ಬೆಂಗಳೂರು: ಕಾಂತಾರ ಚಾಪ್ಟರ್ 1 ಸಿನಿಮಾ ಯಶಸ್ಸಿಗಾಗಿ ರಿಷಬ್ ಶೆಟ್ಟಿ ಗೆಳೆಯರಾದ ರಕ್ಷಿತ್ ಶೆಟ್ಟಿ, ರಾಜ್ ಬಿ ಶೆಟ್ಟಿ ಫಾರ್ಮುಲಾ ಮೊರೆ ಹೋಗಿದ್ದಾರೆ.
ಕಾಂತಾರ ಚಾಪ್ಟರ್ 1 ಸಿನಿಮಾ ಬಿಡುಗಡೆಗೆ ಇನ್ನು ಕೆಲವೇ ದಿನ ಬಾಕಿಯಿದೆ. ಅಕ್ಟೋಬರ್ 2 ರಂದು ಸಿನಿಮಾ ವಿಶ್ವದಾದ್ಯಂತ ಬಿಡುಗಡೆಯಾಗಲಿದೆ. ಆದರೆ ಇದುವರೆಗೆ ಚಿತ್ರದ ಪ್ರಮೋಷನ್ ಕೂಡಾ ಆರಂಭವಾಗಿಲ್ಲ. ಇದರ ನಡುವೆ ಸಕ್ಸಸ್ ಗಾಗಿ ರಿಷಬ್ ಮಾಡಿಕೊಂಡಿರುವ ಪ್ಲ್ಯಾನ್ ಬಯಲಾಗಿದೆ.
ಕಾಂತಾರ ಬಿಡುಗಡೆಗೆ ಮೂರು ದಿನ ಮೊದಲೇ ದೇಶದ ಪ್ರಮುಖ ನಗರಗಳಲ್ಲಿ ಪೇಯ್ಡ್ ಪ್ರೀಮಿಯರ್ ಶೋ ಆಯೋಜಿಸಲು ಹೊಂಬಾಳೆ ಫಿಲಂಸ್ ಪ್ಲ್ಯಾನ್ ಮಾಡಿಕೊಂಡಿದೆ. ಇದರಿಂದ ಸಿನಿಮಾ ಬಗ್ಗೆ ಶ್ರಮವಿಲ್ಲದೇ ಪ್ರಚಾರ ಸಿಕ್ಕಂತಾಗುತ್ತದೆ.
ರಕ್ಷಿತ್ ಶೆಟ್ಟಿ ಈ ಹಿಂದೆ ಚಾರ್ಲಿ ಸಿನಿಮಾ ಪ್ರಚಾರ ಮಾಡಿದ್ದೂ ಇದೇ ರೀತಿ. ರಾಜ್ ಬಿ ಶೆಟ್ಟಿ ಕೂಡಾ ಮೊನ್ನೆಯಷ್ಟೇ ಸು ಫ್ರಮ್ ಸೋ ಸಿನಿಮಾ ಪ್ರಚಾರ ಮಾಡಿದ್ದೂ ಇದೇ ರೀತಿ. ಸು ಫ್ರಮ್ ಸೋ ಸಿನಿಮಾ ಬಿಡುಗಡೆಗೆ ಮೊದಲು ರಾಜ್ ಬಿ ಶೆಟ್ಟಿ ಊರೂರು ತಿರುಗಿ ನಮ್ಮ ಸಿನಿಮಾ ನೋಡಿ ಎಂದು ಕೇಳಲಿಲ್ಲ.
ಆದರೆ ಪೇಯ್ಡ್ ಪ್ರೀಮಿಯರ್ ಶೋಗಳೇ ಜನರ ಬಾಯಿಂದ ಬಾಯಿಗೆ ಸಿನಿಮಾ ಬಗ್ಗೆ ಉತ್ತಮ ಅಭಿಪ್ರಾಯ ಹರಡುವಂತೆ ಮಾಡಿತ್ತು. ಇದೀಗ ರಿಷಬ್ ಕೂಡಾ ಪ್ರಮೋಷನ್ ಗಾಗಿ ಓಡಾಟ ಶುರು ಮಾಡಿಲ್ಲ. ಅದರ ಬದಲು ಪ್ರೀಮಿಯರ್ ಶೋಗಳನ್ನು ಆಯೋಜಿಸುವ ಮೂಲಕ ಚಿತ್ರದ ಪ್ರಚಾರ ಪಡೆಯಲು ತೀರ್ಮಾನಿಸಿದ್ದಾರೆ. ಇದಕ್ಕಾಗಿ ಬೆಂಗಳೂರು, ದೆಹಲಿ, ಮುಂಬೈ, ಚೆನ್ನೈ ಎಂದು ಪ್ರಮುಖ ನಗರಗಳಲ್ಲಿ ಪ್ರೀಮಿಯರ್ ಶೋ ಆಯೋಜನೆಯಾಗಲಿದೆ.
