ಅಹಮ್ಮದಾಬಾದ್: ಐಪಿಎಲ್ 2024 ರಲ್ಲಿ ರಾಜಸ್ಥಾನ್ ರಾಯಲ್ಸ್ ವಿರುದ್ಧ ಎಲಿಮಿನೇಟರ್ ಪಂದ್ಯದಲ್ಲಿ ಕಳಪೆ ಪ್ರದರ್ಶನ ನೀಡಿದ ಗ್ಲೆನ್ ಮ್ಯಾಕ್ಸ್ ವೆಲ್ ಈಗ ಅಭಿಮಾನಿಗಳ ಕೆಂಗಣ್ಣಿಗೆ ಗುರಿಯಾಗಿದ್ದಾರೆ. ಕಳಪೆ ಪ್ರದರ್ಶನ ನೀಡಿದ ಮ್ಯಾಕ್ಸ್ ವೆಲ್ ರನ್ನು ಕಟ್ಟಿ ಹಾಕಿ ಅಭಿಮಾನಿಗಳು ಹಿಗ್ಗಾಮುಗ್ಗಾ ಝಾಡಿಸಿದ್ದಾರೆ!
ಆದರೆ ಇದೆಲ್ಲಾ ನಡೆದಿರುವುದು ರಿಯಲ್ ಆಗಿಲ್ಲ, ರೀಲ್ಸ್, ಮೆಮೆಗಳಲ್ಲಿ. ಗ್ಲೆನ್ ಮ್ಯಾಕ್ಸ್ ವೆಲ್ ನಿನ್ನೆಯ ಪಂದ್ಯದಲ್ಲಿ ಗೋಲ್ಡನ್ ಡಕ್ ಆಗಿ ನಿರ್ಗಮಿಸಿದ್ದರು. ಇದರೊಂದಿಗೆ ಈ ಐಪಿಎಲ್ ನುದ್ದಕ್ಕೂ ತಮ್ಮ ಕೆಟ್ಟ ಫಾರ್ಮ್ ನ್ನು ಮತ್ತೆ ಮುಂದುವರಿಸಿದರು. ಆರ್ ಸಿಬಿಯ ಪ್ರಮುಖ ಬ್ಯಾಟಿಗನಾಗಿರುವ ಮ್ಯಾಕ್ಸ್ ವೆಲ್ ಅಗತ್ಯ ಸಂದರ್ಭದಲ್ಲಿ ತಂಡಕ್ಕೆ ಕೈಕೊಟ್ಟಿದ್ದು ಅಭಿಮಾನಿಗಳ ಸಹನೆಯ ಕಟ್ಟೆಯೊಡೆದಿತ್ತು.
ಹೀಗಾಗಿ ಮ್ಯಾಕ್ಸ್ ವೆಲ್ ರನ್ನು ಕಟ್ಟಿ ಹಾಕಿ ಹೊಡೆಯುವಂತೆ, ಇಲ್ಲವೇ ಅಟ್ಟಾಡಿಸಿ ನಾಲ್ಕೈದು ಜನ ಹೊಡೆಯುವಂತಹ ಮೆಮೆಗಳನ್ನು ಸೃಷ್ಟಿಸಿ ಸೋಷಿಯಲ್ ಮೀಡಿಯಾದಲ್ಲಿ ತಮ್ಮ ಆಕ್ರೋಶ ತೀರಿಸಿಕೊಂಡಿದ್ದಾರೆ. ಈ ಟೂರ್ನಿಯುದ್ದಕ್ಕೂ ಮ್ಯಾಕ್ಸ್ ವೆಲ್ ಆಟಕ್ಕುಂಟು ಲೆಕ್ಕಕ್ಕಿಲ್ಲದ ಆಟಗಾರನಾಗಿದ್ದರು.
ಒಬ್ಬ ಸ್ಟಾರ್ ಆಟಗಾರನಾಗಿದ್ದುಕೊಂಡು ಏಕಾಂಗಿಯಾಗಿ ಪಂದ್ಯ ಮುನ್ನಡೆಸಬಲ್ಲ ಸಾಮರ್ಥ್ಯವುಳ‍್ಳ ಆಟಗಾರನಾಗಿದ್ದುಕೊಂಡು ಮ್ಯಾಕ್ಸ್ ವೆಲ್ ಇಷ್ಟು ಹೀನಾಯವಾಗಿ ಆಡಿದ್ದು ಅಭಿಮಾನಿಗಳ ಆಕ್ರೋಶ ಮೇರೆ ಮೀರಿತ್ತು. ಹೀಗಾಗಿಯೇ ಸೋಷಿಯಲ್ ಮೀಡಿಯಾ ಮೂಲಕ ಸೇಡು ತೀರಿಸಿಕೊಂಡರು.
