ಫ್ಲೋರಿಡಾ: ಅಮೆರಿಕಾ ಮತ್ತು ಐರ್ಲೆಂಡ್ ನಡುವಿನ ಎ ಗುಂಪಿನ ಟಿ20 ವಿಶ್ವಕಪ್ ಪಂದ್ಯ ಮಳೆಯಿಂದಾಗಿ ರದ್ದಾದ ಕಾರಣ ಈಗ ಪಾಕಿಸ್ತಾನಕ್ಕೆ ಸಂಕಷ್ಟ ಎದುರಾಗಿದೆ. ಈ ಪಂದ್ಯ ಮಳೆಯಿಂದಾಗಿ ರದ್ದಾದ ಕಾರಣ ಪಾಕಿಸ್ತಾನ ಟೂರ್ನಿಯಿಂದಲೇ ಹೊರಬಿದ್ದಿದೆ.
ಅಮೆರಿಕಾ ಮತ್ತು ಭಾರತದ ವಿರುದ್ಧ ಸೋತಿದ್ದ ಪಾಕಿಸ್ತಾನಕ್ಕೆ ಸೂಪರ್ 8 ರ ಹಾದಿ ಕಷ್ಟವಾಗಿತ್ತು. ಒಂದು ವೇಳೆ ನಿನ್ನೆಯ ಪಂದ್ಯದಲ್ಲಿ ಅಮೆರಿಕಾ ಸೋತಿದ್ದರೆ ಪಾಕಿಸ್ತಾನಕ್ಕೆ ಸೂಪರ್ 8 ರ ಅವಕಾಶವಿತ್ತು. ಆದರೆ ಮಳೆಯಿಂದಾಗಿ ಪಂದ್ಯ ರದ್ದಾಗಿದ್ದರಿಂದ ಎರಡೂ ತಂಡಗಳಿಗೂ ಅಂಕ ಸಮಾನವಾಗಿ ಹಂಚಲಾಯಿತು.
ಇದರಿಂದಾಗಿ ಈಗಾಗಲೇ ನಾಲ್ಕು ಪಂದ್ಯಗಳಿಂದ 2 ಗೆಲುವು ಸಾಧಿಸಿರುವ ಅಮೆರಿಕಾ ಎ ಗುಂಪಿನಲ್ಲಿ ಎರಡನೇ ತಂಡವಾಗಿ ಸೂಪರ್ 8 ಕ್ಕೇರಿದೆ. ಈಗಾಗಲೇ ಈ ಗುಂಪಿನಲ್ಲಿರುವ ಟೀಂ ಇಂಡಿಯಾ ಸೂಪರ್ 8 ರ ಹಂತ ತಲುಪಿದೆ. ಇತ್ತ ಪಾಕಿಸ್ತಾನ 3 ಪಂದ್ಯಗಳಿಂದ ಕೇವಲ 1 ಗೆಲುವು ಮಾತ್ರ ಸಾಧಿಸಿದೆ.
ಅಮೆರಿಕಾ ಈಗಾಗಲೇ 5 ಅಂಕ ತನ್ನದಾಗಿಸಿಕೊಂಡಿದೆ. ಪಾಕಿಸ್ತಾನಕ್ಕೆ ಇನ್ನೊಂದು ಪಂದ್ಯ ಬಾಕಿಯಿದೆ. ಆ ಪಂದ್ಯ ಗೆದ್ದರೂ ಒಟ್ಟು ಅಂಕ ನಾಲ್ಕು ಆಗಲಿದೆಯಷ್ಟೇ. ಹೀಗಾಗಿ ಪಾಕಿಸ್ತಾನ ಇನ್ನೊಂದು ಪಂದ್ಯ ಗೆದ್ದರೂ ಸೂಪರ್ 8 ಕ್ಕೆ ಏರಲು ಸಾಧ್ಯವಾಗದು.
