ಐಪಿಎಲ್ 2024: ಔಟಾದ ಬೇಸರಕ್ಕೆ ಮೆಟ್ಟಿಲ ಮೇಲೆ ಕೂತು ಕಣ್ಣೀರು ಹಾಕಿದ ರಾಹುಲ್ ತ್ರಿಪಾಠಿ
ಈ ಪಂದ್ಯವನ್ನು ಕೆಕೆಆರ್ ತಂಡ 8 ವಿಕೆಟ್ ಗಳಿಂದ ಜಯ ಗಳಿಸಿತು. ಎಚ್ ಆರ್ ಎಚ್ 159 ರನ್ ಗಳಿಗೇ ಆಲೌಟ್ ಆಯಿತು. ಪ್ರಮುಖ ಬ್ಯಾಟಿಗರು ಕೈಕೊಟ್ಟಾಗ ಹೈದರಾಬಾದ್ ಪರ ರಾಹುಲ್ ತ್ರಿಪಾಠಿ ಉತ್ತಮ ಬ್ಯಾಟಿಂಗ್ ಪ್ರದರ್ಶಿಸಿದರು. 35 ಎಸೆತಗಳಿಂದ 1 ಸಿಕ್ಸರ್ ಸಹಿತ 55 ರನ್ ಗಳಿಸಿದರು.
ಆದರೆ ಈ ಹಂತದಲ್ಲಿ ಜೊತೆಗಾರ ಆಟಗಾರ ಅಬ್ದುಲ್ ಸಮದ್ ನೀಡಿದ ಕರೆಗೆ ಓಡಿದ ತ್ರಿಪಾಠಿ ದುರದೃಷ್ಟವಶಾತ್ ರನೌಟ್ ಆಗಬೇಕಾಯಿತು. ಇದು ಅವರನ್ನು ತೀವ್ರ ಹತಾಶೆಗೆ ದೂಡಿತು. ತಂಡಕ್ಕೆ ದೊಡ್ಡ ಮೊತ್ತ ಕೊಡಿಸಬಹುದೆಂಬ ನಿರೀಕ್ಷೆಯಲ್ಲಿದ್ದ ಅವರಿಗೆ ರನೌಟ್ ಆಘಾತ ನೀಡಿತ್ತು.
ಹೀಗಾಗಿ ಪೆವಿಲಿಯನ್ ಗೆ ತೆರಳುವ ಹಾದಿಯಲ್ಲಿ ಮೆಟ್ಟಿಲ ಮೇಲೆ ಕುಳಿತು ಕೆಲ ಕಾಲ ಬಿಕ್ಕಿ ಬಿಕ್ಕಿ ಅತ್ತರು. ಅವರು ಅಳುತ್ತಿರುವ ವಿಡಿಯೋ ಸೋಷಿಯಲ್ ಮೀಡಿಯಾದಲ್ಲಿ ವೈರಲ್ ಆಗಿದೆ. ತ್ರಿಪಾಠಿ ಅವಸ್ಥೆ ನೋಡಿ ನೆಟ್ಟಿಗರೂ ಬೇಸರ ವ್ಯಕ್ತಪಡಿಸಿದ್ದಾರೆ.
