ಮುಂಬೈ: ಐಪಿಎಲ್ 2022 ರ ಇಂದಿನ ಮೊದಲ ಪಂದ್ಯದಲ್ಲಿ ರೋಹಿತ್ ಶರ್ಮಾ ನೇತೃತ್ವದ ಮುಂಬೈ ಇಂಡಿಯನ್ಸ್, ರಿಷಬ್ ಪಂತ್ ನೇತೃತ್ವದ ಡೆಲ್ಲಿ ಕ್ಯಾಪಿಟಲ್ಸ್ ತಂಡವನ್ನು ಎದುರಿಸಲಿದೆ.
ರೋಹಿತ್ ಶರ್ಮಾ ನೇತೃತ್ವದ ಮುಂಬೈ ಇಂಡಿಯನ್ಸ್ ಗೆ ಕಳೆದ ಐಪಿಎಲ್ ನೀರಸವಾಗಿತ್ತು. ನಾಕೌಟ್ ಹಂತಕ್ಕೇರಲು ಮುಂಬೈ ವಿಫಲವಾಗಿತ್ತು. ಸೂರ್ಯಕುಮಾರ್, ಇಶಾನ್ ಫಾರ್ಮ್ ಕಳೆದುಕೊಂಡಿದ್ದು ತಂಡಕ್ಕೆ ದೊಡ್ಡ ಹೊಡೆತ ನೀಡಿತ್ತು. ಆದರೆ ಈ ಬಾರಿ ಬ್ಯಾಟಿಂಗ್ ಸುಧಾರಿಸಬಹುದೆಂಬ ವಿಶ್ವಾಸವಿದೆ.
ಇನ್ನು, ರಿಷಬ್ ಪಂತ್ ಬಳಗಕ್ಕೆ ಶಿಖರ್ ಧವನ್ ಅನುಪಸ್ಥಿತಿಯಿದ್ದರೂ ಡೇವಿಡ್ ವಾರ್ನರ್ ಆರಂಭಿಕರಾಗಿ ಆ ಕೊರತೆ ತುಂಬಲಿದ್ದಾರೆ. ಬೌಲಿಂಗ್ ನಲ್ಲಿ ಲುಂಗಿ ನಿಗಿಡಿ, ಶ್ರಾದ್ಧೂಲ್ ಠಾಕೂರ್, ಅಕ್ಸರ್ ಪಟೇಲ್ ಬಲ ತುಂಬಲಿದ್ದಾರೆ. ಹೀಗಾಗಿ ಜಿದ್ದಾಜಿದ್ದಿನ ಪಂದ್ಯ ನಿರೀಕ್ಷಿಸಬಹುದು. ಈ ಪಂದ್ಯ ಮಧ್ಯಾಹ್ನ 3.30 ಕ್ಕೆ ಆರಂಭವಾಗಲಿದೆ.
