ಮುಂಬೈ: ಟೀಂ ಇಂಡಿಯಾ ಸ್ಟಾರ್ ಕ್ರಿಕೆಟಿಗ ವಿರಾಟ್ ಕೊಹ್ಲಿ ಮಹಿಳಾ ಅಭಿಮಾನಿಯೊಬ್ಬರ ವರ್ತನೆಯಿಂದ ಗಲಿಬಿಲಿಗೊಂಡರೂ ಕೊನೆಗೆ ನಗು ನಗುತ್ತಲೇ ಸೆಲ್ಫೀಗೆ ಪೋಸ್ ಕೊಟ್ಟ ಘಟನೆಯೊಂದು ನಡೆದಿದ್ದು, ಈ ವಿಡಿಯೋ ಈಗ ವೈರಲ್ ಆಗಿದೆ.
ಪತ್ನಿ ಅನುಷ್ಕಾ ಶರ್ಮಾ ಜೊತೆಗೆ ಕೊಹ್ಲಿ ಮುಂಬೈನಲ್ಲಿ ಕಾಲ ಕಳೆಯುತ್ತಿದ್ದಾರೆ. ಬಿಡುವಿನ ಸಮಯದಲ್ಲಿ ಕೊಹ್ಲಿ ಪತ್ನಿ ಜೊತೆ ರೆಸ್ಟೋರೆಂಟ್ ಒಂದಕ್ಕೆ ಬಂದಿದ್ದಾರೆ. ಈ ವೇಳೆ ಎಂದಿನಂತೆ ಅವರನ್ನು ಪಪ್ಪಾರಾಜಿಗಳು ಫೋಟೋಗೆ ಪೋಸ್ ಕೊಡಲು ಕೇಳಿಕೊಂಡಿದ್ದಾರೆ.
ಅದರಂತೆ ಕೊಹ್ಲಿ ಎಲ್ಲರಿಗೂ ನಗು ನಗುತ್ತಲೇ ಪತ್ನಿಯ ಕೈ ಹಿಡಿದು ಪೋಸ್ ಕೊಟ್ಟಿದ್ದಾರೆ. ಇದಾದ ಬಳಿಕ ಅನುಷ್ಕಾ ಒಳಗೆ ಹೋಗಿದ್ದಾರೆ. ಆದರೆ ಕೊಹ್ಲಿಯನ್ನು ಓರ್ವ ಮಹಿಳಾ ಅಭಿಮಾನಿ ಕೈ ಹಿಡಿದು ಎಳೆದು ತಡೆದು ನಿಲ್ಲಿಸಿದ್ದಾರೆ. ತನ್ನ ಕೈ ಹಿಡಿದ ಮಹಿಳಾ ಅಭಿಮಾನಿಯನ್ನು ನೋಡಿ ಕೊಹ್ಲಿ ಗಲಿಬಿಲಿಗೊಂಡರು.
ಆದರೂ ಮಹಿಳೆ ಮಾತ್ರ ಕೊಹ್ಲಿಯ ಕೈ ಬಿಡದೇ ಹಿಡಿದುಕೊಂಡೇ ಸೆಲ್ಫೀ ತೆಗೆಯಲು ಯತ್ನಿಸಿದರು. ಆದರೆ ಸಾಧ್ಯವಾಗದೇ ಇದ್ದಾಗ ಎದುರು ಇದ್ದವರ ಕೈಗೆ ಕ್ಯಾಮರಾ ಕೊಟ್ಟರು. ಆಗಲೂ ಕೊಹ್ಲಿಯ ಕೈ ಬಿಟ್ಟಿರಲಿಲ್ಲ. ಕೊಹ್ಲಿ ಮಾತ್ರ ಪದೇ ಪದೇ ಒಳಗೆ ಹೋದ ಅನುಷ್ಕಾರನ್ನು ನೋಡುತ್ತಲೇ ಇದ್ದರು. ಈ ವಿಡಿಯೋ ಈಗ ವೈರಲ್ ಆಗಿದೆ.
