ಮಗಳ ಫೋಟೋ ರಿವೀಲ್ ಆದ ಬೆನ್ನಲ್ಲೇ ಮಾಧ್ಯೋಮಗಳಿಗೆ ಮನವಿ ಮಾಡಿದ ವಿರಾಟ್ ಕೊಹ್ಲಿ ದಂಪತಿ

ಮುಂಬೈ: ದ.ಆಫ್ರಿಕಾ ವಿರುದ್ಧದ ಏಕದಿನ ಪಂದ್ಯ ವೀಕ್ಷಿಸುತ್ತಿರುವ ತಮ್ಮ ಮಗಳು ವಮಿಕಾ ಫೋಟೋ ಟಿವಿ ಮೂಲಕ ಬಹಿರಂಗವಾಗುತ್ತಿದ್ದಂತೇ ಕ್ರಿಕೆಟಿಗ ವಿರಾಟ್ ಕೊಹ್ಲಿ-ಅನುಷ್ಕಾ ದಂಪತಿ ಮಾಧ್ಯಮಗಳಲ್ಲಿ ಮನವಿ ಮಾಡಿದ್ದಾರೆ.

ವಿರಾಟ್ ದಂಪತಿ ತಮ್ಮ ಮಗಳ ಫೋಟೋವನ್ನು ಇದುವರೆಗೆ ರಿವೀಲ್ ಮಾಡಿಲ್ಲ. ಖಾಸಗಿತನ ಕಾಪಾಡುವ ಉದ್ದೇಶದಿಂದ ನಮ್ಮ ಮಗಳ ಫೋಟೋವನ್ನು ಯಾರೂ ಪ್ರಕಟಿಸಬೇಡಿ ಎಂದು ಇದುವರೆಗೆ ಕೊಹ್ಲಿ ದಂಪತಿ ಹೇಳುತ್ತಲೇ ಇದ್ದಾರೆ. ಹೀಗಾಗಿ ಫೋಟೋಗ್ರಾಫರ್ ಗಳಿಗೂ ತಮ್ಮ ಮಗಳ ಫೋಟೋ ತೆಗೆಯಲು ಬಿಟ್ಟಿಲ್ಲ.

ಆದರೆ ನಿನ್ನೆಯ ಪಂದ್ಯದ ನಡುವೆ ಅನುಷ್ಕಾ ಕೈಯಲ್ಲಿದ್ದ ವಮಿಕಾ ತಂದೆಯ ಆಟ ನೋಡಿ ಖುಷಿಪಡುತ್ತಿರುವ ದೃಶ್ಯ ನೇರಪ್ರಸಾರವಾಗಿತ್ತು. ಇದನ್ನೇ ಇಟ್ಟುಕೊಂಡು ಸೋಷಿಯಲ್ ಮೀಡಿಯಾಗಳಲ್ಲಿ, ಮಾಧ‍್ಯಮಗಳಲ್ಲಿ ವಮಿಕಾ ಫೋಟೋ ಪ್ರಕಟಿಸಲಾಗಿತ್ತು.

ಇದರ ಬೆನ್ನಲ್ಲೇ ಕೊಹ್ಲಿ ದಂಪತಿ ಸಾಮಾಜಿಕ ಜಾಲತಾಣದ ಮೂಲಕ ಸೋಷಿಯಲ್ ಮೀಡಿಯಾಗೆ, ಮಾಧ‍್ಯಮಗಳಿಗೆ ಮನವಿ ಮಾಡಿದ್ದು, ದಯವಿಟ್ಟು ನಮ್ಮ ಮಗಳ ಫೋಟೋವನ್ನು ಪ್ರಕಟಿಸಬೇಡಿ, ಡಿಲೀಟ್ ಮಾಡಿ. ನಿನ್ನೆ ಟಿವಿ ಕ್ಯಾಮರಾ ನಮ್ಮನ್ನು ಫೋಕಸ್ ಮಾಡಿದ್ದು ಗೊತ್ತಾಗಿರಲಿಲ್ಲ. ನಮ್ಮ ಖಾಸಗಿತನವನ್ನು ಗೌರವಿಸಿ ಎಂದು ಮನವಿ ಮಾಡಿದ್ದಾರೆ.