ಬೆಂಗಳೂರು: ಚನ್ನಪಟ್ಟಣದಲ್ಲಿ ಕಾಂಗ್ರೆಸ್ ಅಭ್ಯರ್ಥಿಯಾಗಿ ಸ್ಪರ್ಧೆ ಮಾಡಿದ ಸಿಪಿ ಯೋಗೇಶ್ವರ್ ಗೆ ಮಗಳ ಜೊತೆ ಮಾತ್ರವಲ್ಲ ಮಗನ ಜೊತೆಗೂ ಕಿರಿಕ್ ಆಗಿರುವುದು ಬೆಳಕಿಗೆ ಬಂದಿದೆ. ಇದೀಗ ಯೋಗೇಶ್ವರ್ ವಿರುದ್ಧ ದೂರು ದಾಖಲಾಗಿದೆ.
ಇತ್ತೀಚೆಗಷ್ಟೇ ಯೋಗೇಶ್ವರ್ ಬಿಜೆಪಿ ತೊರೆದು ಕಾಂಗ್ರೆಸ್ ಸೇರಿಕೊಂಡಾಗ ಈಗಾಗಲೇ ಕಾಂಗ್ರೆಸ್ ನಲ್ಲಿರುವ ಅವರ ಪುತ್ರಿ ನಿಶಾ ತೀವ್ರ ವಿರೋಧ ವ್ಯಕ್ತಪಡಿಸಿದ್ದರು. ಯೋಗೇಶ್ವರ್ ಮೊದಲನೇ ಪತ್ನಿಯ ಮಗಳಾದ ನಿಶಾ ಮೊದಲಿನಿಂದಲೂ ತಮ್ಮ ತಂದೆಯ ವಿರುದ್ಧ ಬಹಿರಂಗವಾಗಿಯೇ ಆರೋಪಗಳನ್ನು ಮಾಡುತ್ತಲೇ ಬಂದಿದ್ದಾರೆ.
ಮೊನ್ನೆ ಮತದಾನದ ದಿನವೂ ತಮ್ಮ ತಂದೆಯೇ ಅಭ್ಯರ್ಥಿಯಾಗಿದ್ದರೂ ನನ್ನ ಮೂಲಭೂತ ಹಕ್ಕುಗಳನ್ನೇ ಕಸಿದಿದ್ದಾರೆ ಎಂದು ಮತದಾನವನ್ನೇ ಮಾಡದೇ ತಂದೆಯ ವಿರುದ್ಧ ಅಸಮಾಧಾನ ಹೊರಹಾಕಿದ್ದರು. ಇದೀಗ ಅವರ ಪುತ್ರ ಶ್ರವಣ್ ಕೂಡಾ ಯೋಗೇಶ್ವರ್ ವಿರುದ್ಧ ದೂರು ನೀಡಿದ್ದಾರೆ.
ಯೋಗೇಶ್ವರ್ ತಮ್ಮ ಮೊದಲನೇ ಪತ್ನಿ ಮತ್ತು ಪುತ್ರ ಶ್ರವಣ್ ಬೆಂಗಳೂರಿನಲ್ಲಿ ಮನೆಯೊಂದನ್ನು ಖರೀದಿ ಮಾಡಿದ್ದರು. ಈ ಮನೆಯನ್ನು ಮೊದಲನೇ ಪತ್ನಿ ಮತ್ತು ಮಕ್ಕಳಿಗೆ ಉಡುಗೊರೆಯಾಗಿ ನೀಡಿದ್ದರು.ಆದರೆ ಇದೀಗ ಯೋಗೇಶ್ವರ್ ಪುತ್ರನ ಸಹಿ ನಕಲು ಮಾಡಿ ಅದರಲ್ಲಿ ಆತ ಪಾಲು ಕೇಳಿರುವಂತೆ ವಿವಾದ ಸೃಷ್ಟಿಸಿದ್ದಾರೆ.
ವಕೀಲರು ನನಗೆ ಆಸ್ತಿ ವಿಚಾರದ ಬಗ್ಗೆ ಹೇಳಿದಾಗ ಅಚ್ಚರಿಯಾಯಿತು. ನಾನು ಯಾವುದೇ ಸಹಿ ಹಾಕಿರಲಿಲ್ಲ. ಯೋಗೇಶ್ವರ್ ಅವರೇ ನನ್ನ ಸಹಿಯನ್ನು ನಕಲು ಮಾಡಿದ್ದರು ಎಂದು ಶ್ರವಣ್ ಆರೋಪಿಸಿದ್ದು ಬೆಂಗಳೂರಿನ ಸಿಟಿ ಸಿವಿಲ್ ನ್ಯಾಯಾಲಯದಲ್ಲಿ ದೂರು ದಾಖಲಿಸಲಾಗಿದೆ.
