ಐಪಿಎಲ್ ಸ್ಫೋಟಕ ಬ್ಯಾಟ್ಸ್‌ಮನ್, ರಾಯಲ್ ಚಾಲೆಂಜರ್ಸ್ ನಾಯಕ ವಿರಾಟ್ ಕೊಹ್ಲಿಯನ್ನು ಯಾರಾದರೂ ತಡೆಯಲು ಸಾಧ್ಯವೇ? 919 ರನ್‌ಗಳು, 6 ಅರ್ಧಶತಕಗಳು ಮತ್ತು ನಾಲ್ಕು ಶತಕಗಳ ಬಳಿಕ 91.9 ಸರಾಸರಿಯೊಂದಿಗೆ ಮತ್ತು 152.4 ಸ್ಟ್ರೈಕ್ ರೇಟ್‌‍ನೊಂದಿಗೆ ವಿರಾಟ್ ಕೊಹ್ಲಿಯ ರನ್ ವೇಗವನ್ನು ತಡೆಯಲು ಸಾಧ್ಯವಿಲ್ಲ ಎನ್ನುವುದೇ ಇದಕ್ಕೆ ಉತ್ತರವಾಗಿದೆ.
ಆರ್‌ಸಿಬಿಗೆ ಹೆಚ್ಚು ಸಂತಸ ತಂದಿರುವ ವಿಷಯವೇನೆಂದರೆ, ಅವರು 2 ನೇ ಸ್ಥಾನಕ್ಕೆ ಜಿಗಿದಿರುವುದು. ಅವರಿಗೆ ಫೈನಲ್ ತಲುಪಲು 2 ಪಂದ್ಯಗಳು ಮಾತ್ರ ಬಾಕಿವುಳಿದಿದ್ದು, ಚಿನ್ನಸ್ವಾಮಿ ಸ್ಟೇಡಿಯಂ ಮೈದಾನದಲ್ಲಿ ಅವುಗಳನ್ನು ಆಡುವುದು ಪ್ಲಸ್ ಪಾಯಿಂಟ್ ಆಗಿ ಪರಿಣಮಿಸಲಿದೆ. ಮೊದಲ ಕ್ವಾಲಿಫೈಯರ್‌ನಲ್ಲಿ ಅವರು ಗುಜರಾತ್ ಲಯನ್ಸ್ ತಂಡವನ್ನು ಎದುರಿಸಲಿದ್ದು, ಅದನ್ನು ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ಆಡಲಾಗುತ್ತದೆ. ಕಳೆದ ಬಾರಿಯ ಪಂದ್ಯದಲ್ಲಿ ರಾಯಲ್ ಚಾಲೆಂಜರ್ಸ್ 248ಕ್ಕೆ 3 ವಿಕೆಟ್ ಗಳಿಸಿದ್ದು, ಈ ಆವೃತ್ತಿಯಲ್ಲೇ ಅತ್ಯಧಿಕ ಸ್ಕೋರಾಗಿದೆ.
ಟ್ವೆಂಟಿ 20 ಇತಿಹಾಸದಲ್ಲಿ ಪಂದ್ಯಾವಳಿಯ ಒಂದು ಆವೃತ್ತಿಯಲ್ಲಿ 1000 ರನ್ ಸ್ಕೋರ್ ಮಾಡಿದ ಪ್ರಥಮ ಬ್ಯಾಟ್ಸ್‌ಮನ್ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಲು ಕೊಹ್ಲಿಗೆ ಕೇವಲ 81 ರನ್‌ಗಳು ಮಾತ್ರ ಬಾಕಿವುಳಿದಿದೆ. ಎಲ್ಲಾ ಟ್ವೆಂಟಿ 20 ಲೀಗ್‌ಗಳಲ್ಲಿ ಅತ್ಯಧಿಕ ಸ್ಕೋರು 2012 ಮತ್ತು 2013ರ ಸೀಸನ್‌ನಲ್ಲಿ ಕ್ರಮವಾಗಿ ಕ್ರಿಸ್ ಗೇಲ್ ಮತ್ತು ಮೈಕೇಲ್ ಹಸ್ಸಿ ಅವರ 733 ರನ್‌ಗಳಾಗಿವೆ. ಆರ್‌ಸಿಬಿ ಇನ್ನೆರಡು ಪಂದ್ಯಗಳನ್ನು ಆಡುವುದು ನಿಶ್ಚಿತವಾದ್ದರಿಂದ ಕೊಹ್ಲಿ 2016ರ ಸೀಸನ್‌ನಲ್ಲಿ 1000 ರನ್ ಮಾಡಿ ಇತಿಹಾಸ ನಿರ್ಮಿಸುವ ಮಾರ್ಗದಲ್ಲಿದ್ದಾರೆ.
ಡೆಲ್ಲಿ ಡೇರ್‌ ಡೆವಿಲ್ಸ್ ವಿರುದ್ಧ ಪಂದ್ಯದ ಸಂದರ್ಭದಲ್ಲಿ, ಕೊಹ್ಲಿ 2016ರ ತಮ್ಮ ದಾಖಲೆಗಳ ಗುಂಪಿಗೆ 17 ನೇ 50+ ಸ್ಕೋರ್ ಮಾಡುವ ಮೂಲಕ ಇನ್ನೊಂದು ದಾಖಲೆ ಸೇರಿದ್ದಾರೆ. ಕ್ರಿಸ್ ಗೇಲ್ 2012ರಲ್ಲಿ 16 50+ ಸ್ಕೋರ್ ಮಾಡಿದ ದಾಖಲೆಯನ್ನು ಕೊಹ್ಲಿ ಮುರಿದಿದ್ದಾರೆ.
