ಮುಂಬೈ: ಟೀಂ ಇಂಡಿಯಾ ಸ್ಟಾರ್ ಕ್ರಿಕೆಟಿಗ ವಿರಾಟ್ ಕೊಹ್ಲಿ ನವಜಾತ ಮಗ ಅಕಾಯ್ ಕೊಹ್ಲಿಗಾಗಿ ಅಭಿಮಾನಿಗಳು ನಾಯಕ ರೋಹಿತ್ ಶರ್ಮಾಗೆ ಹೊಸ ಬೇಡಿಕೆಯಿಟ್ಟಿದ್ದಾರೆ.
ಇದೇ ಫೆಬ್ರವರಿ 15 ರಂದು ವಿರಾಟ್ ಕೊಹ್ಲಿ-ಅನುಷ್ಕಾ ಶರ್ಮಾ ದಂಪತಿಗೆ ಪುತ್ರನ ಜನನವಾಗಿತ್ತು. ಲಂಡನ್ ನಲ್ಲಿ ಅನುಷ್ಕಾ ಹೆರಿಗೆಯಾಗಿತ್ತು. ಮಗ ಹುಟ್ಟಿದ ನಾಲ್ಕು ದಿನಗಳ ನಂತರ ಕೊಹ್ಲಿ ದಂಪತಿ ಸೋಷಿಯಲ್ ಮೀಡಿಯಾ ಮೂಲಕ ಖುಷಿ ಸುದ್ದಿ ಹಂಚಿಕೊಂಡಿದ್ದರು.
ಅಕಾಯ್ ಜನಿಸಿದ ಕ್ಷಣದಿಂದಲೇ ಅಭಿಮಾನಿಗಳು ಅವರ ಹೆಸರಿನಲ್ಲಿ ಸೋಷಿಯಲ್ ಮೀಡಿಯಾ ಖಾತೆ ತೆರೆದಿದ್ದರು. ಅಲ್ಲದೆ, ಕೆಲವರು ಎಐ ಜನರೇಟೆಡ್ ಫೋಟೋ ಪ್ರಕಟಿಸಿದ್ದರು. ಅಂತೂ ಹುಟ್ಟಿದ ಮರುಕ್ಷಣದಿಂದಲೇ ಅಕಾಯ್ ಫ್ಯಾನ್ ಫಾಲೋಯಿಂಗ್ ಕೂಡಾ ಸಾಕಷ್ಟಾಗಿದೆ.
ಅಷ್ಟೇ ಏಕೆ, ಬೆಂಗಳೂರಿನ ಚಿನ್ನಸ್ವಾಮಿ ಮೈದಾನದಲ್ಲಿ ನಡೆಯುತ್ತಿರುವ ಡಬ್ಲ್ಯುಪಿಎಲ್ ಪಂದ್ಯದ ವೇಳೆಯೂ ಆರ್ ಸಿಬಿ ಅಭಿಮಾನಿಗಳು ಅಕಾಯ್ ಗೆ ವೆಲ್ ಕಂ ಬೋರ್ಡ್ ಹಿಡಿದು ನಿಂತಿದ್ದರು. ಇದೀಗ ಮತ್ತೊಂದು ಹೆಜ್ಜೆಯಿಟ್ಟಿರುವ ಕ್ರಿಕೆಟ್ ಅಭಿಮಾನಿಗಳು ಅಕಾಯ್ ನನ್ನೂ ಡೆಬ್ಯೂಟ್ ಮಾಡಿಸಿ ಎಂದು ರೋಹಿತ್ ಶರ್ಮಾಗೆ ಮನವಿ ಮಾಡಿದ್ದಾರೆ.
ಭಾರತ ಮತ್ತು ಇಂಗ್ಲೆಂಡ್ ನಡುವಿನ ನಾಲ್ಕನೇ ಟೆಸ್ಟ್ ಪಂದ್ಯದ ವೇಳೆ ಅಭಿಮಾನಿಯೊಬ್ಬರು ಅಕಾಯ್ ನ್ನು ಡೆಬ್ಯೂಟ್ ಮಾಡಿಸಿ ಎಂದು ರೋಹಿತ್ ಗೆ ಮನವಿ ಮಾಡುವಂತೆ ಪೋಸ್ಟರ್ ಹಿಡಿದು ನಿಂತಿದ್ದರು. ಈ ಫೋಟೋ ಈಗ ಸೋಷಿಯಲ್ ಮೀಡಿಯಾದಲ್ಲಿ ವೈರಲ್ ಆಗಿದೆ. ರೋಹಿತ್ ಶರ್ಮಾ ಈ ಸರಣಿಯಲ್ಲಿ ಸರ್ಫರಾಜ್ ಖಾನ್, ರಜತ್ ಪಟಿದಾರ್, ಧ‍್ರುವ್ ಜುರೆಲ್ ಗೆ ಚೊಚ್ಚಲ ಅವಕಾಶ ನೀಡಿದ್ದರು. ಹೀಗಾಗಿ ಅಕಾಯ್ ಗಾಗಿಯೂ ಫ್ಯಾನ್ಸ್ ಬೇಡಿಕೆಯಿಟ್ಟಿದ್ದಾರೆ. ಹುಟ್ಟಿ ಇನ್ನೂ ತಿಂಗಳು ಕಳೆದಿಲ್ಲ. ಆಗಲೇ ಅಕಾಯ್ ಗೆ ಇಷ್ಟೊಂದು ಅಭಿಮಾನಿಗಳು!
