Flipkartಗೆ 35 ಬಿಲಿಯನ್ ಡಾಲರ್ ದಂಡ ವಿಧಿಸುವ ಎಚ್ಚರಿಕೆ: ಇ.ಡಿ ನೋಟಿಸ್

ಹೊಸದಿಲ್ಲಿ: ವಿದೇಶಿ ವಿನಿಮಯ ಉಲ್ಲಂಘನೆ ಆರೋಪದಲ್ಲಿ ಫ್ಲಿಪ್ಕಾರ್ಟ್, ಅದರ ಸಂಸ್ಥಾಪಕರು ಮತ್ತು ಇತರೆ ಒಂಬತ್ತು ಮಂದಿಗೆ ಜಾರಿ ನಿರ್ದೇಶನಾಲಯದ (ಇಡಿ) ನೋಟಿಸ್ ಜಾರಿ ಮಾಡಿದೆ. ವಿದೇಶಿ ಹೂಡಿಕೆ ಕಾನೂನುಗಳನ್ನು ಉಲ್ಲಂಘಿಸಿದ ಆರೋಪದಲ್ಲಿ ಅವರ ಮೇಲೆ 1.35 ಬಿಲಿಯನ್ ಡಾಲರ್ ದಂಡವನ್ನು ಏಕೆ ವಿಧಿಸಬಾರದು ಎಂಬುದಕ್ಕೆ ವಿವರಣೆ ನೀಡುವಂತೆ ಅವರಿಗೆ ಸೂಚಿಸಲಾಗಿದೆ.

ಹೈಲೈಟ್ಸ್:
•ವಿದೇಶಿ ನೇರ ಬಂಡವಾಳ ಹೂಡಿಕೆ ನಿಯಮ ಉಲ್ಲಂಘನೆ ಆರೋಪ
•ಫೆಮಾ ನಿಯಮ ಉಲ್ಲಂಘಿಸಿದ್ದಕ್ಕೆ 1.35 ಬಿಲಿಯನ್ ಡಾಲರ್ ದಂಡದ ಎಚ್ಚರಿಕೆ
•ಫ್ಲಿಪ್ಕಾರ್ಟ್ ಹಾಗೂ ಇತರೆ ಸಂಸ್ಥೆಗಳಿಂದ ವಿವರಣೆ ಕೇಳಿದ ಇ.ಡಿ
2009 ರಿಂದ 2015ರ ನಡುವೆ ವಿದೇಶಿ ಹೂಡಿಕೆಗಳನ್ನು ಸೆಳೆಯುವಾಗ ಫೆಮಾ ನಿಯಮಗಳನ್ನು ಫ್ಲಿಪ್ಕಾರ್ಟ್ ಉಲ್ಲಂಘನೆ ಮಾಡಿದೆ ಎಂದು ಇ.ಡಿ ಮೂಲಗಳು ತಿಳಿಸಿವೆ.
'ವಿದೇಶಿ ನೇರ ಹೂಡಿಕೆ (ಎಫ್ಡಿಐ) ನಿಯಮಗಳು ಸೇರಿದಂತೆ, ಭಾರತದ ಕಾನೂನು ಮತ್ತು ನಿಯಂತ್ರಣ ಕ್ರಮಗಳಿಗೆ ಫ್ಲಿಪ್ಕಾರ್ಟ್ ಒಳಪಟ್ಟಿದೆ. ನೋಟಿಸ್ ಪ್ರಕಾರ 2009-2015ರವರೆಗಿನ ವಹಿವಾಟಿಗೆ ಸಂಬಂಧಿಸಿದಂತೆ ಅವರು ಬಯಸಿರುವ ವಿವರಗಳ ವಿಚಾರದಲ್ಲಿ ಅಧಿಕಾರಿಗಳಿಗೆ ಸಹಕಾರ ನೀಡುತ್ತೇವೆ' ಎಂದು ಫ್ಲಿಪ್ಕಾರ್ಟ್ ಪ್ರತಿಕ್ರಿಯೆ ನೀಡಿದೆ.
ಬಹು-ಬ್ರ್ಯಾಂಡ್ ರೀಟೇಲ್ಗಳನ್ನು ಕಠಿಣವಾಗಿ ನಿರ್ಬಂಧಿಸುವ ಹಾಗೂ ಅಂತಹ ಕಂಪೆನಿಗಳು ಮಾರಾಟಗಾರರಿಗೆ ಮಾರುಕಟ್ಟೆ ಸ್ಥಳವಾಗಿ ಮಾತ್ರ ಕಾರ್ಯನಿರ್ವಹಿಸುವಂತೆ ಸೀಮಿತಗೊಳಿಸುವ ವಿದೇಶಿ ಹೂಡಿಕೆ ಕಾನೂನುಗಳನ್ನು ಇ- ಕಾಮರ್ಸ್ ದಿಗ್ಗಜರಾದ ಫ್ಲಿಪ್ಕಾರ್ಟ್ ಮತ್ತು ಅಮೆಜಾನ್ ಕೆಲವು ಸಮಯ ಉಲ್ಲಂಘನೆ ಮಾಡಿದ್ದವು ಎಂಬ ಆರೋಪದ ಬಗ್ಗೆ ಇ.ಡಿ ತನಿಖೆ ನಡೆಸುತ್ತಿದೆ.
ಫ್ಲಿಪ್ಕಾರ್ಟ್ ತನಗೆ ಹಾಗೂ ತನಗೆ ಸಂಬಂಧಿಸಿದ ಡಬ್ಲ್ಯೂಎಸ್ ರೀಟೇಲ್ಗೆ ವಿದೇಶಿ ಬಂಡವಾಳವನ್ನು ಸೆಳೆದುಕೊಂಡು, ಬಳಿಕ ತನ್ನ ಮಾರಾಟ ವೆಬ್ಸೈಟ್ನಲ್ಲಿ ಗ್ರಾಹಕರಿಗೆ ವಸ್ತುಗಳನ್ನು ಮಾರಾಟ ಮಾಡಿತ್ತು. ಇದು ಕಾನೂನಿಗೆ ವಿರುದ್ಧವಾಗಿದೆ ಎಂದು ಇ.ಡಿ ಮೂಲಗಳು ತಿಳಿಸಿವೆ. ಫ್ಲಿಪ್ಕಾರ್ಟ್ ಸಂಸ್ಥಾಪಕರಾದ ಸಚಿನ್ ಬನ್ಸಾಲ್ ಮತ್ತು ಬಿನ್ನಿ ಬನ್ಸಾಲ್, ಪ್ರಸ್ತುತ ಹೂಡಿಕೆದಾರ ಟೈಗರ್ ಗ್ಲೋಬಲ್ ಮುಂತಾದವರಿಗೆ ನೋಟಿಸ್ ನೀಡಲಾಗಿದೆ.