ಮುಂಬೈ: ಐಪಿಎಲ್ 2024 ಆರಂಭಕ್ಕೆ ಕೆಲವೇ ದಿನ ಬಾಕಿಯಿದೆ. ಈಗಾಗಲೇ ಹಲವು ಆಟಗಾರರು ಮುಂಬೈ ಇಂಡಿಯನ್ಸ್ ತಂಡವನ್ನು ಸೇರಿಕೊಂಡಾಗಿದೆ. ಆದರೆ ರೋಹಿತ್ ಶರ್ಮಾ ಇನ್ನೂ ಕೂಡಿಕೊಂಡಿಲ್ಲ.
ಸಾಮಾನ್ಯವಾಗಿ ರೋಹಿತ್ ಶರ್ಮಾ ಐಪಿಎಲ್ ಎಂದರೆ ಉತ್ಸಾಹದಿಂದಲೇ ಮುಂಬೈ ಇಂಡಿಯನ್ಸ್ ತಂಡದ ಜೊತೆಯಾಗುತ್ತಾರೆ. ಆದರೆ ಈ ಬಾರಿ ರೋಹಿತ್ ನಾಯಕರಲ್ಲ. ಕೇವಲ ಆಟಗಾರನಾಗಿ ತಂಡದಲ್ಲಿರಲಿದ್ದಾರೆ. ಹೀಗಾಗಿ ಅವರ ಫ್ಯಾನ್ಸ್ ಕೂಡಾ ಆಕ್ರೋಶದಲ್ಲಿದ್ದಾರೆ.
ಇದರ ನಡುವೆ ರೋಹಿತ್ ಇನ್ನೂ ತಂಡಕ್ಕೆ ಬಾರದೇ ಇರುವುದನ್ನು ನೋಡಿ ಫ್ಯಾನ್ಸ್ ಬಹುಶಃ ರೋಹಿತ್ ಗೆ ಈ ಟೀಂ ಸೇರಿಕೊಳ್ಳಲು ಇಷ್ಟವಿಲ್ಲವೇನೋ ಎನ್ನುತ್ತಿದ್ದಾರೆ. ನಿನ್ನೆಯಷ್ಟೇ ಮುಂಬೈ ತನ್ನ ಹೊಸ ಜೆರ್ಸಿಯನ್ನು ಅನಾವರಣಗೊಳಿಸಲು ವಿಡಿಯೋವೊಂದನ್ನು ಹೊರಬಿಟ್ಟಿದೆ. ಈ ವಿಡಿಯೋದಲ್ಲಿ ಮೊದಲು ರೋಹಿತ್ ಶರ್ಮಾ ಬರುತ್ತಾರೆ. ಆದರೆ ಈ ವಿಡಿಯೋ ನೋಡಿ ನೆಟ್ಟಿಗರು ಯಾಕೋ ರೋಹಿತ್ ಶರ್ಮಾ ಖುಷಿಯಾಗಿಲ್ಲ ಎನಿಸುತ್ತದೆ ಎನ್ನುತ್ತಿದ್ದಾರೆ.
ಮುಂಬೈ ನೂತನ ನಾಯಕ ಹಾರ್ದಿಕ್ ಪಾಂಡ್ಯ ಈಗಾಗಲೇ ತಂಡವನ್ನು ಕೂಡಿಕೊಂಡಿದ್ದು ಮೊದಲ ದಿನವೇ ಪೂಜೆ ಮಾಡುವ ಮೂಲಕ ಭರ್ಜರಿ ಎಂಟ್ರಿ ಕೊಟ್ಟಿದ್ದಾರೆ. ಈಗಾಗಲೇ ಅಭ್ಯಾಸವನ್ನೂ ಆರಂಭಿಸಿದ್ದಾರೆ. ಆದರೆ ರೋಹಿತ್, ಜಸ್ಪ್ರೀತ್ ಬುಮ್ರಾ ಮುಂತಾದ ಸ್ಟಾರ್ ಆಟಗಾರರು ಇನ್ನೂ ತಂಡವನ್ನು ಸೇರಿಕೊಂಡಿಲ್ಲ.
