ಮಂಗಳೂರು: ಧರ್ಮಸ್ಥಳದಲ್ಲಿ ಹೂತಿಟ್ಟ ಶವಗಳ ಅವಶೇಷಗಳಿಗಾಗಿ ಹುಡುಕಾಟ ನಡೆಸುತ್ತಿರುವ ಎಸ್ಐಟಿ ತಂಡ ಇಂದು ಭಾನುವಾರದ ವಿರಾಮದ ಬಳಿಕ ಮತ್ತೆ ಫೀಲ್ಡಿಗಿಳಿಯಲಿದೆ. ಇಂದಿನ ಕಾರ್ಯಾಚರಣೆ ಹೇಗಿರಲಿದೆ ಇಲ್ಲಿದೆ ವಿವರ.
ಅನಾಮಿಕ ದೂರುದಾರ ಗುರುತು ಮಾಡಿರುವ 9 ಪಾಯಿಂಟ್ ಗಳಲ್ಲಿ ಈಗಾಗಲೇ ಹುಡುಕಾಟ ನಡೆಸಲಾಗಿದೆ. ಈ ಪೈಕಿ 6 ನೇ ಪಾಯಿಂಟ್ ನಲ್ಲಿ ಮಾತ್ರ ಅಸ್ಥಿಪಂಜರ ಸಿಕ್ಕಿದೆ. 9 ನೇ ಪಾಯಿಂಟ್ ನಲ್ಲಿ ಆರರಿಂದ ಏಳು ಶವ ಹೂತಿದ್ದಾಗಿ ಅನಾಮಿಕ ದೂರುದಾರ ಹೇಳಿದ್ದ. ಆದರೆ ಶನಿವಾರ ಅಗೆತ ಕಾರ್ಯ ನಡೆಸಿದಾಗ ಒಂದೇ ಒಂದು ಮೂಳೆ ಸಿಕ್ಕಿರಲಿಲ್ಲ.
ಇಂದು ಮತ್ತೆ ಈ ಸ್ಥಳದಲ್ಲಿ ಕಾರ್ಯಾಚರಣೆ ನಡೆಯಲಿದೆ. ಅನಾಮಿಕ ದೂರುದಾರ ಒಟ್ಟು 13 ಸ್ಥಳಗಳನ್ನು ಗುರುತು ಮಾಡಿದ್ದ. ಇನ್ನೂ ನಾಲ್ಕು ಸ್ಥಳಗಳಲ್ಲಿ ಮಣ್ಣು ಅಗೆದು ಅವಶೇಷಗಳಿಗಾಗಿ ಹುಡುಕಾಟ ನಡೆಸುವ ಪ್ರಕ್ರಿಯೆ ಬಾಕಿಯಿದೆ. ಹೀಗಾಗಿ ಇಂದು 9 ಮತ್ತು 10 ರಲ್ಲಿ ಹುಡುಕಾಟ ನಡೆಯುವ ಸಾಧ್ಯತೆಯಿದೆ.
9 ನೇ ಪಾಯಿಂಟ್ ಬಗ್ಗೆ ದೂರುದಾರರು ವಿಶೇಷವಾಗಿ ಉಲ್ಲೇಖಿಸಿದ್ದರು. ಈ ಸ್ಥಳದಲ್ಲಿ ಮೂಳೆ ಸಿಕ್ಕೇ ಸಿಗುತ್ತದೆ ಎಂಬ ವಿಶ್ವಾಸದಲ್ಲಿದ್ದರು. ಆದರೆ ಮೊನ್ನೆ ಸಿಕ್ಕಿರಲಿಲ್ಲ. ಹೀಗಾಗಿ ದೂರುದಾರರ ಪರ ವಕೀಲರು ಗ್ರೌಂಡ್ ಪೆನಟ್ರೀಟಿಂಗ್ ರಾಡರ್ ಬಳಸಿ ಶೋಧ ಕಾರ್ಯ ನಡೆಸಲು ಮನವಿ ಮಾಡಿದ್ದಾರೆ. ಇದನ್ನು ಎಸ್ಐಟಿ ತಂಡ ಪುರಸ್ಕರಿಸುತ್ತಾ ನೋಡಬೇಕಿದೆ.
