ಲೈಂಗಿಕ ಕಿರುಕುಳ: ಟ್ವಿಟರ್‌ನಲ್ಲಿ ಪೊಲೀಸರಿಗೆ ದೂರು ನೀಡಿದ ಮಹಿಳೆ

ರಸ್ತೆಯಲ್ಲಿ ನಡೆದು ಹೋಗುತ್ತಿದ್ದ ಮಹಿಳೆಯೊಬ್ಬಳಿಗೆ ಬೈಕ್ ಸವಾರನೊಬ್ಬ ಲೈಂಗಿಕ ಕಿರುಕುಳ ನೀಡಿದ್ದು ತಕ್ಷಣ ಆಕೆ ಟ್ವಿಟರ್ ಮೂಲಕ ಮುಂಬೈ ಪೊಲೀಸರಿಗೆ ದೂರು ನೀಡಿದ್ದಾಳೆ. 

ಗೋರೆಗಾಂವ್ ಪಶ್ಚಿಮದ ಪ್ರಗತಿ ನಗರದ ಎಮ್.ಜಿ, ರಸ್ತೆಯಲ್ಲಿ ಘಟನೆ ನಡೆದಿದ್ದು, ಅಪರಿಚಿತ ಬೈಕ್ ಸವಾರ ಕಪ್ಪು ಮೋಟಾರ್ ಬೈಕ್‌ ಚಾಲನೆ ಮಾಡುತ್ತಿದ್ದ ಎಂದು ತಿಳಿದು ಬಂದಿದೆ. ಮಹಿಳೆಯ ಬಳಿ ಬರುತ್ತಿದ್ದಂತೆ ನಿಧಾನವಾಗಿ ಬೈಕ್ ಚಲಾಯಿಸಿದ ಆತ ಆಕೆಗೆ ಚಿವುಟಿದ್ದಾನೆ.

ಆತನಿಗೆ ನನ್ನ ಬ್ಯಾಗ್‌ನಿಂದ ಹೊಡೆಯಲು ಯತ್ನಿಸಿದೆ. ಆದರೆ ಆತ ಪರಾರಿಯಾದ. ಆತನ ಬೈಕ್ ನಂಬರ್ 2572 ಎಂದಾಕೆ ಮುಂಬೈ ಪೊಲೀಸ್‌ಗೆ ಟ್ವೀಟ್ ಮಾಡಿದ್ದಾಳೆ. 

ಸ್ಥಳೀಯರು ಸಹಾಯಕ್ಕೆ ಬರುವಷ್ಟರಲ್ಲಿ ಆತ ವೇಗವಾಗಿ ಬೈಕ್ ಚಲಾಯಿಸಿಕೊಂಡು ಪರಾರಿಯಾದ. ಆತ ನೀಲಿ ಶರ್ಟ್ ಧರಿಸಿದ್ದ. ಬಳಿಕ ಆಕೆ ಮುಂಬೈ ಪೊಲೀಸ್ ಠಾಣೆ ಸಹಾಯವಾಣಿ 100ಕ್ಕೆ ಕರೆ ಮಾಡಿದ್ದಾಳೆ. 

ನಾನು 100 ಕರೆ ಮಾಡಿದಾಗ ಮಹಿಳೆಯೋರ್ವರು ಕರೆ ಸ್ವೀಕರಿಸಿ ಕಟ್ ಮಾಡಿದರು ಎಂದಾಕೆ ಟ್ವಿಟರ್‌ನಲ್ಲಿ ಪೊಲೀಸರ ಅಸಹಕಾರದ ಬಗ್ಗೆ ಕೂಡ ದೂರಿದ್ದಾಳೆ. 

ಮಧ್ಯಾಹ್ನದ ಹೊತ್ತಲ್ಲಿ ನಡೆದು ಹೋಗುತ್ತಿದ್ದಾಗ ನನ್ನ ಜತೆ ಇಂತಹ ದುರ್ವರ್ತನೆ ತೋರಲಾಗಿದೆ. ನಾನೇನು ಪ್ರಚೋದನಾಕಾರಿ ಬಟ್ಟೆಗಳನ್ನು ತೊಟ್ಟಿದ್ದೆನಾ? ಮುಂಬೈ ಸುರಕ್ಷಿತ ಎಂದು ಭಾವಿಸಿದ್ದೆ, ಆದರೆ ಅದು ಸುಳ್ಳೆಂದು ಸಾಬೀತಾಯಿತು ಎಂದಾಕೆ ಹತಾಶೆಯನ್ನು ವ್ಯಕ್ತಪಡಿಸಿದ್ದಾರೆ.

ತಾಜಾ ಸುದ್ದಿಗಳನ್ನು ಓದಲು ವೆಬ್‌ದುನಿಯಾ ಮೊಬೈಲ್ ಆ್ಯಪ್ ಡೌನ್‍ಲೋಡ್ ಮಾಡಿಕೊಳ್ಳಿ.