ನ್ಯೂಜಿಲೆಂಡ್ ನಲ್ಲೂ ಪ್ರೇಕ್ಷಕರಿಂದ ಟೀಂ ಇಂಡಿಯಾಗೇ ಸಪೋರ್ಟ್!

ಆಕ್ಲೆಂಡ್: ಭಾರತೀಯ ಕ್ರಿಕೆಟಿಗರು ಎಲ್ಲೇ ಹೋದರೂ ಅಭಿಮಾನಿಗಳು ಅಲ್ಲೆಲ್ಲಾ ಹಿಂಬಾಲಿಸುತ್ತಾರೆ ಎಂಬುದಕ್ಕೆ ನಿನ್ನೆ ನಡೆದ ಭಾರತ-ನ್ಯೂಜಿಲೆಂಡ್ ನಡುವಿನ ಮೊದಲ ಟಿ20 ಪಂದ್ಯ ಸಾಕ್ಷಿಯಾಗಿತ್ತು.

ನ್ಯೂಜಿಲೆಂಡ್ ನಲ್ಲಿ ಪಂದ್ಯ ನಡೆಯುತ್ತಿದ್ದರೂ ಪ್ರೇಕ್ಷಕರು ಟೀಂ ಇಂಡಿಯಾ ಕ್ರಿಕೆಟಿಗರಿಗೆ ತವರಿನಲ್ಲೇ ಆಡುವ ಅನುಭವ ನೀಡಿದ್ದಾರೆ. ಭಾರತದಲ್ಲಿ ಆಡುತ್ತಿರುವಾಗ ಪ್ರೇಕ್ಷಕರು ಭಾರೀ ಸಂಖ್ಯೆಯಲ್ಲಿ ಜಮಾಯಿಸಿ ಟೀಂ ಇಂಡಿಯಾ ಕ್ರಿಕೆಟಿಗರ ಹೆಸರೆತ್ತಿ ಕೂಗಿ ಹುರಿದುಂಬಿಸುತ್ತಿರುತ್ತಾರೆ.

ಅದೇ ರೀತಿ ಇಲ್ಲಿಯೂ ಮೈದಾನದಲ್ಲಿದ್ದ ಪ್ರೇಕ್ಷಕರ ಪೈಕಿ ಹೆಚ್ಚಿನವರು ಭಾರತೀಯ ಸಮರ್ಥಕರಾಗಿದ್ದರು! ಈ ಬಗ್ಗೆ ಪಂದ್ಯದ ಬಳಿಕ ನಾಯಕ ಕೊಹ್ಲಿ ಕೂಡಾ ಮಾತನಾಡಿದ್ದು, ನಮಗೆ ಬೇರೆ ದೇಶದಲ್ಲಿ ಆಡುತ್ತಿದ್ದೇವೆ ಎನಿಸಲೇ ಇಲ್ಲ. ಕಾರಣ ಶೇ. 80 ರಷ್ಟು ಪ್ರೇಕ್ಷಕರು ನಮಗೆ ಬೆಂಬಲ ನೀಡುತ್ತಿದ್ದರು. ಅವರ ಈ ಪ್ರೋತ್ಸಾಹ ನಮ್ಮಲ್ಲಿ ಜೋಶ್ ಹೆಚ್ಚಿಸುತ್ತದೆ ಎಂದು ಹೊಗಳಿದ್ದಾರೆ.