ಬೆಂಗಳೂರು: ಬಿಗ್ ಬಾಸ್ ಕನ್ನಡ ಸೀಸನ್ 11 ಮುಗಿಯುತ್ತಾ ಬಂದಿದ್ದು ಏನೇ ಲೆಕ್ಕಾಚಾರ ಮಾಡಿದರೂ ಈ ಬಾರಿಯೂ ಪುರುಷರೇ ಬಿಗ್ ಬಾಸ್ ಗೆಲ್ಲುವುದು ಬಹುತೇಕ ಖಚಿತವಾಗಿದೆ.
ಬಿಗ್ ಬಾಸ್ ಕನ್ನಡ ಇತಿಹಾಸದಲ್ಲಿ ಒಮ್ಮೆ ಮಾತ್ರ ಮಹಿಳಾ ಸ್ಪರ್ಧಿ ಗೆದ್ದಿದ್ದರು. ಅದು ಹಿರಿಯ ನಟಿ ಶ್ರುತಿ. ಅವರನ್ನು ಬಿಟ್ಟರೆ ಇದುವರೆಗೆ ಎಲ್ಲಾ 10 ಸೀಸನ್ ಗಳಲ್ಲೂ ಪುರುಷ ಅಭ್ಯರ್ಥಿಗಳೇ ಗೆದ್ದಿದ್ದಾರೆ.
ಈ ಬಗ್ಗೆ ಕೆಲವು ಮಹಿಳಾ ಅಭಿಮಾನಿಗಳಲ್ಲಿ ಅಸಮಾಧಾನವೂ ಇದೆ. ಮಹಿಳಾ ಸ್ಪರ್ಧಿಗಳ ಪೈಕಿ ಸ್ಟ್ರಾಂಗ್ ಅಭ್ಯರ್ಥಿಗಳನ್ನು ಕಳುಹಿಸಲ್ಲ, ಮಹಿಳೆಯರು ಗುಂಪುಗಾರಿಕೆ ಮಾಡಿಕೊಂಡೇ ಸೋಲುತ್ತಾರೆ, ಮಹಿಳೆಯರನ್ನು ಹೆಚ್ಚು ಪ್ರಮೋಟ್ ಮಾಡಲ್ಲ ಎಂದೆಲ್ಲಾ ದೂರುಗಳಿವೆ.
ಅದೇನೇ ಇದ್ದರೂ ಈ ಬಾರಿಯಾದರೂ ಮಹಿಳಾ ಅಭ್ಯರ್ಥಿಗಳು ಗೆಲ್ಲುವ ಕನಸು ನನಸಾಗುವ ಸಾಧ್ಯತೆ ಕ್ಷೀಣವಾಗಿದೆ. ಮಹಿಳಾ ಸ್ಪರ್ಧಿಗಳ ಪೈಕಿ ಈ ಬಾರಿ ಹೆಚ್ಚು ಸದ್ದು ಮಾಡುತ್ತಿದ್ದವರಲ್ಲಿ ಚೈತ್ರಾ ಕುಂದಾಪುರ, ಗೌತಮಿ, ಭವ್ಯಾ, ಮೋಕ್ಷಿತಾ ಇದ್ದರು. ಈ ಪೈಕಿ ಚೈತ್ರಾ ಹೊರ ಹೋಗಿದ್ದಾರೆ. ಇನ್ನು ಗೌತಮಿಯನ್ನೂ ಮನೆಯಿಂದ ಹೊರಹಾಕುವುದಕ್ಕೆ ಅತೀ ಹೆಚ್ಚು ಜನ ವೋಟ್ ಮಾಡಿದ್ದಾರೆ.
ಭವ್ಯಾ ಈಗಾಗಲೇ ಜನರ ಅಸಮಾಧಾನಕ್ಕೆ ಕಾರಣವಾಗಿದ್ದಾರೆ. ಮೋಕ್ಷಿತಾ ಜೊತೆ ಗುಂಪುಗಾರಿಕೆ ಮಾಡಿದರು, ತ್ರಿವಿಕ್ರಮ್ ಗೆ ಮೋಸ ಮಾಡಿದರು ಎಂದೆಲ್ಲಾ ಕೆಲವು ವರ್ಗದ ವೀಕ್ಷಕರಿಗೆ ಅವರ ಮೇಲೆ ಅಸಮಾಧಾನಗಳಿವೆ. ಮೋಕ್ಷಿತಾಗೆ ಫೈನಲ್ ಗೆಲ್ಲುವಷ್ಟು ವೋಟ್ ಪವರ್ ಇಲ್ಲ. ಹೀಗಾಗಿ ಈ ಬಾರಿಯೂ ಪುರುಷ ಅಭ್ಯರ್ಥಿಗಳೇ ಗೆಲ್ಲುವುದು ಬಹುತೇಕ ಖಚಿತವಾಗಿದೆ.
