ಬೆಂಗಳೂರು: ಸಾಮಾನ್ಯವಾಗಿ ರಾತ್ರಿ ಮಿಕ್ಕಿದ ಅನ್ನವನ್ನು ನಾವು ಕಸದ ಬುಟ್ಟಿಗೆ ಸೇರಿಸುವುದಿಲ್ಲ. ಅನ್ನ ದುಬಾರಿಯಾಗಿರುವ ಈ ಕಾಲದಲ್ಲಿ ಅದನ್ನು ಬಿಸಿ ಮಾಡಿಯೋ, ಚಿತ್ರಾನ್ನ ಮಾಡಿಯೋ ಮರಳಿ ಉಪಯೋಗಿಸುತ್ತೇವೆ.
ಆದರೆ ಆಹಾರ ಗುಣಮಟ್ಟ ಇಲಾಖೆಯ ತಜ್ಞರ ಪ್ರಕಾರ ಹೀಗೆ ಮಾಡಲೇಬಾರದಂತೆ. ಅಂದರೆ ಮಿಕ್ಕಿದ ಅನ್ನವನ್ನು ಬಿಸಿ ಮಾಡಿ ಬಳಸಬಾರದು ಎಂದಿದ್ದಾರೆ ತಜ್ಞರು. ಇದು ರೋಗಗಳಿಗೆ ದಾರಿ ಮಾಡಿಕೊಟ್ಟಂತೆ ಎನ್ನುವುದು ಇಲಾಖೆಯ ಅಭಿಪ್ರಾಯ.
ಮಿಕ್ಕಿದ ಅನ್ನದಲ್ಲಿರುವ ಬ್ಯಾಸಿಲ್ಲಾ ಸಿರಸ್ ಎನ್ನುವ ಬ್ಯಾಕ್ಟೀರಿಯಾದಿಂದಾಗಿ ಅದನ್ನು ಬಿಸಿ ಮಾಡಿ ಬಳಕೆ ಮಾಡುವುದರಿಂದ ಫುಡ್ ಪಾಯಿಸನ್ ನಂತಹ ಸಮಸ್ಯೆ ಬರಬಹುದೆಂದು ತಜ್ಞರು ಹೇಳುತ್ತಾರೆ. ಬಿಸಿ ಮಾಡುವುದರಿಂದ ಈ ಬ್ಯಾಕ್ಟೀರಿಯಾ ನಾಶವಾಗಿ ಹೊಸ ವಿಷಾಹಾರವಾಗಿ ಮಾರ್ಪಾಡಾಗುತ್ತದಂತೆ.
ಮತ್ತೆ ಬಿಸಿ ಮಾಡಿ ರೂಂ ಟೆಂಪರೇಚರ್ ಗೆ ಇಟ್ಟಾಗ ಆಹಾರದಲ್ಲಿರುವ ವಿಷಾಂಶ ಹೆಚ್ಚುತ್ತದೆ. ಇದರಿಂದ ಆರೋಗ್ಯ ಸಮಸ್ಯೆ ಉಂಟಾಗಬಹುದು ಎಂದು ತಜ್ಞರು ಹೇಳಿದ್ದಾರೆ.
