ಜಾರ್ಖಾಂಡ್ ರಾಜ್ಯಕ್ಕೆ ಎಂ.ಎಸ್.ಧೋನಿ ಪ್ರಚಾರ ರಾಯಭಾರಿ
ರಾಂಚಿ: ಟೀಂ ಇಂಡಿಯಾ ಸೀಮಿತ ಓವರ್ ಗಳ ನಾಯಕ ಎಂ.ಎಸ್. ಧೋನಿ ತಮ್ಮ ತವರು ರಾಜ್ಯ ಜಾರ್ಖಂಡ್ ನ ಪ್ರಚಾರ ರಾಯಭಾರಿಯಾಗಿ ಆಯ್ಕೆಯಾಗಿದ್ದಾರೆ. ತಮ್ಮ ಕರ್ತವ್ಯದ ಮೊದಲ ಹೆಜ್ಜೆಯಾಗಿ ಧೋನಿ ರಾಜ್ಯದ ಮೊದಲ ಜಾಗತಿಕ ಬಂಡವಾಳ ಸಮಾವೇಶದ ಪ್ರಚಾರ ಮಾಡಲಿದ್ದಾರೆ.
ಸಮಾವೇಶ ಮುಂದಿನ ವರ್ಷ ಫೆಬ್ರವರಿಯಲ್ಲಿ ನಡೆಯಲಿದೆ. “ಈಗಾಗಲೇ ಬಂಡವಾಳ ಸಮಾವೇಶದ ಕುರಿತಾಗಿ ಮಾಹಿತಿ ನೀಡುವ ಧೋನಿಯನ್ನು ಒಳಗೊಂಡಿರುವ ಜಾಹೀರಾತು ವಿಡಿಯೋವನ್ನು ಚಿತ್ರೀಕರಿಸಿದ್ದೇವೆ. ಮುಂದಿನ ತಿಂಗಳಿನಿಂದ ಅದನ್ನು ಟಿವಿಗೆ ಬಿಡುಗಡೆ ಮಾಡಲಿದ್ದೇವೆ” ಎಂದು ರಾಜ್ಯ ಕೈಗಾರಿಕಾ ಕಾರ್ಯರ್ಶಿ ಸುನಿಲ್ ಕುಮಾರ್ ಬನ್ಸ್ವಾಲ್ ತಿಳಿಸಿದ್ದಾರೆ.
ಹಲವು ಉತ್ಪನ್ನಗಳಿಗೆ ಪ್ರಚಾರ ರಾಯಭಾರಿಯಾಗಿ ದಾಖಲೆ ಮಾಡಿರುವ ಧೋನಿಗೆ ಇದು ಹೊಸ ಸವಾಲಾಗಿದೆ. ತವರು ರಾಜ್ಯವನ್ನು ಜನಪ್ರಿಯಗೊಳಿಸಲು ಅವರಿಗೆ ಸಿಕ್ಕಿದ ಸದವಕಾಶ ಇದಾಗಿದೆ.
