ರಿಯಲ್ ಸ್ಟಾರ್ ಉಪೇಂದ್ರ ನಟಿಸಿರುವ ಐ ಲವ್ ಯೂ ಚಿತ್ರವೀಗ ಬಿಡುಗಡೆಯ ಕಡೇಯ ಕ್ಷಣಗಳಲ್ಲಿ ಅಗಾಧವಾದ ನಿರೀಕ್ಷೆಗಳನ್ನು ಹುಟ್ಟು ಹಾಕಿದೆ. ವಿಶೇಷವೆಂದರೆ, ಉಪ್ಪಿ, ನಾಯಕಿಯರಾದ ರಚಿತಾ ರಾಮ್ ಮತ್ತು ಸೋನು ಗೌಡ ಪಾತ್ರಗಳ ಬಗ್ಗೆಯೂ ಜನ ತಲೆ ಕೆಡಿಸಿಕೊಂಡಿದ್ದಾರೆ. ಈಗಾಗಲೇ ಬಿಡುಗಡೆಯಾಗಿರೋ ಎರಡು ಟ್ರೈಲರ್ ಮೂಲಕ ಎಲ್ಲವನ್ನೂ ಹೇಳಿದಂತೆ ಮಾಡಿ ಏನನ್ನೂ ಹೇಳದಂಥಾ ಟ್ರಿಕ್ಸು ಅನುಸರಿಸೋ ಮೂಲಕ ಚಂದ್ರು ಇಂಥಾ ಕುತೂಹಲವನ್ನು ಕಾಪಿಟ್ಟುಕೊಂಡಿದ್ದಾರೆ.
ಬೇರೆಯವರ ಕಥೆ ಹಾಗಿರಲಿ, ಖುದ್ದು ಕಿಚ್ಚ ಸುದೀಪ್ ಅವರೇ ಐ ಲವ್ ಯೂ ಪಾತ್ರಗಳ ಬಗ್ಗೆ ಕುತೂಹಲಗೊಂಡಿದ್ದಾರೆ. ಇತ್ತೀಚೆಗೆ ಈ ಚಿತ್ರದ ಎರಡನೇ ಟ್ರೈಲರ್ ಅನ್ನು ಸುದೀಪ್ ಬಿಡುಗಡೆಗೊಳಿಸಿದ್ದರು. ಈ ಸಂರ್ಭದಲ್ಲಿ ಅದರಲ್ಲಿದ್ದ ಕೆಲ ಪಾತ್ರಗಳ ಬಗ್ಗೆ ಕುತೂಹಲದ ಮಾತಾಡಿದ್ದರು. ಉಪ್ಪಿ ಸೇರಿದಂತೆ ಎಲ್ಲರ ಪಾತ್ರಗಳ ನಿಜವಾದ ಸ್ವರೂಪದ ಬಗ್ಗೆ ತಾವೂ ಕಾತರರಾಗಿರೋದಾಗಿ ಹೇಳಿಕೊಂಡಿದ್ದರು.
ಅದರಲ್ಲಿಯೂ ಸೋನು ಗೌಡ ಪಾತ್ರವನ್ನಂತೂ ಕಿಚ್ಚಾ ಬಹುವಾಗಿ ಮೆಚ್ಚಿಕೊಂಡಿದ್ದರು. ಟ್ರೈಲರಿನಲ್ಲಿ ಸಿಕ್ಕಿರೋ ಸಣ್ಣ ಝಲಕ್ಕಿನಲ್ಲಿಯೇ ಸೋನು ಗೌಡ ಚೆಂದಗೆ ಕಾಣಿಸಿಕೊಂಡಿದ್ದಾರೆ. ಅವರ ಪಾತ್ರವೂ ವಿಶೇಷವಾಗಿಯೇ ಇದ್ದಂತಿದೆ ಎಂಬ ಮೆಚ್ಚುಗೆಯ ಮಾತುಗಳನ್ನೂ ಆಡಿದ್ದರು. ಸೋನು ಗೌಡ ಇಲ್ಲಿ ಗೃಹಿಣಿಯ ಪಾತ್ರದಲ್ಲಿ ನಟಿಸಿದ್ದಾರೆಂಬ ಸುಳಿವಷ್ಟೇ ಹೊರ ಬಿದ್ದಿದೆ. ಆದರೆ ಆ ಪಾತ್ರಕ್ಕೆ ನಾನಾ ಶೇಡುಗಳಿವೆಯಂತೆ. ಇನ್ನುಳಿದಂತೆ ರಚಿತಾ ರಾಮ್ ಪಾತ್ರವೂ ಹೀಗೇ ಇರಬಹುದೆಂದು ಜನ ಅಂದುಕೊಂಡಿದ್ದಾರೆ. ಆದರೆ ರಚಿತಾ ಪಾತ್ರವೂ ಕೂಡಾ ಪ್ರೇಕ್ಷಕರಿಗೆ ನಾನಾ ಅಚ್ಚರಿಗಳನ್ನು ಕಾಯ್ದಿಟ್ಟುಕೊಂಡಿದೆಯಂತೆ!
