ನವದೆಹಲಿ: ತನ್ನ ಪ್ರೀತಿಗಾಗಿ ಕಳೆದ ವರ್ಷ ತನ್ನ ಮೂವರು ಮಕ್ಕಳೊಂದಿಗೆ ಭಾರತಕ್ಕೆ ಅಕ್ರಮವಾಗಿ ಪ್ರವೇಶಿಸಿದ್ದ ಪಾಕಿಸ್ತಾನಿ ಮಹಿಳೆ ಸೀಮಾ ಹೈದರ್ ಅವರು ಆಪರೇಷನ್ ಸಿಂಧೂರ್‌ಗೆ ಶ್ಲಾಘನೆ ವ್ಯಕ್ತಪಡಿಸಿದ್ದಾರೆ.
ತನ್ನ Instagram ಹ್ಯಾಂಡಲ್ @Seema_Sachin10 ನಲ್ಲಿ ಪೋಸ್ಟ್ ಮಾಡಿದ ವೀಡಿಯೊದಲ್ಲಿ, ಸೀಮಾ ಹೈದರ್ ಭಾರತದ ಮಿಲಿಟರಿ ದಾಳಿಯನ್ನು ಮುಕ್ತವಾಗಿ ಶ್ಲಾಘಿಸಿದರು, “ಹಿಂದುಸ್ತಾನ್ ಜಿಂದಾಬಾದ್” ಮತ್ತು “ಜೈ ಹಿಂದ್, ಜೈ ಭಾರತ್” ಎಂಬ ಘೋಷಣೆಗಳನ್ನು ಕೂಗಿದರು. ಮತ್ತೊಂದು ಇನ್‌ಸ್ಟಾಗ್ರಾಮ್ ಸ್ಟೋರಿಯಲ್ಲಿ, "ಆಪರೇಷನ್ ಸಿಂದೂರ್, ಇಂಡಿಯನ್ ಆರ್ಮಿ, ಜೈ ಹಿಂದ್" ಎಂದು ಬರೆದಿದ್ದಾರೆ.
ಆನ್‌ಲೈನ್ ಮೂಲಕ ಪರಿಚಯವಾದ ಭಾರತದ ಯುವಕನ ಪ್ರೀತಿಗಾಗಿ ಅಕ್ರಮವಾಗಿ ಭಾರತಕ್ಕೆ ಬಂದು ನೆಲೆಸಿರುವ ಪಾಕಿಸ್ತಾನದ ಸೀಮಾ ಹೈದರ್ ಅವರು ಸಚಿನ್ ಮೀನಾ ಅವರನ್ನು ಮದುವೆಯಾದರು. ಈ ದಂಪತಿ ಈಚೆಗೆ ಹೆಣ್ಣು ಮಗವನ್ನು ಸ್ವಾಗತಿಸಿತು.
ಅಕ್ರಮವಾಗಿ ಭಾರತಕ್ಕೆ ಬಂದಿರುವ ಸೀಮಾ ಹೈದರ್ ಅವರ ಇರುವಿಕೆ ಪಹಲ್ಗಾಮ್ ದಾಳಿ ಬಳಿಕ ಭಾರೀ ಚರ್ಚೆಗೆ ಕಾರಣವಾಗಿದೆ. ಪಾಕ್‌ಗೆ ಪ್ರತ್ಯುತ್ತರ ನೀಡಲು ಶುರು ಮಾಡಿದ ಭಾರತ್, ಇಲ್ಲಿ ನೆಲೆಸಿರುವ ಪಾಕಿಸ್ತಾನಿಗಳಿಗೆ ಭಾರತ ಬಿಟ್ಟು ಹೋಗಲು ಗಡುವು ನೀಡಿದೆ.
ಇದೀಗ ಸೀಮಾ ಹೈದರ್ ಅವರ ಹೇಳಿಕೆ ಸಾಮಾಜಿಕ ಜಾಲತಾಣದಲ್ಲಿ ಭಾರೀ ವೈರಲ್ ಆಗಿದೆ. ಭಾರತದಲ್ಲಿ ಆಕೆಯ ಉಪಸ್ಥಿತಿಯು ಈಗಾಗಲೇ ತೀವ್ರ ಪರಿಶೀಲನೆಯಲ್ಲಿದೆ, ವಿಶೇಷವಾಗಿ ಪಹಲ್ಗಾಮ್ ದಾಳಿಯ ನಂತರ ಆಕೆಯ ಪೋಸ್ಟ್‌ಗಳು ಬಂದಿವೆ. ಆಕೆಯಂತಹ ಪಾಕಿಸ್ತಾನಿ ಪ್ರಜೆಯನ್ನು ದೇಶದಲ್ಲಿ ಇರಲು ಬಿಡಬೇಕೇ ಎಂದು ಹಲವರು ಪ್ರಶ್ನೆ ಮಾಡಿದ್ದಾರೆ.
