ಮುಂಬೈ: ರಿಲಯನ್ಸ್ ಉದ್ಯಮಿ ಮುಕೇಶ್ ಅಂಬಾನಿ ಕುಟುಂದಲ್ಲಿ ಈಗ ಮದುವೆ ಸಂಭ್ರಮ ಮನೆ ಮಾಡಿದೆ. ಮುಕೇಶ್ ಪುತ್ರ ಅನಂತ್ ಅಂಬಾನಿ ಸದ್ಯದಲ್ಲಿಯೇ ವೈವಾಹಿಕ ಜೀವನಕ್ಕೆ ಕಾಲಿಡುತ್ತಿದ್ದಾರೆ.
ಅನಂತ್ ಹಾಗೂ ಅವರ ಬಹುಕಾಲದ ಗೆಳತಿ ರಾಧಿಕಾ ಮರ್ಚೆಂಟ್ ವಿವಾಹ ಸಮಾರಂಭಕ್ಕೆ ಈಗಲೇ ಸಿದ್ಧತೆ ಶುರುವಾಗಿದೆ. ಇದೀಗ ಮುಕೇಶ್ ಅಂಬಾನಿ ದಂಪತಿ ಸೊಸೆ ರಾಧಿಕಾ ಮರ್ಚೆಂಟ್ ಗೆ ನೀಡಿದ ದುಬಾರಿ ಉಡುಗೊರೆ ಭಾರೀ ಸುದ್ದಿ ಮಾಡುತ್ತಿದೆ. ಹೇಳಿ, ಕೇಳಿ ಸಾವಿರಾರು ಕೋಟಿಗಳ ಒಡೆಯ. ಹೀಗಿರುವಾಗ ಅವರ ವರ್ಚಸ್ಸಿಗೆ ತಕ್ಕಂತೇ ಉಡುಗೊರೆ ನೀಡಬೇಕಲ್ಲವೇ?
ಅಂಬಾನಿ ದಂಪತಿ ತಮ್ಮ ಮುದ್ದಿನ ಸೊಸೆ ರಾಧಿಕಾಗೆ ಬೆಳ್ಳಿಯ ಲಕ್ಷ್ಮಿ-ಗಣಪತಿಯ ವಿಗ್ರಹವಿರುವ ಉಡುಗೊರೆ ನೀಡಿದೆ. ಇದರಲ್ಲಿ ಬೆಳ್ಳಿಯ ತುಳಸಿ ಪಾತ್ರೆಗಳೂ ಇವೆ. ಇದಕ್ಕೆ ಮೊದಲು ಕಳೆದ ವರ್ಷ ನಿಶ್ಚಿತಾರ್ಥದ ಸಂದರ್ಭದಲ್ಲಿ ರಾಧಿಕಾಗೆ ಮುಕೇಶ್ ದಂಪತಿ ದುಬಾರಿ ಬೆಲೆಯ ಕಾರೊಂದನ್ನು ಉಡುಗೊರೆಯಾಗಿ ನೀಡಿದ್ದರು. ಈ ಕಾರಿನ ಬೆಲೆ ಬರೋಬ್ಬರಿ 4.5 ಕೋಟಿ ರೂ.ಗಳಾಗಿತ್ತು. ಇದು ಭಾರತದಲ್ಲಿ ಕೆಲವೇ ಕೆಲವು ಸೆಲೆಬ್ರಿಟಿಗಳ ಬಳಿ ಮಾತ್ರವಿದೆ.
ಇದಕ್ಕೆ ಮೊದಲು ಮುಕೇಶ್ ದಂಪತಿ ತಮ್ಮ ಮೊದಲ ಸೊಸೆ ಶ್ಲೋಕಾ ಮೆಹ್ತಾಗೂ ದುಬಾರಿ ಉಡುಗೊರೆ ನೀಡಿದ್ದರು. ಶ್ವೇತಾಗೆ 450 ಕೋಟಿ ರೂ. ಬೆಲೆಯ ವಜ್ರದ ನೆಕ್ಲೇಸ್ ಒಂದನ್ನು ಉಡುಗೊರೆಯಾಗಿ ನೀಡಿದ್ದರು. ಮದುವೆ ವೇಳೆ ರಾಧಿಕಾಗೆ ಮಾವ-ಅತ್ತೆ ಕಡೆಯಿಂದ ಮತ್ತಷ್ಟು ಉಡುಗೊರೆಗಳು ಸಿಗುವುದು ಗ್ಯಾರಂಟಿ.
