ಬಿಎಂಟಿಸಿ ಸಿಬ್ಬಂದಿಗೆ ಚಳ್ಳೆಹಣ್ಣು ತಿನ್ನಿಸಿದ್ದ ಭೂಪ

ಬೆಂಗಳೂರು: ಬಿಎಂಟಿಸಿ ಸಿಬ್ಬಂದಿಗೆ ಚಳ್ಳೆಹಣ್ಣು ತಿನ್ನಿಸಿದ್ದ ಭೂಪನೊಬ್ಬ ಸಿಕ್ಕಿಬಿದ್ದಿದ್ದಾನೆ. ಯಶವಂತಪುರದ ಬಿಎಂಟಿಸಿ ಡಿಪೋ ಗೆ ಡಿವಿಜನ್ ಕಂಟ್ರೋಲರ್ ಆಗಿ ನೇಮಕವಾಗಿದ್ದೇನೆ ಎಂದು ಹೇಳಿದ್ದ ಐನಾತಿಯ ಮಾತಿಗೆ ಬಿಎಂಟಿಸಿ ಸಿಬ್ಬಂದಿ ಬೆಚ್ಚಿಬಿದ್ದಿದ್ದರು. ತಾನು ಹೇಳಿದಂತೆ ನಡೆಯಬೇಕು ಎಂದು ಸಿಬ್ಬಂದಿಗೆ ಆಸಾಮಿ ಧಮ್ಕಿ ಕೂಡ ಹಾಕಿದ್ದ.

ಈತನ ನಡವಳಿಕೆಯ ಬಗ್ಗೆ ಅನುಮಾನಗೊಂಡ ಸಿಬ್ಬಂದಿ ವಂಚಕನ ಕುರಿತು ಮಾಹಿತಿ ಕಲೆ ಹಾಕಿದ್ದರು. ನಕಲಿ ಅಧಿಕಾರಿ ಎಂದು ಗೊತ್ತಾದ ತಕ್ಷಣ ಯಶವಂತಪುರ ಪೊಲೀಸರಿಗೆ ದೂರು ನೀಡಿದ್ದಾರೆ.

ಅಧಿಕೃತವಾಗಿ ಅಕ್ಟೋಬರ್ 10 ರಂದು ಯಶವಂತಪುರ ಬಿಎಂಟಿಸಿ ಭದ್ರತಾ ಅಧಿಕಾರಿ ಮೋಹನ್ ಬಾಬು ದೂರು ನೀಡಿದ್ದಾರೆ. ಪ್ರಕರಣ ದಾಖಲಿಸಿಕೊಂಡು ಆರೋಪಿಯನ್ನು ಪೊಲೀಸರು ಬಂಧಿಸಿದ್ದಾರೆ.

ಆರೋಪಿ ನೂರ್ ಅಹಮ್ಮದ್​ನನ್ನು ಬಂಧಿಸಿ ಯಶವಂತಪುರ ಪೊಲೀಸರು ಹೆಚ್ಚಿನ ವಿಚಾರಣೆ ನಡೆಸುತ್ತಿದ್ದಾರೆ.