ಇಂದಿನ ದಿನದಾಟದಲ್ಲಿ ರಿಷಭ್ ಪಂತ್, ಶುಬ್ಮನ್ ಗಿಲ್ ಇನಿಂಗ್ಸ್ ಗಮನ ಸೆಳೆಯಿತು. ನಿನ್ನೆ ಅಜೇಯರಾಗುಳಿದಿದ್ದ ಜೋಡಿ ಇಂದು ಭೋಜನ ವಿರಾಮದವರೆಗೂ ವಿಕೆಟ್ ಕಳೆದುಕೊಳ್ಳದೇ ಪೈಪೋಟಿಗೆ ಬಿದ್ದವರಂತೆ ಶತಕ ಸಿಡಿಸಿದರು. ಹಾಗೆ ನೋಡಿದರೆ ಗಿಲ್ ಮೊದಲೇ ಅರ್ಧಶತಕ ಗಳಿಸಿದ್ದರು.
ಆದರೆ ಅರ್ಧಶತಕದ ಬಳಿಕ ಗೇರ್ ಬದಲಾಯಿಸಿದ ರಿಷಭ್ ಪಂತ್, ಬೌಂಡರಿ, ಸಿಕ್ಸರ್ ಗಳ ಮೂಲಕ ಗಿಲ್ ಗಿಂತಲೂ ಮೊದಲೇ ಶತಕ ಪೂರೈಸಿದರು. 128 ಎಸೆತ ಎದುರಿಸಿದ ಪಂತ್ 4 ಸಿಕ್ಸರ್ ಗಳೊಂದಿಗೆ 109 ರನ್ ಗಳಿಸಿ ಔಟಾದರು. ಇಂದು ಬೆಳಿಗ್ಗೆ ದಿನದಾಟ ಆರಂಭಕ್ಕೆ ಮುನ್ನ ತಮ್ಮ ಬ್ಯಾಟ್ ನ್ನು ಟೇಬಲ್ ಮೇಲಿರಿಸಿ ಪೂಜೆ ಮಾಡಿ ಕಣಕ್ಕಿಳಿದಿದ್ದ ರಿಷಭ್ ಗೆ ದೇವರು ಮೋಸ ಮಾಡಲಿಲ್ಲ. ಅಪಘಾತದ ನಂತರ ಒಂದು ವರ್ಷ ಬ್ರೇಕ್ ಪಡೆದುಕೊಂಡಿದ್ದ ರಿಷಭ್ ಗೆ ಇದು ಟೆಸ್ಟ್ ಕಮ್ ಬ್ಯಾಕ್ ಪಂದ್ಯವಾಗಿತ್ತು. ಮೊದಲ ಪಂದ್ಯದಲ್ಲೇ ತಮ್ಮ ಝಲಕ್ ತೋರಿಸಿದ್ದಾರೆ.
ಅವರಿಗೆ ಉತ್ತಮ ಸಾಥ್ ನೀಡುತ್ತಿದ್ದ ಶುಬ್ಮನ್ ಗಿಲ್ ಕೂಡಾ 119 ರನ್ ಗಳಿಸಿ ಕೊನೆಯವರೆಗೂ ಅಜೇಯರಾಗುಳಿದರು. ರಿಷಭ್ ಔಟಾದ ಬಳಿಕ ಕ್ರೀಸ್ ಗೆ ಬಂದಿದ್ದ ಕೆಎಲ್ ರಾಹುಲ್ ಇಂದು ತಮಗೆ ಸಿಕ್ಕ ಕಿರು ಅವಧಿಯಲ್ಲೇ ಕೆಲವು ಮನಮೋಹಕ ಹೊಡೆತಗಳ ಮೂಲಕ ಗಮನ ಸೆಳೆದರು. ಅವರು ಅಜೇಯ 22 ರನ್ ಗಳಿಸಿದರು. 4 ವಿಕೆಟ್ ನಷ್ಟಕ್ಕೆ 287 ರನ್ ಗಳಿಸಿದ್ದಾಗ ನಾಯಕ ರೋಹಿತ್ ಇನಿಂಗ್ಸ್ ಡಿಕ್ಲೇರ್ ಮಾಡಿಕೊಂಡರು.
