ಹೈದರಾಬಾದ್: ಭಾರತ ಮತ್ತು ಇಂಗ್ಲೆಂಡ್ ನಡುವಿನ ಮೊದಲ ಟೆಸ್ಟ್ ಪಂದ್ಯದಲ್ಲಿ ಇಂಗ್ಲೆಂಡ್ ಊಹಿಸಲಾರದ ಅಚ್ಚರಿಯ ಗೆಲುವು ದಾಖಲಿಸಿದೆ.
ಟೀಂ ಇಂಡಿಯಾವನ್ನು 28 ರನ್ ಗಳಿಂದ ಸೋಲಿಸಿ ಐತಿಹಾಸಿಕ ಸಾಧನೆ ಮಾಡಿದೆ. ಗೆಲುವಿಗೆ 231 ರನ್ ಗಳ ಗುರಿ ಬೆನ್ನತ್ತಿದ ಟೀಂ ಇಂಡಿಯಾ ಬ್ಯಾಟಿಂಗ್ ವೈಫಲ್ಯಕ್ಕೊಳಗಾಗಿ 202 ರನ್ ಗಳಿಗೆ ಆಲೌಟ್ ಆಗಿದೆ. ಈ ಮೂಲಕ ಸೋತು ಮುಖಭಂಗ ಅನುಭವಿಸಿದೆ.
ಮೊದಲ ಇನಿಂಗ್ಸ್ ನಲ್ಲಿ ಇಂಗ್ಲೆಂಡ್ 236 ರನ್ ಗಳಿಸಿತ್ತು. ಟೀಂ ಇಂಡಿಯಾ 436 ರನ್ ಗಳಿಸಿ 190 ರನ್ ಗಳ ಬೃಹತ್ ಇನಿಂಗ್ಸ್ ಮುನ್ನಡೆ ಸಾಧಿಸಿತ್ತು. ಮೊದಲ ಇನಿಂಗ್ಸ್ ನಲ್ಲಿ ಇಷ್ಟೊಂದು ಹಿನ್ನಡೆ ಅನುಭವಿಸಿದ್ದರೂ ಇಂಗ್ಲೆಂಡ್ ಒಲಿ ಪಾಪ್ ಅವರ 196 ರನ್ ಗಳ ನೆರವಿನಿಂದ ದ್ವಿತೀಯ ಇನಿಂಗ್ಸ್ ನಲ್ಲಿ 420 ರನ್ ಗಳಿಸಿತು. ಈ ಮೂಲಕ ಟೀಂ ಇಂಡಿಯಾ ಗೆಲುವಿಗೆ 231 ರನ್ ಗಳ ಗುರಿ ನೀಡಿತು.
ಬಹುಶಃ ಟೀಂ ಇಂಡಿಯಾ ಬ್ಯಾಟಿಗರು ಎಚ್ಚರಿಕೆಯಿಂದ ಆಟವಾಡಿದ್ದರೆ ಈ ಮೊತ್ತವನ್ನು ಬೆನ್ನತ್ತುವುದು ಕಷ್ಟವಾಗಿರಲಿಲ್ಲ. ಯಾಕೆಂದರೆ ಪಂದ್ಯದಲ್ಲಿ ಇನ್ನೂ ಒಂದು ದಿನ ಬಾಕಿಯಿತ್ತು. ಆದರೆ ಶುಬ್ಮನ್ ಗಿಲ್ ಶೂನ್ಯ ಸುತ್ತುವ ಮೂಲಕ ಮತ್ತೊಮ್ಮೆ ವೈಫಲ್ಯ ಅನುಭವಿಸಿದರು. ಕೆಎಲ್ ರಾಹುಲ್ ಕೊಂಚ ಪ್ರತಿರೋಧ ತೋರಿದರಾದರೂ ಕೇವಲ 22 ರನ್ ಗಳಿಗೆ ವಿಕೆಟ್ ಒಪ್ಪಿಸಿದರು. ಇನ್ನು, ಶ್ರೇಯಸ್ ಅಯ್ಯರ್ (13) ಮತ್ತೊಮ್ಮೆ ಕೈಕೊಟ್ಟರು.
ಕೊನೆ ಗಳಿಗೆಯಲ್ಲಿ ಅಕ್ಷರ್ ಪಟೇಲ್, ರವಿಚಂದ್ರನ್ ಅಶ್ವಿನ್ ತಲಾ 28 ರನ್ ಸಿಡಿಸಿ ಹೋರಾಟದ ಮನೋಭಾವ ತೋರಿದರಾದರೂ ಪ್ರಯೋಜನವಾಗಲಿಲ್ಲ. ಇಂಗ್ಲೆಂಡ್ ಪರ ಮಾರಕ ದಾಳಿ ಸಂಘಟಿಸಿ ಟಾಮ್ ಹಾರ್ಟ್ಲೀ 7 ವಿಕೆಟ್ ಕಿತ್ತು ಮಿಂಚಿದರು. ಮೊದಲ ಇನಿಂಗ್ಸ್ ನಲ್ಲಿ ಅಷ್ಟೊಂದು ಹಿನ್ನಡೆ ಅನುಭವಿಸಿಯೂ ರೋಚಕ ಗೆಲುವು ಕಂಡ ಇಂಗ್ಲೆಂಡ್ ಸಾಧನೆ ಮೆಚ್ಚಲೇಬೇಕು. ಬಹುಶಃ ಈ ಗೆಲುವನ್ನು ಇಂಗ್ಲೆಂಡ್ ಎಂದಿಗೂ ಮರೆಯಲ್ಲ.
