ಹೈದರಾಬಾದ್: ಟಾಲಿವುಡ್ ನಟ ಪ್ರಭಾಸ್ ಮದುವೆ ಯಾವಾಗ ಎಂದು ಅಭಿಮಾನಿಗಳು ಬಹಳ ಸಮಯದಿಂದ ಪ್ರಶ್ನೆ ಮಾಡುತ್ತಲೇ ಇದ್ದಾರೆ. ಆದರೆ ಇದೀಗ ಪ್ರಭಾಸ್ ಮಾಡಿರುವ ಪೋಸ್ಟ್ ಒಂದು ಎಲ್ಲರ ಗಮನ ಸೆಳೆಯುತ್ತಿದೆ.
ತಮ್ಮ ಸೋಷಿಯಲ್ ಮೀಡಿಯಾ ಪುಟದಲ್ಲಿ ಪ್ರಭಾಸ್ ‘ಡಾರ್ಲಿಂಗ್ಸ್, ಕೊನೆಗೂ ವಿಶೇಷ ವ್ಯಕ್ತಿ ನನ್ನ ಜೀವನಕ್ಕೆ ಪ್ರವೇಶಿಸುತ್ತಿದ್ದಾರೆ. ಕೆಲವೇ ದಿನ ಕಾಯಿರಿ’ ಎಂದು ಸಂದೇಶ ಬರೆದಿದ್ದಾರೆ. ಪ್ರಭಾಸ್ ಇಂತಹದ್ದೊಂದು ಸಂದೇಶ ಬರೆಯುತ್ತಿದ್ದಂತೇ ಅಭಿಮಾನಿಗಳಲ್ಲಿ ಹಲ್ ಚಲ್ ಶುರುವಾಗಿದೆ.
ಪ್ರಭಾಸ್ ಮದುವೆ ಬಗ್ಗೆಯೇ ಹೇಳುತ್ತಿರಬಹುದು ಎಂದು ಊಹಿಸಿದ್ದಾರೆ. ವಿಶೇಷ ವ್ಯಕ್ತಿ ಎಂದು ಪ್ರಭಾಸ್ ಉಲ್ಲೇಖಿಸಿರುವುದು ಯಾರ ಬಗ್ಗೆ ಇರಬಹುದು ಎಂದು ನೆಟ್ಟಿಗರು ಚರ್ಚೆ ಆರಂಭಿಸಿದ್ದಾರೆ. ಪ್ರಭಾಸ್ ಮದುವೆ ಬಗ್ಗೆ ಹೇಳಿರಬಹುದು ಎಂದು ಕೆಲವರು ಹೇಳಿದರೆ ಮತ್ತೆ ಕೆಲವರು ಹೊಸ ಸಿನಿಮಾ ಬಗ್ಗೆ ಈ ರೀತಿ ಹೈಪ್ ಕ್ರಿಯೇಟ್ ಮಾಡಿರಬಹುದು ಎನ್ನುತ್ತಿದ್ದಾರೆ.
ಅದೇನೇ ಇರಲಿ, ಪ್ರಭಾಸ್ ಮದುವೆ ಬಗ್ಗೆ ಹಲವು ಸಮಯದಿಂದ ಗಾಸಿಪ್ ಗಳು ಕೇಳಿಬರುತ್ತಲೇ ಇದ್ದವು. ಪ್ರಭಾಸ್ ಹೆಸರು ಅನುಷ್ಕಾ ಶೆಟ್ಟಿ ಜೊತೆ, ಕೃತಿ ಸನನ್ ಜೊತೆಗೂ ಥಳುಕು ಹಾಕಿಕೊಂಡಿತ್ತು. ಆದರೆ ಇದೆಲ್ಲವೂ ಸುಳ್ಳಾಯಿತು. ಈಗ ಪ್ರಭಾಸ್ ಜೀವನಕ್ಕೆ ಎಂಟ್ರಿ ಕೊಟ್ಟಿರುವ ಹೊಸಬರು ಯಾರು ಎಂಬ ಕುತೂಹಲ ಎಲ್ಲರಲ್ಲಿದೆ.
