ನ್ಯೂಯಾರ್ಕ್: ಟಿ20 ವಿಶ್ವಕಪ್ ನಲ್ಲಿ ಕಳೆದ ಎರಡೂ ಪಂದ್ಯಗಳಲ್ಲಿ ಟೀಂ ಇಂಡಿಯಾ ಪರ ಆರಂಭಿಕರಾಗಿ ಕಣಕ್ಕಿಳಿದ ಕಿಂಗ್ ಕೊಹ್ಲಿ ವೈಫಲ್ಯ ಅನುಭವಿಸಿದ್ದರು. ಹೀಗಾಗಿ ಈಗ ಯಶಸ್ವಿ ಜೈಸ್ವಾಲ್ ರನ್ನೇ ಓಪನರ್ ಆಗಿ ಕಣಕ್ಕಿಳಿಸಲು ಫ್ಯಾನ್ಸ್ ಒತ್ತಾಯಿಸಿದ್ದಾರೆ.
ವಿರಾಟ್ ಕೊಹ್ಲಿ ಐಪಿಎಲ್ ನಲ್ಲಿ ಆರಂಭಿಕರಾಗಿ ಕಣಕ್ಕಿಳಿಯುತ್ತಾರೆ. ರಾಷ್ಟ್ರೀಯ ತಂಡದ ಪರವೂ ಓಪನರ್ ಆಗಿ ಕಣಕ್ಕಿಳಿದಿದ್ದು ಇದೆ. ಆದರೆ ಯಶಸ್ವಿ ಜೈಸ್ವಾಲ್, ಶುಬ್ಮನ್ ಗಿಲ್ ರಂತಹ ಪ್ರತಿಭಾವಂತರು ಬಂದ ಬಳಿಕ ಕೊಹ್ಲಿ ಓಪನರ್ ಆಗಿದ್ದು ಕಡಿಮೆ. ಆದರೆ ಈಗ ಟಿ20 ವಿಶ್ವಕಪ್ ನಲ್ಲಿ ರೋಹಿತ್ ಜೊತೆಗೆ ಕೊಹ್ಲಿ ಓಪನಿಂಗ್ ಮಾಡುತ್ತಿದ್ದಾರೆ.
ಆದರೆ ಇದರಿಂದ ಭಾರತಕ್ಕೆ ಹೆಚ್ಚಿನ ಫಲ ದೊರಕಿಲ್ಲ. ಕಳೆದ ಎರಡು ಪಂದ್ಯಗಳಲ್ಲಿ ಕೊಹ್ಲಿ ಕ್ರಮವಾಗಿ ಗಳಿಸಿದ್ದು 1 ಮತ್ತು 4 ರನ್ ಮಾತ್ರ. ಹೀಗಾಗಿ ಕೊಹ್ಲಿಯನ್ನು ಮತ್ತೆ ಅವರ ಮೆಚ್ಚಿನ ಮೂರನೇ ಕ್ರಮಾಂಕಕ್ಕೆ ಕಳುಹಿಸಿ ಸೂರ್ಯಕುಮಾರ್ ಯಾದವ್ ಬದಲು ಯಶಸ್ವಿ ಜೈಸ್ವಾಲ್ ರನ್ನು ತಂಡಕ್ಕೆ ಆಯ್ಕೆ ಮಾಡಿ ಓಪನಿಂಗ್ ಮಾಡಿಸಿ ಎಂದು ಅಭಿಮಾನಿಗಳಿಂದ ಒತ್ತಾಯ ಕೇಳಿಬರುತ್ತಿದೆ.
ಆದರೆ ಅದು ಅಷ್ಟು ಸುಲಭವಲ್ಲ. ಯಾಕೆಂದರೆ ಈಗ ಕಳೆದ ಎರಡೂ ಪಂದ್ಯಗಳಲ್ಲಿ ರಿಷಬ್ ಮೂರನೇ ಕ್ರಮಾಂಕದಲ್ಲಿ ಅತ್ಯುತ್ತಮ ಆಟ ಪ್ರದರ್ಶಿಸಿದ್ದಾರೆ. ಹೀಗಾಗಿ ಅವರನ್ನು ಸದ್ಯಕ್ಕೆ ಆ ಸ್ಥಾನದಿಂದ ಟೀಂ ಮ್ಯಾನೇಜ್ ಮೆಂಟ್ ಕಿತ್ತು ಹಾಕಲ್ಲ. ಹೀಗಿದ್ದಲ್ಲಿ ಸೂರ್ಯಕುಮಾರ್ ಯಾದವ್ ರನ್ನು ಕಿತ್ತು ಹಾಕಿ ಸಂಜು ಸ್ಯಾಮ್ಸನ್ ಗೆ ಅವಕಾಶ ನೀಡಿ ಎಂಬ ಒತ್ತಾಯಗಳೂ ಕೇಳಿಬರುತ್ತಿವೆ. ಇದನ್ನು ಟೀಂ ಮ್ಯಾನೇಜ್ ಮೆಂಟ್ ಪರಿಗಣಿಸಲಿದೆಯೇ ಎಂದು ನೋಡಬೇಕು.
