ಧ್ರುವ ಸರ್ಜಾ ಇಂದು 36 ನೆಯ ಹುಟ್ಟುಹಬ್ಬ ಆಚರಿಸಿಕೊಳ್ಳುತ್ತಿದ್ದಾರೆ. ಧ್ರುವ ಚಿತ್ರರಂಗಕ್ಕೆ ಕಾಲಿಟ್ಟು 12 ವರ್ಷವೇ ಆಗಿದೆ. ಅದ್ಧೂರಿ ಸಿನಿಮಾ ಮೂಲಕ ಅವರು ನಾಯಕನಾಗಿ ತೆರೆಗೆ ಎಂಟ್ರಿ ಕೊಟ್ಟಿದ್ದರು. ಆದರೆ ಚಿತ್ರರಂಗಕ್ಕೆ ಕಾಲಿಟ್ಟ ವರ್ಷಗಳಷ್ಟೂ ಧ್ರುವ ಸಿನಿಮಾ ಮಾಡಿಲ್ಲ.
ಧ್ರುವ ಇಷ್ಟು ವರ್ಷಗಳಲ್ಲಿ ಮಾಡಿದ್ದು ಕೇವಲ ಐದು ಸಿನಿಮಾ ಮಾತ್ರ. ಈಗ ಬಿಡುಗಡೆಯಾಗಲಿರುವ ಅವರ ಮಾರ್ಟಿನ್ ಸಿನಿಮಾ ಆರನೆಯ ಸಿನಿಮಾವಾಗಿದ್ದು ಇದೇ ವಾರಂತ್ಯಕ್ಕೆ ಬಿಡುಗಡೆಯಾಗಲಿದೆ. ಇದಲ್ಲದೆ ಜೋಗಿ ಪ್ರೇಮ್ ನಿರ್ದೇಶನದಲ್ಲಿ ಕೆಡಿ ಸಿನಿಮಾದಲ್ಲಿ ಅಭಿನಯಿಸಿದ್ದಾರೆ. ಅದಿನ್ನೂ ಶೂಟಿಂಗ್ ಹಂತದಲ್ಲಿದೆ. ಈ ವರ್ಷ ಫುಲ್ ಬ್ಯುಸಿಯಾಗಿರುವ ಧ್ರುವ ಒಟ್ಟೊಟ್ಟಿಗೇ ಎರಡು ಸಿನಿಮಾ ಕೊಡುವ ನಿರೀಕ್ಷೆಯಲ್ಲಿದ್ದಾರೆ.
ಧ್ರುವ ಸರ್ಜಾ ಮತ್ತು ಅಣ್ಣ ಚಿರು ಸರ್ಜಾ ರಾಮ-ಲಕ್ಷ್ಮಣರಂತಿದ್ದರು. ಆದರೆ ಚಿರು ಸರ್ಜಾ 2020 ರಲ್ಲಿ ತೀರಿಕೊಂಡಾಗ ಧ್ರುವ ತೀರಾ ಡಲ್ ಆಗಿದ್ದರು. ಹಾಗಿದ್ದರೂ ಈಗಲೂ ತಮ್ಮ ಜೀವನದ ಪ್ರತೀ ಕ್ಷಣದಲ್ಲೂ ಅಣ್ಣನನ್ನು ನೆನೆಸಿಕೊಳ್ಳುತ್ತಲೇ ಇರುತ್ತಾರೆ. ಚಿರು ಸರ್ಜಾಗಿಂತ ಧ್ರುವ ನಾಲ್ಕು ವರ್ಷ ಚಿಕ್ಕವರು. ಈಗ ಅಣ್ಣನಿಲ್ಲದೇ ಇದ್ದರೂ ತಮ್ಮ ಅಭಿಮಾನಿಗಳಲ್ಲಿ ತಮ್ಮ ಅಣ್ಣನ ಪ್ರೀತಿ ಕಾಣುತ್ತಿದ್ದಾರೆ.
