತ್ ಬಿಟ್ಟು ಮುಂಬೈ ತಂಡದ ನಾಯಕತ್ವ ವಹಿಸಿಕೊಂಡಿದ್ದಾರೆ. ಮುಂಬೈ ಇಂಡಿಯನ್ಸ್ ತನ್ನ ಯಶಸ್ವೀ ನಾಯಕ ರೋಹಿತ್ ಶರ್ಮಾ ಕೈ ಬಿಟ್ಟು ಈಗ ಅವರನ್ನು ಕೇವಲ ಆಟಗಾರನಾಗಿ ಬಳಸಿಕೊಳ್ಳುತ್ತಿದೆ. ತಂಡದೊಳಗೆ ಈ ಬದಲಾವಣೆಯಿಂದಾಗಿ ಅಸಮಾಧಾನಗಳ ವದಂತಿಗಳ ಬೆನ್ನಲ್ಲೇ ಈ ಎರಡು ಪ್ರಮುಖ ತಂಡಗಳು ಮುಖಾಮುಖಿಯಾಗುತ್ತಿದೆ.
ರೋಹಿತ್ ಶರ್ಮಾ, ಜಸ್ಪ್ರೀತ್ ಬುಮ್ರಾ, ಹಾರ್ದಿಕ್ ಪಾಂಡ್ಯ, ತಿಲ‍ಕ್ ವರ್ಮ, ಇಶಾನ್ ಕಿಶನ್, ಟಿಮ್ ಡೇವಿಡ್ ರಂತಹ ಘಟಾನುಘಟಿಗಳನ್ನು ಹೊಂದಿದ ಮುಂಬೈ ಇಂಡಿಯನ್ಸ್ ಮೇಲ್ನೋಟಕ್ಕೆ ಫೇವರಿಟ್ ಎನಿಸುತ್ತದೆ. ಈ ಬಾರಿ ಹೊಸ ನಾಯಕತ್ವದಲ್ಲಿ ಮುಂಬೈ ಪ್ರದರ್ಶನ ಹೇಗಿರಲಿದೆ ಎಂದು ನೋಡಬೇಕಿದೆ.
ಇತ್ತ ಗುಜರಾತ್ ತಂಡವನ್ನು ಇದೇ ಮೊದಲ ಬಾರಿಗೆ ನಾಯಕರಾಗಿರುವ ಶುಬ್ಮನ್ ಗಿಲ್ ಮುನ್ನಡೆಸುತ್ತಿದ್ದಾರೆ. ಕಳೆದ ಎರಡೂ ಆವೃತ್ತಿಗಳಲ್ಲಿ ಗಿಲ್ ಏಕಾಂಗಿಯಾಗಿ ಗುಜರಾತ್ ಬ್ಯಾಟಿಂಗ್ ಹೊಣೆ ಹೆಗಲಿಗೇರಿಸಿದ್ದರು. ಆದರೆ ಈ ಬಾರಿ ನಾಯಕತ್ವದ ಹೊಣೆಯೂ ಇರುವುದರಿಂದ ಅವರ ಪ್ರದರ್ಶನ ಹೇಗಿರುತ್ತದೆ ಎಂದು ನೋಡಬೇಕಿದೆ. ಅಲ್ಲದೆ, ಅನುಭವಿ ವೇಗಿ ಮೊಹಮ್ಮದ್ ಶಮಿ ಅನುಪಸ್ಥಿತಿಯೂ ತಂಡಕ್ಕೆ ಕಾಡಲಿದೆ. ಈ ಪಂದ್ಯ ಸಂಜೆ 7.30 ಕ್ಕೆ ಆರಂಭವಾಗಲಿದೆ.
