ಬೆಂಗಳೂರು: ಅಗ್ನಿಸಾಕ್ಷಿ ಸೀರಿಯಲ್‌ನಲ್ಲಿ ತನು ಪಾತ್ರದಲ್ಲಿ ಜನಮನ್ನಣೆ ಗಳಿಸಿ ತೆಲುಗು ಕಿರುತೆರೆಗೆ ಹಾರಿದ ನಟಿ ಶೋಭಾ ಶೆಟ್ಟಿ ಇಂದು ತಮ್ಮ ಬಹುಕಾಲದ ಗೆಳೆಯ ನಟ ಯಶವಂತ್ ರೆಡ್ಡಿ ಜತೆ ನಿಶ್ಚಿತಾರ್ಥ ಮಾಡಿಕೊಂಡರು.
ಕನ್ನಡದಲ್ಲಿ ತನು ಪಾತ್ರದಲ್ಲಿ ತುಂಬಾನೇ ಮೆಚ್ಚುಗೆ ಗಳಿಸಿದ ಶೋಭಾ ಅವರು ನಂತರ ಕಾರ್ತಿಕ ದೀಪಂ ಎಂಬ ಸೂಪರ್‌ ಹಿಟ್ ಧಾರಾವಾಹಿಯಲ್ಲಿ ಮೋನಿತಾ ಪಾತ್ರದ ಮೂಲಕ ಖ್ಯಾತಿ ಗಳಿಸಿದರು. ಧಾರಾವಾಹಿಯಿಂದ ಸಾಕಷ್ಟು ಅಭಿಮಾನಿಗಳನ್ನು ಗಳಿಸಿದ ನಂತರ, ಶೋಭಾ ಇತ್ತೀಚೆಗೆ ಬಿಗ್ ಬಾಸ್ ತೆಲುಗು ಸೀಸನ್ 7 ರಲ್ಲಿ ಭಾಗವಹಿಸಿದರು. ಇನ್ನೂ ನೇರ ಮಾತಿನ ಮೂಲಕ ಬಿಗ್‌ಬಾಸ್‌ನಲ್ಲಿ ಹೆಚ್ಚು ಗುರುತಿಸಿಕೊಂಡರು.
ಇನ್ನೂ ಬಿಗ್ ಬಾಸ್ ಮನೆಯಲ್ಲೇ ಶೋಭಾ ತನ್ನ ಗೆಳೆಯ ಯಶವಂತ್ ರೆಡ್ಡಿಯನ್ನು ಪರಿಚಯಿಸಿದರು. ಅವರಿಬ್ಬರೂ ಕಾರ್ತಿಕ ದೀಪಂ ಮತ್ತು ಇತರ ಕೆಲವು ಕಿರುಚಿತ್ರಗಳಲ್ಲಿ ಒಟ್ಟಿಗೆ ನಟಿಸಿದ್ದಾರೆ. ಕಾಲಾನಂತರದಲ್ಲಿ, ಅವರು ಪರಸ್ಪರ ಪ್ರೀತಿ ಮಾಡಲು ಶುರು ಮಾಡಿರುವುದಾಗಿ ಹೇಳಿಕೊಂಡರು.
ಈ ಹಿಂದೆ ಶೋಭಾ ಅವರ ಬೆಂಗಳೂರಿನ ಮನೆಯಲ್ಲಿ ಹೂ ಮುಡಿಸುವ ಶಾಸ್ತ್ರ ನಡೆಯಿತು. ಅದರ ಫೋಟೋ ಹಾಗೂ ವಿಡಿಯೋಗಳು ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿತ್ತು.
ಇದೀಗ ಅಧಿಕೃತವಾಗಿ ಈ ಜೋಡಿ ಇಂದು ನಿಶ್ಚಿತಾರ್ಥ ಮಾಡಿಕೊಂಡಿದೆ. ಈ ಸಮಾರಂಭದಲ್ಲಿ ಎರಡು ಕುಟುಂಬದವರು ಭಾಗವಹಿಸಿ ಶುಭ ಹಾರೈಸಿದರು.
