ನಟಿ ರಕ್ಷಿತಾ ಮೇಲೆ ಕಿಡಿಕಾರಿದ ರವಿಚಂದ್ರನ್ ಅಭಿಮಾನಿಗಳು. ಕಾರಣವೇನು ಗೊತ್ತಾ?

ಬೆಂಗಳೂರು : ನಟಿ ರಕ್ಷಿತಾ  ತಮ್ಮ ಪತಿ ಪ್ರೇಮ್ ವಿರುದ್ಧ ಕಮೆಂಟ್ ಮಾಡುತ್ತಿರುವವರಿಗೆ ಟಾಂಗ್ ಕೊಡುವುದರ ಮೂಲಕ ಇದೀಗ ರವಿಚಂದ್ರನ್ ಅಭಿಮಾನಿಗಳ ಕೆಂಗಣ್ಣಿಗೆ ಗುರಿಯಾಗಿದ್ದಾರೆ.

ನಿರ್ದೇಶಕ ಪ್ರೇಮ್ ಅವರ ‘ದಿ ವಿಲನ್’ ಚಿತ್ರ ಭರ್ಜರಿ ಪ್ರದರ್ಶನ ಕಾಣುತ್ತಿದ್ದರೂ ಕೂಡ ಕೆಲವರು ಈ ಚಿತ್ರದ ವಿರುದ್ಧ ಅಪಪ್ರಚಾರ ಮಾಡುತ್ತಿದ್ದರು. ಈ ಬಗ್ಗೆ ಸಿಟ್ಟಾದ ನಟಿ ರಕ್ಷಿತಾ ಸಾಮಾಜಿಕ ಜಾಲತಾಣದಲ್ಲಿ ಪತ್ರವೊಂದನ್ನು ಪೋಸ್ಟ್ ಮಾಡಿದ್ದು ,ಇದರಲ್ಲಿ ರವಿಚಂದ್ರನ್ ಅವರ ಪ್ರೇಮಲೋಕ ಚಿತ್ರದ ಬಗ್ಗೆಯೂ ಉಲ್ಲೇಖಿಸಿದ್ದರು. ಇದು ರವಿಚಂದ್ರನ್ ಅಭಿಮಾನಿಗಳನ್ನು ಕೆರಳಿಸಿದೆ.

ರಕ್ಷಿತಾ ಈ ಪತ್ರದಲ್ಲಿ ರವಿಚಂದ್ರನ್ ಅವರಿಗೆ ತಂದೆಯ ಶ್ರೀಮಂತ ಹಿನ್ನೆಲೆ ಸಾಥ್ ನೀಡಿತ್ತು. ನಾದಬ್ರಹ್ಮ ಹಂಸಲೇಖಾ ಅವರಂಥಾ ಮಹನೀಯರು ಜೊತೆಗಿದ್ದರು. ಆ ಪ್ರೇಮಲೋಕ ಮತ್ತು ಇತ್ತೀಚೆಗೆ ತೆರೆ ಕಂಡಿದ್ದ ಟಗರು ಚಿತ್ರದಲ್ಲಿಯೂ ಕಥೆ ಇರಲಿಲ್ಲ. ಆದರೂ ಅವುಗಳನ್ನು ಜನ ನೋಡಿಲ್ವಾ? ಗೆಲ್ಲಿಸಿಲ್ವಾ ಎಂಬರ್ಥದಲ್ಲಿ ರಕ್ಷಿತಾ ಬರೆದುಕೊಂಡಿದ್ದರು.

ಇದರಿಂದ ಕೆಂಡಮಂಡಲಾದ ರವಿಚಂದ್ರನ್ ಅಭಿಮಾನಿಗಳು ಪ್ರೇಮಲೋಕ ಸಿನಿಮಾ ಅರ್ಥವಾಗದಿದ್ದರೆ ಇನ್ನೊಂದು ಸಲ ನೋಡಿ ಅರ್ಥ ಮಾಡಿಕೊಳ್ಳಿ. ತಂತ್ರಜ್ಞಾನ ಕುಂಟುತ್ತಿದ್ದ ಕಾಲದಲ್ಲಿಯೇ ಇಡೀ ಭಾರತೀಯ ಚಿತ್ರರಂಗ ಕನ್ನಡದತ್ತ ತಿರುಗಿ ನೋಡುವಂತೆ ಮಾಡಿದ್ದು ನಮ್ಮ ಪ್ರೇಮಲೋಕ. ಅಂಥಾ ಚಿತ್ರದಲ್ಲಿ ಕಥೆ ಇಲ್ಲ ಅಂತ ಹೇಳಬೇಡಿ ಎಂದು ರಕ್ಷಿತಾ ವಿರುದ್ಧ ಕಿಡಿಕಾರಿದ್ದಾರೆ.

ತಾಜಾ ಸುದ್ದಿಗಳನ್ನು ಓದಲು ವೆಬ್‌ದುನಿಯಾ ಮೊಬೈಲ್ ಆ್ಯಪ್ ಡೌನ್‍ ಲೋಡ್ ಮಾಡಿಕೊಳ್ಳಿ.