ಹರ್ಮನ್ ಪ್ರೀತ್ ಕೌರ್ ಗೆ ಭಾರೀ ದಂಡ: ಮಹಿಳಾ ಕ್ರಿಕೆಟ್ ತಂಡದ ನಾಯಕಿ ವರ್ತನೆ ಸರೀನಾ?

ಢಾಕಾ: ಬಾಂಗ್ಲಾದೇಶ ವಿರುದ್ಧ ಮೊನ್ನೆ ನಡೆದ ಅಂತಿಮ ಏಕದಿನ ಪಂದ್ಯದಲ್ಲಿ ಅಂಪಾಯರ್ ಕಳಪೆ ತೀರ್ಮಾನದ ವಿರುದ್ಧ ಮೈದಾನದಲ್ಲೇ ಆಕ್ರೋಶ ವ್ಯಕ್ತಪಡಿಸಿದ ಭಾರತ ಮಹಿಳಾ ಕ್ರಿಕೆಟ್ ತಂಡದ ನಾಯಕಿ ಹರ್ಮನ್ ಪ್ರೀತ್ ಕೌರ್ ಗೆ ಐಸಿಸಿ ಭಾರೀ ದಂಢ ವಿಧಿಸಿದೆ.

ಪಂದ್ಯ ರೋಚಕವಾಗಿದ್ದಾಗ ತಮ್ಮ ವಿರುದ್ಧ ಅಂಪಾಯರ್ ತಪ್ಪಾಗಿ ಔಟ್ ತೀರ್ಪು ನೀಡಿದ್ದು ಹರ್ಮನ್ ಆಕ್ರೋಶಕ್ಕೆ ಕಾರಣವಾಗಿತ್ತು. ಮೈದಾನದಲ್ಲೇ ಬ್ಯಾಟ್ ನಿಂದ ವಿಕೆಟ್ ಗೆ ಹೊಡೆದು ಕೆಳಗುರುಳಿಸಿದ್ದಲ್ಲದೆ, ಅಂಪಾಯರ್ ನಿಂದಿಸುತ್ತಾ ಮೈದಾನದಿಂದ ಹೊರಗೆ ಬಂದಿದ್ದರು.

ಇದು ಇಷ್ಟಕ್ಕೇ ನಿಂತಿರಲಿಲ್ಲ. ಬಾಂಗ್ಲಾದೇಶ ಮತ್ತು ಭಾರತ ನಾಯಕಿಯರು ಟ್ರೋಫಿ ಜೊತೆ ಪೋಸ್ ನೀಡಲು ಹೇಳಿದಾಗ ಬಾಂಗ್ಲಾ ನಾಯಕಿ ನಿಗರ್ ಸುಲ್ತಾನಗೆ ನೀವು ಮಾತ್ರ ಯಾಕಿದ್ದೀರಿ? ನಿಮಗೆ ಪಂದ್ಯ ಟೈ ಮಾಡಿಸಿಕೊಟ್ಟ ಅಂಪಾಯರ್ ನ್ನೂ ಪೋಸ್ ಕೊಡಲು ಕರೆಯಿರಿ ಎಂದು ಟಾಂಗ್ ನೀಡಿದ್ದಾರೆ ಎಂದು ಅಲ್ಲಿದ್ದ ಪ್ರತ್ಯಕ್ಷದರ್ಶಿಗಳು ಹೇಳಿದ್ದಾರೆ. ಇದರಿಂದ ಅಸಮಾಧಾನಗೊಂಡ ಬಾಂಗ್ಲಾ ನಾಯಕಿ ತಮ್ಮ ಆಟಗಾರರನ್ನು ಕರೆದುಕೊಂಡು ಪೆವಿಲಿಯನ್ ಗೆ ತೆರಳಿದ್ದರು. ಹರ್ಮನ್ ವರ್ತನೆ ಬಗ್ಗೆ ಸೋಷಿಯಲ್ ಮೀಡಿಯಾದಲ್ಲಿ ಮಿಶ್ರ ಪ್ರತಿಕ್ರಿಯೆ ವ್ಯಕ್ತವಾಗಿದೆ. ಇದರ ಜೊತೆಗೆ ಐಸಿಸಿ ಪಂದ್ಯದ ಸಂಭಾವನೆಯಲ್ಲಿ ಶೇ.75 ರಷ್ಟು ದಂಡ ಮತ್ತು 3 ಡಿಮೆರಿಟ್ ಪಾಯಿಂಟ್ ಗಳನ್ನೂ ನೀಡಿದೆ.