ವಿಶಾಖಪಟ್ಟಣಂ: ಐಪಿಎಲ್ ನಲ್ಲಿ ಧೋನಿ ಬ್ಯಾಟಿಂಗ್ ನೋಡಬೇಕೆಂಬ ಅಭಿಮಾನಿಗಳ ಬಯಕೆ ಕೊನೆಗೂ ಈಡೇರಿದೆ. ಡೆಲ್ಲಿ ಕ್ಯಾಪಿಟಲ್ಸ್ ವಿರುದ್ಧ ಧೋನಿ ಬ್ಯಾಟಿಂಗ್ ಗಿಳಿದು ಅಭಿಮಾನಿಗಳ ಆಸೆ ಈಡೇರಿಸಿದರು.
ಬರೀ ಬ್ಯಾಟ್ ಹಿಡಿದಿದ್ದು ಮಾತ್ರವಲ್ಲ, ತಮ್ಮ ಎಂದಿನ ಶೈಲಿಯಲ್ಲಿ ಬ್ಯಾಟ್ ಬೀಸಿ ಧೋನಿ ಪ್ರೇಕ್ಷಕರನ್ನು ರಂಜಿಸಿದ್ದಾರೆ. ಒಟ್ಟು 16 ಎಸೆತ ಎದುರಿಸಿದ ಧೋನಿ ಔಟಾಗದೇ 37 ರನ್ ಗಳಿಸಿದರು. ಇದರಲ್ಲಿ ಮೂರು ಬಿಗ್ ಸಿಕ್ಸರ್ ಸೇರಿತ್ತು. ಇದರೊಂದಿಗೆ ಧೋನಿ ಮೂರು ದಾಖಲೆಗಳನ್ನೂ ಮಾಡಿದರು.
ಐಪಿಎಲ್ ನಲ್ಲಿ ಕೊನೆಯ ಓವರ್ ನಲ್ಲಿ ಗರಿಷ್ಠ ಸಿಕ್ಸರ್ ಸಿಡಿಸಿದ ದಾಖಲೆ ಧೋನಿ ಮಾಡಿದರು. ಅವರು ಒಟ್ಟು 61 ಸಿಕ್ಸರ್ ಸಿಡಿಸಿದರು. ಜೊತೆಗೆ ಟಿ20 ಕ್ರಿಕೆಟ್ ನಲ್ಲಿ 7 ಸಾವಿರಕ್ಕೂ ಅಧಿಕ ರನ್ ಕಲೆ ಹಾಕಿ ಏಷ್ಯಾದ ಮೊದಲ ವಿಕೆಟ್ ಕೀಪರ್ ಬ್ಯಾಟಿಗ ಎನಿಸಿಕೊಂಡರು. ಅಲ್ಲದೆ ಟಿ20 ಕ್ರಿಕೆಟ್ ನಲ್ಲಿ 300 ಕ್ಯಾಚ್ ಮತ್ತು ಸ್ಟಂಪಿಂಗ್ ಮಾಡಿದ ದಾಖಲೆ ಮಾಡಿದರು.
ಈ ಐಪಿಎಲ್ ನಲ್ಲಿ ಧೋನಿ ತಮ್ಮ ಹಳೆಯ ದಿನಗಳನ್ನು ನೆನಪಿಸುವಂತೆ ಉದ್ದ ಕೂದಲು ಬಿಟ್ಟಿದ್ದಾರೆ. ಉದ್ದ ಕೂದಲು ಬಿಟ್ಟುಕೊಂಡು ಹೆಲ್ಮೆಟ್ ಧರಿಸಿ ಬ್ಯಾಟಿಂಗ್ ಗಿಳಿದಿದ್ದು ನೋಡಿ ಅಭಿಮಾನಿಗಳು ಹಳೆಯ ಧೋನಿ ಕಂಡಂತಾಯಿತು ಎಂದಿದ್ದಾರೆ. ಅದಕ್ಕೆ ತಕ್ಕಂತೆ ಹಳೆಯ ಧೋನಿಯಂತೇ ಭರ್ಜರಿ ಹೊಡೆತಗಳ ಮೂಲಕ ಅಭಿಮಾನಿಗಳು ಹುಚ್ಚೆದ್ದು ಕುಣಿಯುವಂತೆ ಮಾಡಿದರು.
