ಚನ್ನಪಟ್ಟಣದಲ್ಲಿ ಇಂದು ಕಾಂಗ್ರೆಸ್ ಪ್ರಚಾರ ಸಮಾವೇಶದಲ್ಲಿ ಎಚ್ ಡಿ ಕುಮಾರಸ್ವಾಮಿಗೆ ಡಿಕೆ ಸುರೇಶ್ ಟಾಂಗ್ ಕೊಟ್ಟಿದ್ದಾರೆ. ಈ ಹಿಂದೆ ಎಚ್ ಡಿ ರೇವಣ್ಣ ಮತ್ತು ಅವರ ಪುತ್ರ ಪ್ರಜ್ವಲ್ ರೇವಣ್ಣ ವಿರುದ್ಧ ಲೈಂಗಿಕ ದೌರ್ಜನ್ಯ ಆರೋಪ ಬಂದಾಗ ನಾನು ಬೇರೆ, ನನ್ನ ಕುಟುಂಬ ಬೇರೆ ಎಂದು ಕುಮಾರಸ್ವಾಮಿ ಹೇಳಿದ್ದರು. ಅವರ ವಿವಾದದಲ್ಲಿ ನನ್ನನ್ನು ಎಳೆದು ತರಬೇಡಿ ಎಂದಿದ್ದರು. ಅದನ್ನೇ ಉದ್ದೇಶಿಸಿ ಇಂದು ಡಿಕೆ ಸುರೇಶ್ ಟಾಂಗ್ ಕೊಟ್ಟಿದ್ದಾರೆ.
ನನ್ನ ಮತ್ತು ನಮ್ಮ ಅಣ್ಣ ಡಿಕೆ ಶಿವಕುಮಾರ್ ಅವರದ್ದು ಅಪೂರ್ವ ಸಹೋದರರು ಎಂದು ಕುಮಾರಸ್ವಾಮಿಯವರು ವ್ಯಂಗ್ಯ ಮಾಡುತ್ತಾರೆ. ಹೌದ್ರೀ ನಾವು ಅಪೂರ್ವ ಸಹೋದರರೇ. ನಾನು ನಿಮ್ಮ ಹಾಗೆ ಕಷ್ಟದ ಸಮಯದಲ್ಲಿ ನನ್ನ ಅಣ್ಣನಿಗೆ ಕೈ ಕೊಡುವ ವ್ಯಕ್ತಿ ಅಲ್ಲ. ನಾವು ಬದುಕಿದ್ದಾಗಲೂ ಜೊತೆಗೇ ಇರ್ತೀವಿ, ಸಾವಿನಲ್ಲೂ ಜೊತೆಗೇ ಇರ್ತೀವಿ. ನನ್ನ ಅಣ್ಣನ ಜೊತೆಗೆ ನಾನು ಯಾವತ್ತೂ ಇರುತ್ತೇವೆ.
ನಿಮ್ಮ ಹಾಗೆ ಕಷ್ಟ ಬಂದಾಗ ನಾನು ಬೇರೆ ನಮ್ಮ ಅಣ್ಣ ಬೇರೆ ಫ್ಯಾಮಿಲಿ ಎನ್ನಲ್ಲ. ದೇವೇಗೌಡರೇ ನಿಮ್ಮ ಮೊಮ್ಮಕ್ಕಳಿಂದ ಹಾಸನದ ಹೆಣ್ಣು ಮಕ್ಕಳು ಮಾನ ಕಳೆದುಕೊಂಡರಲ್ಲಾ ಆಗ ನೀವು ಕಣ್ಣೀರು ಹಾಕಬೇಕಿತ್ತು. ಆಗ ನಿಮ್ಮ ಘನತೆ ಹೆಚ್ಚುತ್ತಿತ್ತು. ನಿಮ್ಮ ಮನೆಯಲ್ಲಿ ಹೊತ್ತಿನ ಊಟಕ್ಕಾಗಿ ಕೆಲಸ ಮಾಡುತ್ತಿದ್ದರಲ್ಲಾ, ಆ ಹೆಂಗಸರ ಮಾನಭಂಗ ಮಾಡಿದಾಗ ಕಣ್ಣೀರು ಹಾಕಬೇಕಿತ್ತು ಎಂದು ಡಿಕೆ ಸುರೇಶ್ ವಾಗ್ದಾಳಿ ನಡೆಸಿದ್ದಾರೆ.
