ಮಕ್ಕಳಿಗೆ ಸಿಹಿತಿಂಡಿ ನೀಡಿ ಅಪಹರಿಸುತ್ತಿದ್ದ ಕತರ್ನಾಕ್ ಕಳ್ಳರ ಗ್ಯಾಂಗ್ ಅರೆಸ್ಟ್
ಸೋಮವಾರ, 4 ನವೆಂಬರ್ 2019 (07:45 IST)
ಬೆಂಗಳೂರು : ಸಿಹಿತಿಂಡಿ ನೀಡಿ ಚಿಕ್ಕ ಮಕ್ಕಳನ್ನು ಅಪಹರಿಸುತ್ತಿದ್ದ ಕತರ್ನಾಕ್ ಕಳ್ಳರ ಗ್ಯಾಂಗ್ ನ್ನು ಬೆಂಗಳೂರಿನ ಗಿರಿನಗರ ಠಾಣಾ ಪೊಲೀಸರು ಬಂಧಿಸಿದ್ದಾರೆ.
ಲೋಕೇಶ್(40)ಬಂಧಿತ ಆರೋಪಿಯಾಗಿದ್ದು, ಈತನಿಗೆ ಸಹಕರಿಸುತ್ತಿದ್ದ ತಂಗಿ ಹಾಗೂ ಆಕೆಯ ಗಂಡನನ್ನು ಕೂಡ ಪೊಲೀಸರು ಬಂಧಿಸಿದ್ದಾರೆ. ಕೂಲಿ ಕಾರ್ಮಿಕರ ಮಕ್ಕಳನ್ನೇ ಟಾರ್ಗೆಟ್ ಮಾಡುತ್ತಿದ್ದ ಲೋಕೇಶ್ ಅಪಹರಣ ಮಾಡುವ ಮೊದಲೇ ಮಕ್ಕಳಿಗೆ ಸಿಹಿತಿಂಡಿ ನೀಡಿ ಅವರ ಫೋಟೋ ತೆಗೆದು ಮಕ್ಕಳನ್ನು ಕೊಂಡುಕೊಳ್ಳುವವರಿಗೆ ತೋರಿಸಿ ಯಾವ ಮಗು ಬೇಕೆಂದು ನಿಗದಿಪಡಿಸಿ ಹಣವನ್ನು ಪಡೆದು ಬಳಿಕ ಆಟೋದಲ್ಲಿ ಬಂದು ಮಗುವನ್ನು ಅಪಹರಿಸುತ್ತಿದ್ದ.
ಹೀಗೆ ಆತ ಕೂಲಿ ಕಾರ್ಮಿಕರಾದ ದೇವಮ್ಮ ಹಾಗೂ ಚೆನ್ನಪ್ಪ ದಂಪತಿಯ ಮಗುವನ್ನು ಅಪಹರಿಸಿದ್ದರಿಂದ ಮಗುವಿನ ತಂದೆತಾಯಿ ಪೊಲೀಸರಿಗೆ ದೂರು ನೀಡಿದ್ದಾರೆ. ಪ್ರಕರಣ ದಾಖಲಿಸಿಕೊಂಡ ಪೊಲೀಸರು ತನಿಖೆ ನಡೆಸಿದಾಗ ಲೋಕೇಶ್ ಮಗುವನ್ನು ಅಪಹರಿಸಿ ಕರೆದುಕೊಂಡು ಹೋಗುತ್ತಿದ್ದ ದೃಶ್ಯ ಸಿಸಿಟಿವಿಯಲ್ಲಿ ಸೆರೆಯಾಗಿದ್ದು, ಪೊಲೀಸರು ಆತನನ್ನು ಬಂಧಿಸಿದ್ದಾರೆ. ಹಾಗೇ ಈ ಕೃತ್ಯಕ್ಕೆ ಆತನ ತಂಗಿ ಹಾಗೂ ಆಕೆಯ ಗಂಡನ ಸಹಕಾರವಿದ್ದ ಹಿನ್ನಲೆ ಅವರನ್ನು ವಶಕ್ಕೆ ಪಡೆದಿದ್ದಾರೆ.
