ಏಕದಿನ ವಿಶ್ವಕಪ್ ಕ್ರಿಕೆಟ್: ಜಾರಿ ಬಿದ್ದ ಹಾರ್ದಿಕ್ ಪಾಂಡ್ಯ, ಸ್ಕ್ಯಾನಿಂಗ್ ಗೆ ರವಾನೆ

ಪುಣೆ: ಬಾಂಗ್ಲಾದೇಶ ವಿರುದ್ಧ ಏಕದಿನ ವಿಶ್ವಕಪ್ ಕ್ರಿಕೆಟ್ ಪಂದ್ಯದ ವೇಳೆ ಟೀಂ ಇಂಡಿಯಾ ಆಲ್ ರೌಂಡರ್ ಹಾರ್ದಿಕ್ ಪಾಂಡ್ಯ ಜಾರಿ ಬಿದ್ದು ಕಾಲಿಗೆ ಏಟು ಮಾಡಿಕೊಂಡಿದ್ದಾರೆ.

ತಮ್ಮ ಮೊದಲ ಓವರ್ ಬೌಲಿಂಗ್ ಮಾಡುತ್ತಿದ್ದ ಪಾಂಡ್ಯ ಜಾರಿ ಬಿದ್ದು ಕಾಲಿಗೆ ತೀವ್ರ ಏಟು ಮಾಡಿಕೊಂಡಿದ್ದಾರೆ. ಇದರಿಂದ ತೀವ್ರ ನೋವಿನಿಂದ ಕುಸಿದು ಬಿದ್ದ ಹಾರ್ದಿಕ್ ರನ್ನು ತಕ್ಷಣವೇ ಮೈದಾನದಿಂದ ಹೊರಗೆ ಕರೆದೊಯ್ಯಲಾಗಿದೆ.  ಆ ಬಳಿಕ ಅವರ ಓವರ್ ನ್ನು ವಿರಾಟ್ ಕೊಹ್ಲಿ ಪೂರ್ತಿ ಮಾಡಿದರು. ಕೊಹ್ಲಿ 6 ವರ್ಷಗಳ ಬಳಿಕ ಬೌಲಿಂಗ್ ಮಾಡಿ ಗಮನ ಸೆಳೆದರು.

ಸದ್ಯಕ್ಕೆ ಹಾರ್ದಿಕ್ ರನ್ನು ಸ್ಕ್ಯಾನಿಂಗ್ ಗೆ ರವಾನಿಸಲಾಗಿದೆ ಎಂದು ಬಿಸಿಸಿಐ ಪ್ರಕಟಣೆ ನೀಡಿದೆ. ಇದರಿಂದಾಗಿ ಇಂದು ಹಾರ್ದಿಕ್ ಬ್ಯಾಟಿಂಗ್ ಗೂ ಇಳಿಯಲ್ಲ. ಹಾರ್ದಿಕ್ ರಂತಹ ಪ್ರಮುಖ ಆಲ್ ರೌಂಡರ್ ನ ಗಾಯ ನಾಯಕ ರೋಹಿತ್ ಶರ್ಮಾ ಚಿಂತೆ ಹೆಚ್ಚಿಸಿದೆ.