ಇತ್ತೀಚಿಗೆ ರಾಷ್ಟ್ರೀಯ ಸುದ್ದಿ ವಾಹಿನಿಯೊಂದರ ಜತೆ ಮಾತನ್ನಾಡುತ್ತಿದ್ದ ಪ್ರಧಾನಿ ಮೋದಿ, ರಾಜಕಾರಣಿಗಳ ಹಿಂದೆ ಓಡುವುದರ ಬದಲು ಕ್ರೀಡಾಪಟುಗಳ ಹಿಂದೆ ಓಡಿ. ಅವರ ಪ್ರತಿದಿನದ ಹೋರಾಟವನ್ನು ದೇಶದ ಮುಂದಿಡಿ, ಎಂದು ಮಾಧ್ಯಮದವರಿಗೆ ಕಿವಿ ಮಾತು ಹೇಳಿದ್ದರು.
ತಮ್ಮ ಸಾಧನೆ ಮೂಲಕ ನಮ್ಮ ದೇಶಕ್ಕೆ ಹೆಮ್ಮೆ ತರುವ ಕ್ರೀಡಾಪಟುಗಳು ಪ್ರತಿದಿನ ಅದಕ್ಕಾಗಿ ಬೆವರು ಸುರಿಸುತ್ತಾರೆ. ಇದನ್ನು ಮುಖ್ಯಾಂಶವನ್ನಾಗಿಸಿ. ರಾಜಕಾರಣಿಗಳ ಬೆನ್ನಿಗೆ ಓಡುವ ಬದಲು ಮಾಧ್ಯಮಗಳು ಭಾರತೀಯ ಕ್ರೀಡಾಪಟುಗಳ ಪರಿಶ್ರಮದ ಕಥೆಯನ್ನು ಬೆಳಕಿಗೆ ತರಬೇಕು. ನೀವು ರಿಯೋಗೆ ಹೋಗಿದ್ದ 30 ಕ್ರೀಡಾಪಟುಗಳನ್ನು ಆಯ್ಕೆ ಮಾಡಿಕೊಳ್ಳಿ. ಅವರ ದೈನಂದಿನ ವೇಳಾಪಟ್ಟಿ ಏನೆಂಬುದನ್ನು ದೇಶಕ್ಕೆ ತೋರಿಸಿ. ಅವರ ಪರಿಶ್ರಮದ ಕಥೆಯನ್ನು ನೋಡಿಯಾದರೂ ನಮ್ಮ ಕ್ರೀಡಾಪಟುಗಳನ್ನು ನೋಡುವ ದೃಷ್ಟಿಯಲ್ಲಿ ಬದಲಾವಣೆಯಾಗಬಹುದು. ದೇಶವನ್ನು ಪ್ರತಿನಿಧಿಸುವ ಮುನ್ನ ಭಾರತೀಯ ಕ್ರೀಡಾಪಟು 10-12 ವರ್ಷ ಕಠಿಣ ಪರಿಶ್ರಮ, ತರಬೇತಿ ಪಡೆಯುತ್ತಾನೆ. ತಾವು ಯಶಸ್ಸು ಗಳಿಸದಿದ್ದರೂ ಕಠಿಣ ಪರಿಶ್ರಮದ ಜತೆ ರಾಜಿಯಾಗುವುದಿಲ್ಲ ಎಂದು ಪ್ರಧಾನಿ ಹೇಳಿದ್ದರು.
ಮೋದಿ ಅವರ ಈ ಹೇಳಿಕೆಗೆ ಪ್ರತಿಕ್ರಿಯಿಸಿರುವ ಸುಶೀಲ್ ಕುಮಾರ್, ಕ್ರೀಡಾಪಟುಗಳಿಗಾಗಿ ಇಷ್ಟೊಂದು ಮಹತ್ವದ ಮಾತುಗಳನ್ನಾಡಿರುವ ಮೋದಿ ಅವರಿಗೆ ನನ್ನ ಕೃತಜ್ಞತೆಗಳು. ಈ ಮೊದಲು ಯಾವ ಪ್ರಧಾನಿಯೂ ಈ ಕೆಲಸವನ್ನು ಮಾಡಿರಲಿಲ್ಲ. ಸಂಘರ್ಷಗಳು ಹೈಲೈಟ್ ಆದರೆ ತಮ್ಮನ್ನು ಸಂಪೂರ್ಣ ದೇಶವೇ ಗಮನಿಸುತ್ತಿದೆ ಎಂಬುದನ್ನು ಅರ್ಥ ಮಾಡಿಕೊಳ್ಳುವ ಕ್ರೀಡಾಳುಗಳಿಗೆ ಅದೇ ಪ್ರೋತ್ಸಾಹವಾಗಿ ಬದಲಾಗುತ್ತದೆ. ನಮ್ಮ ದೇಶದ ಜನರು ಪ್ರತಿದಿನ ನಮ್ಮನ್ನು ಗಮನಿಸುತ್ತಿದ್ದಾರೆ, ಕೇವಲ ನಾಲ್ಕು ವರ್ಷಕ್ಕೊಮ್ಮೆಯಲ್ಲ. ನಿರತರವಾಗಿ ಎಂಬ ಅರಿವು ಅವರಿಗಾಗುತ್ತದೆ ಎಂದಿದ್ದಾರೆ.
