ನವದೆಹಲಿ: ರಾಹುಲ್ ಗಾಂಧಿ ತಮ್ಮ ಭಾಷಣಗಳಲ್ಲಿ ಪ್ರಧಾನಿ ಮೋದಿಗೆ ಟಾಂಗ್ ಕೊಡಲು ಸದಾ ಅಂಬಾನಿ ಹೆಸರೆತ್ತಿ ಕಿಡಿ ಕಾರುತ್ತಲೇ ಇರುತ್ತಾರೆ. ಆದರೆ ಇದೀಗ ಸ್ವತಃ ಮುಕೇಶ್ ಅಂಬಾನಿ ದಂಪತಿ ತಮ್ಮ ಮಗ ಅನಂತ್ ಅಂಬಾನಿ ಮದುವೆಗೆ ರಾಹುಲ್ ಗಾಂಧಿ ಮತ್ತು ಸೋನಿಯಾ ಗಾಂಧಿಗೆ ಆಹ್ವಾನವಿತ್ತಿದ್ದಾರೆ ಎನ್ನಲಾಗಿದೆ.
ನರೇಂದ್ರ ಮೋದಿ ಅಂಬಾನಿ, ಅದಾನಿಯಂತಹ ಉದ್ಯಮಿಗಳ ಸಾಲ ಮನ್ನಾ ಮಾಡಿದರು. ಈ ಉದ್ಯಮಿಗಳನ್ನು ಬೆಳಸಿದರು ಎಂದೆಲ್ಲಾ ರಾಹುಲ್ ಸದಾ ಟಾಂಗ್ ಕೊಡುತ್ತಲೇ ಇರುತ್ತಾರೆ. ಇತ್ತೀಚೆಗೆ ನಡೆದ ಲೋಕಸಭೆ ಚುನಾವಣೆಯಲ್ಲೂ ಮುಕೇಶ್ ಅಂಬಾನಿ ಹೆಸರೆತ್ತಿ ಮೋದಿಗೆ ಟಾಂಗ್ ಕೊಟ್ಟಿದ್ದರು.
ವಿಶೇಷವೆಂದರೆ ರಾಜಕೀಯ ಒಂದು ಕಡೆಯಾದರೆ ಅದನ್ನೆಲ್ಲಾ ಮರೆತು ಮುಕೇಶ್ ಅಂಬಾನಿ ಮತ್ತು ನೀತಾ ಅಂಬಾನಿ ಜುಲೈ 12 ರಂದು ಮುಂಬೈನ ಜಿಯೋ ಸೆಂಟರ್ ನಲ್ಲಿ ನಡೆಯಲಿರುವ ಮದುವೆಗೆ ಖುದ್ದಾಗಿ ರಾಹುಲ್ ಗಾಂಧಿಗೆ ಆಹ್ವಾನವಿತ್ತಿದ್ದಾರೆ ಎನ್ನಲಾಗಿದೆ. 10 ಜನಪತ್ ರಸ್ತೆಯಲ್ಲಿ ರಾಹುಲ್, ಸೋನಿಯಾ ನಿವಾಸದ ಬಳಿ ಅಂಬಾನಿ ದಂಪತಿ ಇರುವ ವಿಡಿಯೋವೊಂದು ಸೋಷಿಯಲ್ ಮೀಡಿಯಾದಲ್ಲಿ ವೈರಲ್ ಆಗಿತ್ತು.
ಇದೀಗ ಅಂಬಾನಿ ಎಂದರೆ ಸದಾ ಉರಿದುಬೀಳುವ ರಾಹುಲ್ ಗಾಂಧಿ ಈಗ ಅವರ ಮದುವೆಗೆ ಹೋಗಲಿದ್ದಾರೆಯೇ ಅಥವಾ ರಾಜಕೀಯ ಕಾರಣಗಳಿಗೋಸ್ಕರ ದೂರ ಉಳಿಯಲಿದ್ದಾರೆಯೇ ಎಂದು ಕಾದು ನೋಡಬೇಕಿದೆ. ಈಗಾಗಲೇ ಅನಂತ್ ಮದುವೆ ಪೂರ್ವ ಕಾರ್ಯಕ್ರಮಗಳು ಭರ್ಜರಿಯಾಗಿ ನಡೆಯುತ್ತಿದೆ.
