ಮೊಹಮ್ಮದ್ ಶಮಿ ಏಟಿಗೆ ಇಬ್ಬರು ಬಾಂಗ್ಲಾ ಕ್ರಿಕೆಟಿಗರ ತಲೆಗೆ ಪೆಟ್ಟು!

ಕೋಲ್ಕೊತ್ತಾ: ಭಾರತ ಮತ್ತು ಬಾಂಗ್ಲಾದೇಶ ನಡುವೆ ನಡೆಯುತ್ತಿರುವ ಹೊನಲು ಬೆಳಕು ಟೆಸ್ಟ್ ನಲ್ಲಿ ಟೀಂ ಇಂಡಿಯಾ ವೇಗಿ ಮೊಹಮ್ಮದ್ ಶಮಿ ಬಾಲ್ ತಗುಲಿ ಇಬ್ಬರು ಬಾಂಗ್ಲಾ ಕ್ರಿಕೆಟಿಗರು ತಲೆಗೆ ಏಟು ಮಾಡಿಕೊಂಡಿದ್ದಾರೆ.

ಬಾಂಗ್ಲಾ ಬ್ಯಾಟ್ಸ್ ಮನ್ ಗಳಾದ ಲಿಟನ್ ದಾಸ್ ಮತ್ತು ನಯೀಮ್ ಹಸನ್ ತಲೆಗೆ ಏಟು ಮಾಡಿಕೊಂಡು ಪೆವಿಲಿಯನ್ ಗೆ ಮರಳಿದರು. ಇವರ ಬದಲಿಗೆ ಇಬ್ಬರು ಬದಲಿ ಆಟಗಾರರು ಕಣಕ್ಕಿಳಿದು ಆಟ ಪೂರ್ತಿಗೊಳಿಸಿದರು.

ಇತ್ತೀಚೆಗೆ ಐಸಿಸಿ ಹೊಸ ನಿಯಮ ರೂಪಿಸಿದ್ದು ಅದರಂತೆ ತಲೆಗೆ ಪೆಟ್ಟು ಮಾಡಿಕೊಂಡ ಆಟಗಾರನ ಬದಲಿಗೆ ಒಂದು ತಂಡ ಬದಲಿ ಆಟಗಾರನನ್ನು ಬಳಸಬಹುದಾಗಿದೆ. ಆದರೆ ಒಂದೇ ಟೆಸ್ಟ್ ನಲ್ಲಿ ಈ ರೀತಿ ಇಬ್ಬರು ಆಟಗಾರರನ್ನು ಕಣಕ್ಕಿಳಿದಿದ್ದು ಇದೇ ಮೊದಲು. ಈ ಮೂಲಕ ಬಾಂಗ್ಲಾ ಹೊಸ ದಾಖಲೆಯನ್ನೂ ಮಾಡಿತು. ದಿನದಂತ್ಯಕ್ಕೆ ಟೀಂ ಇಂಡಿಯಾ 3 ವಿಕೆಟ್ ನಷ್ಟಕ್ಕೆ 174 ರನ್ ಗಳಿಸಿ 68 ರನ್ ಮುನ್ನಡೆಯನ್ನೂ ಗಳಿಸಿದೆ. ನಾಯಕ ಕೊಹ್ಲಿ 59 ಮತ್ತು ಅಜಿಂಕ್ಯಾ ರೆಹಾನೆ 23 ರನ್ ಗಳಿಸಿ ಕ್ರೀಸ್ ನಲ್ಲಿದ್ದಾರೆ.