ಅಹಮ್ಮದಾಬಾದ್: ಐಪಿಎಲ್ 2024 ರಲ್ಲಿ ಗುಜರಾತ್ ಟೈಟನ್ಸ್ ವಿರುದ್ಧ ಸಿಎಸ್ ಕೆ ಪಂದ್ಯ ನಡೆಯುತ್ತಿದ್ದಾಗ ಅಭಿಮಾನಿಯೊಬ್ಬ ಧೋನಿಯನ್ನು ನೋಡಲೆಂದು ಪಿಚ್ ಗೆ ನುಗ್ಗಿದ್ದಾನೆ. ಈತನ ಜೊತೆಗೆ ಧೋನಿ ನಡೆದುಕೊಂಡ ರೀತಿ ಈಗ ಎಲ್ಲರ ಮೆಚ್ಚುಗೆಗೆ ಪಾತ್ರವಾಗಿದೆ.
ವಿರಾಟ್ ಕೊಹ್ಲಿ, ಧೋನಿ, ರೋಹಿತ್ ಶರ್ಮಾರಂತಹ ದಿಗ್ಗಜ ಆಟಗಾರರು ಮೈದಾನದಲ್ಲಿದ್ದಾಗ ಅಭಿಮಾನಿಗಳು ಅವರನ್ನು ಭೇಟಿ ಮಾಡಲು ಮೈದಾನಕ್ಕೆ ನುಗ್ಗಿದ ಎಷ್ಟೋ ಉದಾಹರಣೆಗಳಿವೆ. ಈ ಐಪಿಎಲ್ ನಲ್ಲೇ ಇಂತಹ ಘಟನೆಗಳಾಗಿವೆ. ಇದೀಗ ಧೋನಿಯನ್ನು ನೋಡಲು ಅಭಿಮಾನಿಯೊಬ್ಬ ಮೈದಾನಕ್ಕೆ ನುಗ್ಗಿದ್ದಾನೆ.
ಅಹಮ್ಮದಾಬಾದ್ ಮೈದಾನದಲ್ಲಿ ಧೋನಿ ಬ್ಯಾಟಿಂಗ್ ಮಾಡುತ್ತಿದ್ದಾಗ ಅಭಿಮಾನಿಯೊಬ್ಬ ಸೀದಾ ಪಿಚ್ ಗೆ ನುಗ್ಗಿ ಧೋನಿಯ ಕಾಲು ಹಿಡಿದು ನಮಸ್ಕರಿಸಿದ್ದಾನೆ. ಮೊದಲು ಧೋನಿ ಆತನಿಂದ ತಪ್ಪಿಸಿಕೊಳ್ಳುವಂತೆ ಓಡುವ ನಾಟಕವಾಡಿದ್ದಾರೆ. ಬಳಿಕ ಆತನ ಹೆಗಲಿಗೆ ಕೈ ಹಾಕಿ ತಿಳಿ ಹೇಳಿದ್ದಾರೆ. ಈ ವೇಳೆ ಭದ್ರತಾ ಪಡೆ ಸಿಬ್ಬಂದಿಗಳು ಮೈದಾನಕ್ಕೆ ಬಂದು ಆತನನ್ನು ಹಿಡಿದುಕೊಂಡಿದ್ದಾರೆ. ಈ ವೇಳೆ ಸಿಬ್ಬಂದಿಗಳಿಗೂ ಆತನಿಗೆ ಏನೂ ಮಾಡದಂತೆ ಮನವಿ ಮಾಡಿದ್ದಾರೆ.
ಧೋನಿಯ ಈ ವರ್ತನೆ ಅಭಿಮಾನಿಗಳ ಮೆಚ್ಚುಗೆಗೆ ಪಾತ್ರವಾಗಿದೆ. ಧೋನಿ ಕೇವಲ ಆಟಗಾರನಲ್ಲ, ಎಷ್ಟೋ ಅಭಿಮಾನಿಗಳ ಆರಾಧ್ಯ ದೈವ. ಅದಕ್ಕೇ ಅಭಿಮಾನಿಗಳು ಅವರನ್ನು ಎಲ್ಲೇ ಹೋದರೂ ಈ ರೀತಿ ಮುತ್ತಿಕೊಳ್ಳುತ್ತಾರೆ.
