ನೀವು ವಾಗ್ದಾನ ಪೂರ್ಣಗೊಳಿಸುತ್ತಿಲ್ಲ: ಕೇಜ್ರಿಗೆ ಅಣ್ಣಾ ತರಾಟೆ

ಸಮಾಜದಲ್ಲಿ ನಾನು ಬದಲಾವಣೆಯನ್ನು ತರುತ್ತೇನೆ ಎಂದು ವಾಗ್ದಾನ ಮಾಡಿದ್ದ ನೀವು ನನಗೆ ಕೊಟ್ಟ ಮಾತನ್ನು ಪೂರೈಸಿಲ್ಲ ಎಂದು ಸಾಮಾಜಿಕ ಹೋರಾಟಗಾರ ಅಣ್ಣಾ ಹಜಾರೆ ದೆಹಲಿ ಸಿಎಂ, ತಮ್ಮ ಶಿಷ್ಯ ಅರವಿಂದ ಕೇಜ್ರಿವಾಲ್ ಅವರನ್ನು ತರಾಟೆಗೆ ತೆಗೆದುಕೊಂಡಿದ್ದಾರೆ. 

ಕೇಜ್ರಿವಾಲ್ ಅವರಿಗೆ ಪತ್ರ ಬರೆದಿರುವ ಅಣ್ಣಾ, ಕಮಲ ಮತ್ತು ಕೈ ಪಕ್ಷಕ್ಕೆ ಹರಿದು ಬರುವ ನಿಧಿಮೂಲವನ್ನು ಪ್ರಶ್ನಿಸುತ್ತಿದ್ದ ಆಮ್ ಆದ್ಮಿ ಪಕ್ಷ ತನ್ನ ವೆಬ್ಸೈಟ್‌ನಲ್ಲಿ ಪಕ್ಷಕ್ಕೆ ಧನಸಹಾಯ ಮಾಡುವವರ ಪಟ್ಟಿಯನ್ನು ತೆಗೆದು ಹಾಕಿದ್ದನ್ನು ಪ್ರಶ್ನಿಸಿದ್ದಾರೆ. ಮತ್ತೀಗ ನಿಮಗೂ ಮತ್ತು ಇತರ ಪಕ್ಷಗಳಿಗೂ ಇರುವ ವ್ಯತ್ಯಾಶವೇನು ಎಂದು ಅವರು ಪ್ರಶ್ನಿಸಿದ್ದಾರೆ. 

ವ್ಯವಸ್ಥೆಯಲ್ಲೇನಾದರೂ ಬದಲಾವಣೆ ತರುವ ಅಪೇಕ್ಷೆ ಇರುವ ನಾಯಕತ್ವ ಅಂತಹ ವಿಚಾರದಲ್ಲಿ ಸಮಗ್ರ ಚರ್ಚೆ ನಡೆಸಬೇಕೆಂದು ಅವರು ಡಿಸೆಂಬರ್ 23 ರಂದು ಕೇಜ್ರಿ ಅವರಿಗೆ ಬರೆದಿರುವ ಪತ್ರದಲ್ಲಿ ಅಣ್ಣಾ ತಾಕೀತು ಮಾಡಿದ್ದಾರೆ. 

ಮಹಾರಾಷ್ಟ್ರಿಗರ ಪರವಾಗಿ ಮಾಡಬೇಕಿದ್ದ ಕೆಲಸಗಳನ್ನು ಬದಿಗಿಟ್ಟು, ದೇಶದ ಮತ್ತು ಸಮಾಜದ ಒಳಿತಿಗಾಗಿ ನಿಸ್ವಾರ್ಥ ಸೇವೆ ಮಾಡಿ ಅನೇಕ ಕನಸುಗಳನ್ನು ಕಂಡೆ. ಆದರೆ ದೇಶದ ಬಗ್ಗೆ ನನಗಿರುವ ಕನಸುಗಳನ್ನು ನೀವು ನುಚ್ಚುನೂರು ಮಾಡಿದ್ದೀರಿ ಎಂದು ಹಿರಿಯ ಚೇತನ ಆಕ್ರೋಶವನ್ನು ವ್ಯಕ್ತ ಪಡಿಸಿದ್ದಾರೆ.